1 Corinthianee 12 - Yn Conaant Noa 1810

CAB. XII

¹ Nish mychione giootyn spyrrydoil, vraaraghyn, cha baillym shiu ve mee‐hushtagh.

² Ta fys eu dy row shiu nyn Ashoonyn‐quaagh, er nyn goyrt lhieu ersooyl gys ny jallooyn balloo shoh, dy jarroo myr va shiu er nyn leeideil.

³ Shen‐y‐fa ta mish soilshaghey diu, nagh vel dooinney erbee ta loayrt liorish Spyrryd Yee, genmys Yeesey mollaghtagh: as nagh vod dooinney erbee gra dy nee Yeesey yn Chiarn, agh liorish y Spyrryd Noo.

⁴ Nish ta ayn caghlaaghyn dy ghiootyn, agh y Spyrryd cheddin.

⁵ As ta caghlaaghyn dy oikyn ayn, agh y Chiarn cheddin.

⁶ As ta ayn caghlaaghyn dy obbraghyn mirrillagh, agh she’n Jee cheddin ta gobbraghey ooilley ayns ooilley.

⁷ Agh ta soilshey yn Spyrryd er ny choyrt da dy chooilley ghooinney son vondeish ennagh.

⁸ Son da fer ta er ny choyrt liorish y Spyrryd, yn goo dy chreenaght; da fer elley yn goo dy hushtey liorish y Spyrryd cheddin;

⁹ Da fer elley credjue liorish y Spyrryd cheddin; da fer elley ny giootyn dy lheihys liorish y Spyrryd cheddin;

¹⁰ Da fer elley dy obbraghey mirrillyn; da fer elley phadeyrys; da fer elley yn briwnys dy phrowal ny spyrrydyn; da fer elley caghlaaghyn dy ghlaraghyn; da fer elley dy chur bun er glaraghyn.

¹¹ Agh ad shoh ooilley ta’n un as yn eer Spyrryd cheddin gobbraghey, rheynn er dy chooilley ghooinney er‐lheh myr saillish hene.

¹² Son ’naght myr ta’n corp unnane, as e oltyn ymmodee, as nagh vel ooilley oltyn yn un chorp shen, ga ymmodee, jannoo agh un chorp: er yn aght cheddin ta Creest.

¹³ Son liorish un Spyrryd ta shin ooilley er nyn mashtey ayns un chorp, edyr shin ve Hewnyn ny Ashoonyn‐quaagh: edyr shin ve kianlt ny seyr: as ta shin ooilley er n’iu ayns yn un Spyrryd.

¹⁴ Son cha vel y corp un olt, agh ymmodee.

¹⁵ My jir y chass, Er yn oyr nagh nee mish y laue, cha vel mee jeh’n chorp; nagh vel eh son shen jeh’n chorp?

¹⁶ As my jir y chleaysh, Er‐yn‐oyr nagh nee yn tooill mee, cha vel mee jeh’n chorp; nagh vel eh son shen jeh’n chorp?

¹⁷ Dy beagh yn slane corp ny hooill, cre’n raad veagh y clashtyn? as dy beagh yn slane corp ny clashtyn, cre’n raad veagh y soaral?

¹⁸ Agh nish ta Jee er hoiaghey ny oltyn, dagh unnane oc ayns y chorp, myr s’gooidsave lesh hene.

¹⁹ As dy beagh ad oilley un olt, cre veagh y corp?

²⁰ Agh nish t’ad ymmodee oltyn, agh ny‐yeih un chorp.

²¹ As cha vod y tooill gra rish y laue, Cha vel feme aym ort: ny reesht, yn kione rish ny cassyn, Cha vel feme aym erriu.

²² Ny sodjey na shoh, ta ny oltyn shen jeh’n chorp, s’meilley ta shin coontey jeu, foast ymmyrchagh.

²³ As ny oltyn shen jeh’n chorp, sloo ta shin dy choontey jeu, orroo smoo dy stooamid ta shin dy stowal, as ny oltyn neu‐yesh ain er nyn goamrey lesh onnor foddey smoo.

²⁴ Son cha vel ny oltyn aalin ain feme er shoh: agh ta Jee er chummey yn corp dy cheilley, coyrt ny smoo dy onnor da’n ayrn shen va laccal:

²⁵ Nagh beagh scarrey erbee ayns y chorp: agh dy beagh ec ooilley ny oltyn yn chiarail cheddin yn derrey yeh son y jeh elley.

²⁶ Son edyr un olt dy hurranse, ta ooilley ny oltyn surranse mârish: ny un olt dy v’er ny choamrey lesh onnor, ta ooilley ny oltyn goaill boggey mârish.

²⁷ Agh nish ta shiuish corp Chreest, as oltyn er‐lheh.

²⁸ As ta Jee er hoiaghey paart ayns yn agglish, hoshiaght ostyllyn, ’sy nah ynnyd phadeyryn, ’sy trass ynnyd fir‐ynsee, lurg shen mirrillyn, eisht giootyn dy lheihys, fir‐choonee, reilltee, caghlaaghyn dy ghlare.

²⁹ Vel ooilley nyn ostyllyn? vel ooilley nyn vadeyryn? vel ooilley nyn vir‐ynsee? vel ooilley gobbraghey mirrillyn?

³⁰ Vel ec ooilley ny giootyn dy lheihys? vel ooilley loayrt glaraghyn joarree? vel ooilley coyrt bun er glaraghyn?

³¹ Agh yeearree‐jee dy jeean ny ard‐ghiootyn: As foast ta mee jeeaghyn diu raad foddey s’ooasle.