1 Corinthianee 11 - Yn Conaant Noa 1810

CAB. XI

¹ Eiyr‐jee shiuish orrym’s, dy jarroo myr ta mish myrgeddin er Creest.

² Nish ta mee moylley shiu, vraaraghyn, dy vel shiu cooinaghtyn orrym ayns dy chooilley nhee, as freayll ny oardaghyn myr livrey mee ad diu.

³ Agh baillym shiu dy hoiggal dy nee Creest kione dy chooilley ghooinney; as y dooinney kione e ven; as dy nee Jee kione Chreest.

⁴ Dy chooilley ghooinney ta jannoo padjer ny phadeyrys, as e chione coodit, t’eh naaraghey eh chione.

⁵ Agh dy chooilley ven ta goaill padjer ny jannoo phadeyrys, as e kione rooisht, t’ee naaraghey e kione: son ta shen yn un chooid as dy beagh ee er ny ve baarit.

⁶ Son mannagh vel coodagh er y ven, lhig j’ee chammah ve baarit: agh my te nearey da ben dy ve baarit ny shavit, lhig da coodagh ’ve urree.

⁷ Er son y dooinney dy jarroo cha lhisagh eh e chione y choodaghey, ayns wheesh as dy vel eh co‐chaslys as gloyr Yee: agh ta’n ven gloyr y dooinney.

⁸ Son cha row yn dooinney veih’n ven: agh y ven veih’n dooinney.

⁹ Chamoo va’n dooinney er ny chroo son y ven: agh y ven son y dooinney.

¹⁰ Son yn oyr shoh lhisagh v’ec y ven coodagh er e kione, er coontey ny ainleyn.

¹¹ Ny yeih, cha vel y dooinney fegooish y ven, chamoo ta’n ven fegooish y dooinney ayns y Chiarn.

¹² Son myr va’n ven veih’n dooinney, myr shen dy jarroo ta’n dooinney liorish y ven: agh ta dy chooilley nhee veih Jee.

¹³ Jean‐jee hene briwnys; vel eh jesh da ben dy yannoo padjer gys Jee as y kione eck gyn coodagh?

¹⁴ Nagh vel eer dooghys hene gynsaghey shiu, my ta dooinney ceau e olt gys lhiurid, te nearey da?

¹⁵ Agh my ta folt liauyr er ben, te stooamid j’ee: son ta’n folt eck er ny choyrt j’ee son coodagh.

¹⁶ Agh my saillish dooinney erbee ve streeuagh, cha vel lheid y cliaghtey ain, ny foast ec kialteenyn Yee.

¹⁷ Nish ayns y red shoh ta mee dy hoilshaghey diu, cha vel mee dy voylley shiu; dy vel shiu cheet cooidjagh, cha nee son ny share agh son ny smessey.

¹⁸ Son hoshiaght ooilley, tra ta shiu cheet cooidjagh ayns y cheeill, ta mee clashtyn dy vel streeuaghyn nyn mast’ eu; as ayns ayrn ta mee credjal eh.

¹⁹ Son shegin da myrgeddin shaghrynys veih’n chredjue ve ny vud eu, dy vod adsyn ta firrinagh ayns y chredjue v’er nyn gronnaghey nyn mast’ eu.

²⁰ Tra ta shiu cheet cooidjagh er‐y‐fa shen gys un voayl, cha vel eh dy ee shibber y Chiarn.

²¹ Son ec gee, ta dagh unnane goaill roish fer elley e hibber hene: as ta fer accryssagh, as ta fer elley er n’iu dy palchey.

²² Cre, nagh vel thieyn eu dy ee as dy iu ayndoo? ny nee beg ta shiu soiaghey jeh keeill Yee, as naaraghey adsyn nagh vel thieyn oc? Cre nee’m y ghra riu? jeanym shiu y voylley ayns shoh? Cha vel mee moylley shiu.

²³ Son ta mish er n’gheddyn veih’n Chiarn shen ta mee myrgeddin er livrey diuish, Dy ren y Chiarn Yeesey, yn oie cheddin ayn v’eh er ny vrah, arran y ghoaill:

²⁴ As tra v’eh er choyrt booise, vrish eh eh, as dooyrt eh, Gow‐jee, ee‐jee; shoh my chorp’s t’er ny vrishey er nyn son eu: jean‐jee shoh ayns cooinaghtyn jeem’s.

²⁵ Er yn aght cheddin neesht ghow eh yn cappan, tra v’eh erreish shibber, gra, She’n cappan shoh yn conaant noa ayns my uill’s: shoh jean‐jee, cha mennick as iu‐ys shiu eh, ayns cooinaghtyn jeem’s.

²⁶ Son cha mennick as ee‐ys shiu yn arran shoh, as iu‐ys shiu yn cappan shoh, ta shiu soilshaghey magh baase y Chiarn derrey hig eh.

²⁷ Shen‐y‐fa, quoi‐erbee ee‐ys yn arran shoh, as iu‐ys y cappan shoh jeh’n Chiarn dy neu‐feeu, bee eh oolee jeh corp as fuill y Chiarn.

²⁸ Agh lhig da dooinney eh hene y eysht; as myr shen lhig da gee jeh’n arran shen, as giu jeh’n chappan shen.

²⁹ Son eshyn ta gee as giu dy neu‐feeu, t’eh gee as giu kerraghey da hene, fegooish cur tastey da corp y Chiarn.

³⁰ Son yn oyr shoh ta ymmodee annoon as doghanagh ny vud eu, as ymmodee nyn gadley.

³¹ Son dy jinnagh shin shin‐hene y vriwnys, cha beagh shin er nyn mriwnys.

³² Agh tra ta shin er nyn mriwnys, ta shin er nyn smaghtaghey liorish y Chiarn, dy vod mayd gyn ve deyrit marish y seihll.

³³ Shen‐y‐fa, my vraaraghyn, tra ta shiu cheet cooidjagh dy ee, fuirree‐jee yn derrey yeh son y jeh elley.

³⁴ As my ta dooinney erbee accryssagh, lhig eh gee ec y thie; nagh jig shiu cooidjagh gys deyrey. Er son reddyn elley nee’m ad y oardrail tra hig‐ym.