1 Corinthianee 1 - Yn Conaant Noa 1810

CAB. I

¹ Paul eït dy ve Ostyl Yeesey Creest, liorish aigney Yee, as Sosthenes nyn mraar.

² Gys agglish Yee ta ec Corinth, hucsyn t’er nyn gasherickey ayns Creest Yeesey, er nyn eam dy ve nyn nooghyn mâroosyn ooilley ta ayns dy chooilley ynnyd geamagh er ennym Yeesey Creest, chammah yn Chiarn ocsyn as ainyn.

³ Grayse dy row hiu, as shee veih Jee nyn Ayr, as veih yn Chiarn Yeesey Creest.

⁴ Ta mee cur booise da my Yee dy kinjagh ayns y lieh eu, son grayse Yee t’er ny choyrt diu ayns Yeesey Creest;

⁵ Son dy vel shiuish ayns dy chooilley nhee dy palchey er nyn yannoo magh liorishyn ayns dy chooilley ghlare, as ayns dy chooilley hushtey;

⁶ Dy jarroo myr va recortys Chreest er ny hickyraghey ny vud eu:

⁷ Myr shen nagh vel shiu cheet er‐gooyl ayns gioot erbee; farkiagh son cheet y Chiarn Yeesey Creest;

⁸ Nee myrgeddin shiuish y niartaghey gys y jerrey, dy vod shiu ve gyn loght ayns laa nyn Jiarn Creest.

⁹ Ta Jee firrinagh, liorish va shiu er nyn eam gys sheshaght e Vac Yeesey Creest nyn Jiarn.

¹⁰ Nish ta mee guee erriu, vraaraghyn, liorish ennym nyn Jiarn Yeesey Creest, dy bee shiu ooilley er yn un ockle, as nagh bee streeuaghyn ny mast’ eu; agh dy bee shiu sniemmit cooidjagh ’syn un aigney, as ’syn un smooinaght.

¹¹ Son te er ny ve soilshit dooys mychione eu, my vraaraghyn, lioroosyn jeh lught‐thie Chloe, dy vel streeuaghyn nyn mast’ eu.

¹² As shoh ta mee dy ghra, dy vel fer as fer j’iu gra, Ta mish son Paul, as mish ’son Apollos, as mish son Cephas, as mish son Creest.

¹³ Vel Creest er ny rheynn [ayns ayrnyn]? row Paul er ny chrossey er ny son eu? ny row shiu er nyn mashtey ayns ennym Phaul?

¹⁴ Ta mee cur booise da Jee, nagh ren mee veg eu y vashtey, agh Crispus as Gaius:

¹⁵ Nagh beagh oyr ec fer erbee dy ghra, dy vasht mee ayns m’ennym hene.

¹⁶ As ren mee bashtey myrgeddin lught‐thie Stephanas: erlhim‐mey jeu shoh, cha s’aym vasht mee unnane erbee elley.

¹⁷ Son cha row eh [wheesh] er my churrym veih Creest dy vashtey, as dy phreacheil yn sushtal: cha nee lesh creenaght goan, er‐aggle dy beagh crosh Chreest gyn veg y vree.

¹⁸ Son ta preacheil y chrosh ommijys dauesyn ta cherraghtyn; agh dooinyn t’er nyn sauail te pooar Yee.

¹⁹ Son te scruit, Ver‐yms mow creenaght y vooinjer chreeney, as ver‐ym lhiam gys veg keeayll y vooinjer cheeayllagh.

²⁰ Cre vel y dooinney creeney? cre vel y scrudeyr? cre vel plea‐deyr y theihll shoh? nagh vel Jee er n’yannoo creenaght y theihll shoh dy ve ommijys?

²¹ Son fakin, ayns creenaght Yee, nagh dug y seihll liorish creenaght enney er Jee, ve aigney Yee liorish ommijys preacheil dy hauail adsyn ta credjal.

²² Son ta ny Hewnyn shirrey cowrey, as ny Greekyn jeeaghyn son creenaght:

²³ Agh ta shinyn preacheil Creest v’er ny chrossey, da ny Hewnyn, scammylt, as da ny Greekyn, ommijys;

²⁴ Agh dauesyn t’er nyn eam, chammah Hewnyn as Greekyn, Creest pooar Yee, as creenaght Yee.

²⁵ Son ta shen t’adsyn genmys ommijys Yee ny s’creeney na deiney; as annooinid Yee ny s’troshey na deiney.

²⁶ Son ta shiu fakin, vraaraghyn, cre gys ta shiu er nyn eam, kys nagh nee ymmodee deiney creeney lurg yn eill, nagh nee ymmodee deiney pooaral, nagh nee ymmodee deiney ooasle t’er nyn eam.

²⁷ Agh ta Jee er reih reddyn ommijagh y theihll, dy choyrt fo chosh ny reddyn creeney; as ta Jee er reih reddyn faase y theihll, dy naaraghey ny reddyn niartal;

²⁸ As reddyn fardalagh y theihll, as reddyn nagh vel soiagh jeant jeu, ta Jee er reih, as reddyn nagh vel, dy chur mow ny reddyn t’ayn:

²⁹ Nagh jinnagh dooinney erbee boggyssagh ayns yn enish echeysyn.

³⁰ Agh jehsyn ta shiuish ayns Creest Yeesey eshyn ta liorish Jee er ny yannoo dooinyn creenaght, as cairys, as casherickys, as livrey‐ys:

³¹ Son, myr te scruit, Eshyn ta boggyssagh, lhig da boggyssagh, ayns y Chiarn.