Zacarías 8 - Cofán: Chiga Tevaen'jen

Na'su Chiga ñotsse tsoña'cho

¹ Qquen tsu Na'su Osha'choma Oshacho'cho Chigaja ñama su:

² “Qquen gi ña, Na'su Osha'choma Oshacho'cho Chigaja su: Ñoa'me gi Zión ccotta'ccoma ñotsse in'jamba se'pipa tsave ñombi'ye.

³ Ñombi'ye gi ccase tseni japa can'jeñe. Tseni can'jensi tsu Jerusalénma afa'faya Chigama Paña'jen'cho canqque. Toya'caen tsu Na'su Osha'choma Oshacho'cho Chiga can'jen'cho ccotta'ccoma afa'faya Chigambe ccotta'cco.

⁴ Nane tsequi a'ta ccasheyendeccu ccashendeccu'qque poiyi'cco tise'pa accuicco'choi'ccu jacamba Jerusaléni'su atandundunga ccase avujatsse dyaipa condase'je'faya.

⁵ Toya'caen tsu tsandie, pushesu dushundeccu'qque tsa canqque'su atandunduni dyombi'tsse cofe'je'faya.

⁶ Nane tsequi a'ta tsu toya Jerusaléni can'jensundeccu ‘Tsa'caen tsoñe oshaya'bi’ qquen in'jan'choja atteyeya. Tsa'ma ña Na'su Oshachoma Oshacho'cho gi ai'yembe tsa'caen tsoñe oshapa que'ima su:

⁷ Ña aindeccuma gi ccushaeña chiga sombo'jeni'su ande'ye, chiga amppi'jeni'su ande'ye'qque.

⁸ Tise'pama ccushaemba gi Jerusaléni iya cuintsu vani can'jen'faye. Vani can'jemba ñoa'me ña aindeccuve da'fasi gi ñajan tise'pa Chigave dapa tise'pama ñotsse in'jamba ñotsse mandaya.”