Zacarías 12 - Cofán: Chiga Tevaen'jen

Jerusalén ccusha'cho

¹ Va tsu Na'su Chiga Israelne su'cho. Nane Na'suja sefaccove attajaenqquia'caen agattoemba andeve'qque ccuiñaqquia'caen agattoen. Toya'caen tise qquendya'pai'ccu a'ima qquendyaemba cansian. Tsa agattoemba cansian'su tsu tansintsse qquen conda:

² “Pporotsse canjen'su aindeccu tise'pa sundarondeccui'ccu Jerusalén, toya'caen faesu Judá'su canqquema shoquendi ttupa ronda'je'fasi gi vinoi'ccu a'ima ccusianqquia'caen Jerusaléni'ccu tsendeccuma vanaeña.

³ Toya'caen gi tsequi a'ta Jerusalénma tssai'a patiacaen tsoña. Nane majan patu tssai'ama joqquitssiañe oshambiqquia'caen tsu poi ande'su sundarondeccu ji'a'qque Jerusalénma geraemba patsuye oshambipa tisuma daño'faya.

⁴ Tsequi a'ta poiyi'cco tise'pa cavayoma dyoñamba gi tsani dyai'suma'qque sumbie tsoña. Nane Judá aindeccuma ñotsse coirapa gi tise'pai'ccu iyiccosundeccumbe cavayoma bini'e tsoña.

⁵ Ña tsa'caen tsonsi tsu Judá nasundeccuja su'faya: ‘Na'su Osha'choma Oshacho'cho Chigaja Jerusaléni canjen'su aindeccuma quiñaemba tise'pa Chiga tsu.’

⁶ Toya'caen tsequi a'ta gi Judá'su nasundeccuma si'ngia'caen tsoña. Nane chipiri si'ngei'ccu si'tsima setsaemba trigo boña'choma'qque oque sefaenqquia'caen tsu Judándeccuja tansinfanga pavefanga'qque poi pporotssia'su aindeccuma sefaen'faya. Tsa'ma Jerusalén aindeccuja joqquitssi'masia tsu.

⁷ “O'tie ña, Na'su, poi faesu Judándeccuma ccushaemba gi omboe Jerusaléni canjensundeccuma ccushaeña. Nane in'jambi gi Jerusaléndeccu, David omba'su dutssiyendeccu'qque tisupanaccu quinsepoemba afaseye.

⁸ Ña, Na'su, gi Jerusaléni canjensundeccuma ñotsse coiraya. Majan ñoa'me oshambi'choa tsu tayopi'su na'su David'caen quin'anme da'faya. Toya'caen David omba'su dutssiyendeccu tsu Chiga'caen, Na'su Chigama sefacconi'su shondo'sia'caen aindeccuma angacan'faya.

⁹ Nane tsequi a'ta gi majan aindeccu Jerusalénma geraemba patsuye in'jan'chondeccuma metsse sefaeña.

¹⁰ “Toya'caen gi Jerusaléni can'jensundeccu, David omba'su dutssiyendeccunga'qque cuna qquendya'pama moeña cuintsu ñotsse in'jamba ñanga iñajan'faye. Tsa'caen tsonsi tsu tise'panga quiccuye'choma atte'faya. Tisema attepa tsu i'na'faya du'shu fae'ccoa pasi i'naqquia'caen. Nane aisheve isu'cho dutssi'ye pasi i'naqquia'caen tsu ñombi'yepa i'na'faya.”