Salmos 91 - Cofán: Chiga Tevaen'jen

Na'su ingima coira'su

¹ Majan a'i Osha'choma Oshacho'cho Chigai'ccu can'jen'da tsu Ñoa'me Joccapitssia Chigambe tumbianccunga ño'faya.

² Ña gi Na'sune afapa qquen suya: “Tiseja ñama coira'supa ña ta'etssia tsa'oa'can tsu. Ña Chiga tsu, ñama ñotsse'yi tson'su.”

³ Ñoa'me tsu tiseja quema ccushaeña cca'i quema indisa'ne. Quema tsu ega paqque'su'ye ccushaeña.

⁴ Nane arapa tise sanccopai'ccu du'shuma piccoqquia'caen tsu tiseja quema coiraya. Tise sanccopa tsosiccuni can'jensi tiseja ñotsse'yi quema tsomba quema piccoqquia'caen a'tupa an'biaña.

⁵ Tsa'cansi qui cose dyombe jacansi a'ta'qque battittianccu ja'cho quema deya'bi.

⁶ Paqque'su'qque sinttia'ye tta'ttaqquia'caen quenga setsaye oshambi ni a'ta'su'qque catseya'bi.

⁷ Nane mil a'i setsayepa que pavefanga pa'fa'ni'qque queja ccushaya. Toya'caen diez mil que tansifanga amppi'fa'ni'qque quengaja catseya'bi.

⁸ Vanambe'yi aqquia tso'fei'ccu camba qui egae tsinconsundeccu vana'jen'choma atteya.

⁹ Nane Na'su Chigai'ccu can'jensi Joccapitssia quema coira'jesi

¹⁰ jongoesu ega'ja ccatsse quema patsuye oshaya'bi. Toya'caen jongoesu paqque'su'qque que tsa'onga ca'niña'bi.

¹¹ Nane Na'suja tisema sefacconi'su shondosundeccuma mandaya cuintsu mani que jacan'ni'qque coira'je'faye.

¹² Tise'pa tivei'ccu quema opipa ñotsse coira'faya que tsu'tte patunga iñaccasa'ne.

¹³ Ttesi can'jen'ttinga jacamba tsambi'ta canjansiacan'nga japa toya'caen iyonga tsui'a'qque qui vanaña'bi.

¹⁴ Nane Na'suja su: “Tise ñama ñotsse in'jansi gi tisema ccushaeña. Tise ñame in'jansi gi coiraya cca'i tisema dañosa'ne.

¹⁵ Ñama iñajansi gi pañamba afaya. ¡Nane ña gi tisei'ccu can'jeña! Tise injama'choma gi vuiquiaña cuintsu opatsse can'jeñe. Toya'caen gi tisema ñotssiave tsoña.

¹⁶ Nane tisema ccushaemba gi bo'tsse canseya'chove antteya cuintsu avujatssiye.”