Salmos 89 - Cofán: Chiga Tevaen'jen

Chiga Davidi'ccu injancco'fa'cho

¹ Na'su, tsangae gi que ingima ñotsse in'jan'chone settapoen'jeña. Queja que tansintsse suqquia'caen ño'ame tsonsi gi anttembe'yi ña aya'fai'ccu tsane condase'jeya.

² Tsangae que ingima ñotsse in'jansi sefacco cambiambiqquia'caen que tansintsse su'cho'qque cambian'masia. Tsane gi a'tatsse condaya.

³ Davidi'ccu fae'ngae injancco'fa'choma afapa qui tsa que in'jan'cho shondo'sui'ccu qquen tansintsse su:

⁴ “Que omba'su dutssiyendeccunga gi tsoña cuintsu tsangae na'suve dapa quia'caen que manda'choma manda'faye.”

¹⁹ Tayopi queja queve in'jan'cho shondosundeccunga attiamba conda: “Ñambeve gi ña aindeccu'su dyombi'tssia tsandie chu'ama ttu'se. Ttu'sepa gi tisema fuitepa joccapitssia've tson.

²⁰ ¡Attepa gi ttu'se ñama shondo'su Davidma! Ttu'sepa gi ña ñotssia aseitei'ccu tise tsovenga fiñamba na'suve tson.

²¹ Minga'ni'qque ña tisema fuite'je'choja shacaya'bi. Nane ña quin'sui'ccu gi tisema quiñaeña.

²² Tisema iyiccayesundeccu'qque tisema geraen'faya'bi. Egae tsinconsundeccu'qque tisema patsu'faya'bi.

²³ Nane tisema iyiccayesundeccuma gi ccuchaya. ¡Minguite tsu tsendeccuma ccase tiseja atteya! Tisema chi'gasundeccuma'qque gi sefaeña.

²⁴ Ña tisema in'jan'cho, ña tisei'ccu can'jen'chove'qque injan'jemba tsu ti'tsse quin'an manda'suve daya.

²⁵ Ña anttesi tiseja Mediterráneo mar'ye Eufrates na'enga pa'cco andema an'biamba mandaya.

²⁶ Tiseja ñama suya: ‘Queja ña yaya. Nane queja ña Chiga, ñama ccushaen'su. Ñama coira'su qui.’

²⁷ Tsa'caen susi gi dutssi'ye coenzanga antte'choma tisenga antteya cuintsu tiseja poi ande'su nasundeccuma ti'tsse'tsse daya.

²⁸ Tsangae tisema ñotsse in'jamba gi Ña tisei'ccu injancco'fa'choma cambiaña'bi.

²⁹ Tise pasi tise dutssiyendeccuja tise manda'je'choma manda'faya. Nane sefacco toya jin'ninda tsu toya tise dutssiyendeccu'qque can'jemba manda'je'faya.

³⁰ Tsa'ma tise dutssiyendeccu ña nafattiamba manda'choma chi'gapa ccaningae cansepa,

³¹ toya'caen ña mandapa su'choma shacapa ñoa'me pañambipa tson'fambi'ninda gi

³² tise'pa injama'choma somboemba quini'ccoi'ccu ma'ppiqquia'caen tise'pa egae tsincon'chone tise'pama vanaeña.

³³ Tsa'ma tsa'caen tson'an'qque anttembe'yi gi David aindeccuma toya ñotsse injan'jeña. Antteya'bi gi tise'pama coira'je'choma.

³⁴ Ña tise'pai'ccu injancco'fa'choma catiya'bi ni ña tise'panga su'choma ccaningae tsoña'bi.

³⁵ Nane tsangae ñotssiapa gi fae seyi ñoa'me su'chove tsangae afapa David aindeccunga afopoeña'bi.

³⁶ Tise omba'su dutssiyendeccu tisia'caen tsangae manda'faya qquen susi tsa'caen tsu tson'faya. Nane coejechiga tsangae chanjunqquia'caen tsu tise dutssiyendeccuja tsangae mandapa chanjun'faya.

³⁷ Cose'suchiga tsangae chanjunqquia'caen, toya'caen sefacco tsangae jinchoqquia'caen tsu tsangae manda'faya.”