Salmos 82 - Cofán: Chiga Tevaen'jen

Na'su Chigaja Ñoquian'su tsu

¹ Chigaja sefacconi'su nasundeccui'ccu can'jemba ti'tsse joccapitssiapa tise'pama tansiañe qquen su:

² “¿Minga'ni qui jova'caen egae afa'je'choma antte'faya? ¿Tsangae ti qui egae tsinconsundeccuma fuite'je'faya?

³ ¡Yayamendeqquia'ma, quin'su me'choa'ma'qque ñoquiamba tise'pane tansintsse afa'faja! ¡Va'chandeccuma, noñangiañesundeqquia'can'ma'qque ñoquiamba tise'pane tansintsse afa'faja!

⁴ ¡Quin'su me'choa'ma, va'chandeqquia'can'ma'qque ccushaen'faja! ¡Tise'pama fuite'faja egae tsinconsundeccu noñangiamba dañosa'ne!

⁵ Tsa'ma que'ija ñoa'me atesumbipa injama'choni in'jambipa sinttia'ni jacanqquia'caen injanga canse'fa. Nane dyaiña'cho congonsi tsa'o osuiqquia'caen qui aindeccuma da'ño'fa.

⁶ Que'ija ‘chigandeccu’ qquen gi su. ñoa'me Sefacconi'su Joccapitssiambe dushundeccu qui.

⁷ Tsa'ma que'ija poi a'ia'caen pa'faya. ¡Poi na'su paqquia'caen que'i'qque pa'faya!”

⁸ ¡Chiga Quitsa, jangipa va ande'su aindeccuma ñoquiamba tise'pane tansintsse afaja! ¡Que qui ñoa'me poi ande'su Na'su!