Salmos 8 - Cofán: Chiga Tevaen'jen

Chiga a'ima in'jan'cho

¹ ¡Na'su ingi Chiga, poi andeni ti'tsse'tssia tsu que iniseja! Nane pa'cco sefaccoma ti'tsse joccapitssia qui queja.

² Que anttesi tsu dushunaccu, nane toya chocho'jendeccu'qque quema avujatsse afa'fa. Tsa avujatsse afa'choi'ccu qui quema afasesundeccuma patsu. Nane sundaro ttuccunga ca'ni'masia've ñoñaqquia'caen qui quema chigasundeccuma patsu.

³ Sefaccoma camba gi atte que agattoen'choma. Nane cose'suchiga, o'fe'qque que agattoen'cho tsu. Tsama attepa gi qquen in'jan:

⁴ ¿Jongoesu tsu va ande'su a'ija? ¿Jongoesune qui tisema injan'jen? ¿Jongoesu tsu va ande'su tsandieja? ¿Jongoesune qui tisema in'jamba coira'je?

⁵ Nane re'riccone qui quema sefacconi'su shondosundeccuma utu'ccoa've a'ima tson. Tsa'ma tsa'caen tsomba qui tisenga otifaenqquia'caen ñotsse afapa ti'tsse'tssia na'suve tson.

⁶ Toya'caen qui tisema ccutsian pa'tssi que agattoen'choma mandaye. Nane tiseja osha'chone na'su tsu.

⁷ Pa'cco oveja, pa'cco sema'su vaura, pa'cco tsampini jacanqque'su'qque tisema paña'fa.

⁸ Pa'cco sefacconi chhajeqque'su, pa'cco na'eni canseqque'su'qque tisema paña'fa.

⁹ ¡Na'su ingi Chiga, poi andene tsu que iniseja ti'tsse'tssia!