Salmos 78 - Cofán: Chiga Tevaen'jen

Chiga israendeccuma angacan'cho

¹ Ña aindeccu, ña atesian'jen'choma paña'faja. Que'i tsosinama fetta'faja ña su'choma pañañe.

² Condase'choi'ccu gi condasepa atesiaña. Andema agattointene condambi'choama gi ja'ño condaya.

³ Tsa'ma ingi yayandeccu tayo condasesi gi pañamba in'jan'fa.

⁴ Toya'caen anttembe'yi gi Na'su ñotsse tson'jen'choma ingi dushundeccunga atesian'jen'fa cuintsu tsendeccu'qque tise'pa dushundeccunga atesian'faye. Tsa'caen tsonsi poiyi'cco tsu Na'suja osha'choma oshacho'cho qquen atesupa tisema ñotsse afa'faya.

⁵ Chigaja tise manda'choma Jacob aindeccunga conda. Nane israendeccunga tsu conda ma'caen ñotsse canseya'chove. Tsa'caen condapa ingi tayopisundeccunga manda cuintsu tise'pa dushundeccunga tsama atesian'faye.

⁶ Tise'panga atesiaña'cho cuintsu tise'pa'qque dushundeccunga tsama atesiansi toya isuyembindeqquia'qque jai'ngaeja tsama paña'faye. Nane jai'ngaeja tsendeccu'qque tise'pa dushundeccunga atesiaña'cho.

⁷ Tsa'caen jai'ngae isuye'chondeccu'qque Chigave in'jamba tise tson'jen'choma aqque'pambe'yi tsangae tise manda'choma pañamba canse'faya.

⁸ Tsa'caen in'jamba cansepa tise'pa tayopisundeqquia'can'faya'bi. Nane tise'pa tayopi'su coenzandeccuja tsosinai'ccu pañambipa injama'choni'qque in'jambipa Na'su Chiga in'jan'chove tson'fambi.

⁹ Tayopi israe'su Efraín sundarondeccuja battittianccui'ccu geraen'jemba dyopa sepaccopa buttoccoin ja'fa.

¹⁰ Chiga tise'pai'ccu condasecco'choma catipa tise manda'choma'qque pañambipa in'jangae canse'fa.

¹¹ Na'su tson'choma aqque'papa tise canjaen'choma'qque aqque'pa'fa.

¹² Nane tise'pa yayandeccu can'jeinte Chigaja osha'choma tise'panga canjaen. Egipto andeni'su Zoáni tsa'caen tsomba

¹³ marma'qque samboemba manda cuintsu israendeccu tsangae panshañe. Nane pavefani, tansinfani, mar tsa'ccu ttuqquia'caen ccutsu'ni panshan'fa.

¹⁴ A'tanijan unjimba'ccoi'ccu fuitepa canjaen'jen maningae ja'faya'chove. Cose'qque si'ngei'ccu sefane chanjiemba canjaen'jen.

¹⁵ A'i menia'su patuvo'choma'qque doñamba inján'tssia tsa'ccuma somboen cuintsu poiyi'cco a'i cu'i'faye.

¹⁶ ¡Nane patu'ye Chigaja na'eme somboensi quian'me ai'je!

¹⁷ Tsa'caen atte'ma tsu toya egae tsincomba a'i menia can'jemba Joccapitssia Chigama pañambipa cati'fa.

¹⁸ Iyicca'yepa Chigama atesucañe in'jamba dyombi'tsse tise'pa in'jan'cho anqque'suve iñajan'fa.

¹⁹ Na'suma afasepa qquen su'fa: “¿Chigaja oshaya ti anqque'suma va a'i menia inginga afeye?

²⁰ Nane tansintsse Chigaja fattoccoma doñasi tsa'ccuja na'en'caen sombo. Tsa'ma ¿oshaya ti panme inginga afeye? ¿Oshaya ti aña'choma tise aindeccunga afeye?”

²¹ Na'su Chigaja tsama pañamba ñoa'me iyicca'ye. Si'nge anchandenqquia'caen iyicca'yepa Jacob aindeccuma si'ngei'ccu oque cati.

²² Nane israendeccuja Chigave in'jambipa tise fuiteye in'jan'chove'qque in'jan'fambisi tsu tsa'caen oque cati.

²³ Tsa'ma Chiga sefaccoma mandasi sefaccoja fettayepa

²⁴ unjin tuiqquia'caen panma shequian moe. Tsa manáma moe cuintsu tise aindeccu an'faye.

²⁵ ¡Nane a'i tsu Chigama sefacconi'su shondosundeccu anqque'suma an'jen'fa! ¡Nane Chigaja tsama afe cuintsu an tteppu'faye!

²⁶ Coejechiga sombo'jeni'su fingiama mandapa Chigaja tise quin'sui'ccu mar'ye fingiañe mandasi ji.

²⁷ Nane unjin tuiqquia'caen aña'choja tise aindeccunga amppi. ¡Unjin tuiqquia'caen tsu yayapa chivi'rija agattoye osha'bi'tsse amppi'fa!

²⁸ Aindeccu can'jen'tti enttingenga amppipa tise'pa carpa tsa'oma itoyetsse amppi'fa.

²⁹ Amppisi aindeccuja taipa pan'shantsse an tteppu'fa. ¡Nane Chiga tsu tise'pa iñajan'choma tise'panga afe!

³⁰ Tsa'caen tise'pa iñajan'choma toya pasambi'tsse an'jemba toya tise'pa aya'fani aña'choma tsai'je'ni

³¹ Chiga iyicca'ye'choja tise'panga pporo. Nane Chigaja iyicca'yepa tise'pa'su ti'tsse quin'andeccuma fitti'tti. ¡Israe'su ti'tsse joccapindeqquia'ma fitti'tti!

³² Tsa'ma Chiga tsa'caen tson'ni'qque tise canjen'choma in'jambipa toya tsu aindeccuja egae tsincomba canse'fa.

³³ Tsa'cansi tsu Chigaja tise'pa canse'choma uta'tsse naniamba dyoqque'sui'ccu tise'pa can'jen'choma noñangian.

³⁴ Chiga tsa'caen tise'pama fi'tti'jesiyi tsu tsequi a'ta tise've tta'tta'fa. Nane anttembe'yi tise've ccase ttatta'je'fa.

³⁵ Tsequi a'ta tsu tise'pama ccushaemba coira'su Sefacconi'su Chigave in'jan'fa.

³⁶ Tsa'ma tsa'caen tise'pa aya'fai'ccu Chigama ñotsse afapa ñoa'me afopoen'fa.

³⁷ Tsa'caen ñotsse afa'a'qque injama'cho tsosipie toya in'jambipa tisei'ccu injancco'fa'choma'qque toya chi'ga'fa.

³⁸ Tsa'ma Chigaja toya tise'pama mendeye'jepa tise'pa egae tsincon'cho shacama joqquitssian. Tise iyicca'ye'choma'qque aqque'papa tise'pama fi'ttimbi. Nane ccase, ccase ñoquisi tise ñoa'me iyicca'ye'choja pasa.

³⁹ Aqquia injama'cho shaca'cho aindeccu tsu qquen in'jamba ñoqui. Nane fingian fingiamba shandambitsse jaqquia'can tsu a'ija.

⁴⁰ A'i menia can'jemba tise'pa in'janqquia'caen tsain'bitsse tsomba Na'su Chigama pañambipa tisema ñoquimbian'fa.

⁴¹ Injanga tson'ñaccapa Chiga iyicca'yepa tson'jen'chove atesu'fa. Tsa'caen tsomba Israel Ñotssia Joccapitssia Chigama ñoquimbian'fa.

⁴² Osha'choma Oshacho'cho Chiga tise'pama ccushaen'cho a'tama aqque'pa'fa.

⁴³ Nane Egipto'su Zoán andeni osha'cho canjaen'choi'ccu tise'pai'ccu iyiccosundeccuma patsu'choma'qque aqque'pa'fa.

⁴⁴ Tseni na'en'su tsa'ccuma anjampaveyi tsonsi egiptosundeccuja tsama cui'ye osha'fambi.

⁴⁵ Tenqquen'cho, sapoma'qque moesi osha'choma an sefaen'fa.

⁴⁶ Tise'pa nasipa'suma tise'pa taiya'choma'qque ttombunga afe cuintsu an'faye.

⁴⁷ Tise'pa tsajaccuma'qque tsandapandaqui'ccu dañomba sefaen. Higoma'qque tsa'caen da'ño.

⁴⁸ Toya'caen tsandapandaqui tise'pa aiña'cho vaura, ovejama'qque fitti'ttisi tsanda veyaen'cho'qque faesuma oquepa fitti'tti.

⁴⁹ Nane Chigaja ñoa'me iyicca'yepa tsa'caen tise iyicca'ye'choma canjaemba tise'pama noñangiamba vanae. Tisema sefacconi'su shondosundeccuma'qque moesi tsa'caen egiptosundeccuma vanaemba fittitti'fa.

⁵⁰ Anttembe'yi Chigaja tise iyicca'ye'choma canjaen. Tise'pa paye se'pimbipa vanamba paqque'suma moe tise'pama fi'ttiye.

⁵¹ Tsa paqque'sui'ccu poiyi'cco Egipto'su aisheve isuye'chondeccuma fi'tti. Nane Egipto aindeccu'su in'jan'cho dusungandeccuma sefaen.

⁵² Tsa'ma tise aindeccuma ovejama angacanqquia'caen Egipto'ye somboemba a'i menia angacamba coira'je.

⁵³ Ñotsse coirapa angacansi dyombe'yi jaja'fa. Tsa'ma tisema mandiansundeccuja pa'fa, na'en tise'pama piccosi.

⁵⁴ Chigaja tsa'caen tise aindeccuma angacamba tise ñotssia ande'su utufanga tise'pama i. Tise patsupa isu'cho ande'su ccotta'cconga tise'pama i.

⁵⁵ Ipa israendeccu ca'nisi tseni can'jensundeccuma joqquitssian mañamba tise'pa andema israendeccunga afe. Yaya tise dutssiyendeccunga afeqquia'caen tsa andema attufaemba afe cuintsu israe'su aindeccu cca'tti, cca'tti canqquiamba can'jen'faye.

⁵⁶ Tsa'ma ccase injanga tson'jen'fa Chiga tsoña'chove atesuye. Joccapitssia Chigama pañambipa tise'pa in'janqquia'caen tson'fa. Na'su manda'choma chi'gapa tsa'caen tson'fambi.

⁵⁷ Tise'pa tayopi'su coenzandeccu tsonqquia'caen Chigama catipa tise've in'jan'fambi. Battittianccu tansintsse battiañembiqquia'caen tise'pa tsoña'choma tansintsse tson'fambi.

⁵⁸ Chigama iyicca'yean'fa faesu chiga'candeqquiama iñajaña'ttive ñoñamba. Ñoña'cho chigandeccuve'qque ñoñamba iñajan'fasi Na'suja chi'gapa se'pi.

⁵⁹ Aindeccu tsa'caen tsonsi Chigaja attepa iyicca'yepa pa'cco Israelma cati.

⁶⁰ Catipa Siloni tise a'i'ccu can'jen'tti'ye sombo. Nane aindeccu Na'suma iñajan'jen'tti'su carpa tsa'o'ye sombo.

⁶¹ Sombopa antte cuintsu Israelma iyiccayesundeccu Chiga a'i'ccu fae'ngae injancco'fa'chove canjaen'cho cafonma itsa'faye. Nane tise Ñotssiama, tise Quin'suma'qque indipa tsa cafonma angaya'chove antte.

⁶² Nane tise aindeccuma ñoa'me iyicca'yepa antte cuintsu tise'pama iyiccayesundeccu sundaro matichi'ccu tise'pama fitti'tti'faye.

⁶³ Si'ngenga tsandie dusungandeccuja pa'fa. Nane tsandu'je'fasi settapoen'jen'chove zi'yatssi tsu.

⁶⁴ Sundarondeccu matichi'ccu Chigama afasundeccuma fi'ttisi tsandupajen'chondeccu'qque tise'pane i'nañe osha'fambi.

⁶⁵ Tsa'ma Na'suja anamba qquendyaqquia'caen tisema iyiccayesundeccuma patsu. Nane quin'an sundaro ccusipa qquendyapa in'janqquia'caen

⁶⁶ Na'suja tisema iyiccayesundeccuma patsusi ccuyin ja'fa. ¡Tsangae tsu tise'pama ansangian!

⁶⁷ Toya'caen José aindeccuma pasaemba tise dutssi'ye Efraín'su a'ima na'suve tsombi.

⁶⁸ Tsa'ma Judá'su aindeccuma in'jamba tise in'jan'cho Zión ccotta'ccoma'qque in'jan.

⁶⁹ Nane andema agattoemba tsangae ñoñaqquia'caen se'fatssia ccotta'ccoa'ca'en tisema iñajan'je'ttima'qque tsangae ccutsian.

⁷⁰ Toya'caen tise in'jan'cho shondo'su Davidma in'jamba ovejama coira'su sema'ba'ye tisema somboen.

⁷¹ Somboemba mandasi Davidja ti'tsse ovejama angacambipa Na'su in'jan'cho Jacob aindeccuma coira. Nane ovejama coiraqquia'caen israendeccuma coira.

⁷² Tsa'caen tsu Davidja ñotssia injama'choi'ccu Chiga aindeccuma coira. Nane ñotsse in'jamba tise tivei'ccu tise'pama fendepa angacan.