Salmos 69 - Cofán: Chiga Tevaen'jen

Attuse'je'cho

¹ ¡Ña Chiga, ñama ccushaenjan! ¡Andeccoqquia'caen gi paye tson'jen!

² Nane tssipaccunga ca'ni ejeqquia'caen gi oshambi ña tsu'tte ta'etsse ccutsuya'chove me'i'onsi. Tsa'ccu tso'sianga jasi tsu quingofa ñama pisaeñe tson'jen.

³ Fuiteya'chove panshaen fundosi tsifo sambapa iñe. Ña tso'fe'qque tsu quimbi panshaen ña Chigave ttatta'jesi.

⁴ Tsain'bio a'i injanga ñama chi'ga'fa. Nane ña tsove'su tosema agatto'choma ti'tsse'o a'i tsu. Ñama iyiccayesundeccuja injanga ñama sefaeñe in'jan'fa. Cca'nambi'choama toequi afeya'cho qquen mandapa quin'sui'ccu itsa'fa.

⁵ Queja, Chiga, ña opa tson'jen'choma atesusi gi ña egae tsincon'choma que'ye a'tuye oshambi.

⁶ Queja, Na'su, Osha'choma Oshacho'cho Chiga qui. Faesu queve in'jan'choma ansangianjama ña shacane. Nane in'jambi gi ña tson'jen'cho cca'indeccuma zuccoemba qqueñañe. Que, Israel Na'su, tisuve ttatta'suma coiraja.

⁷ Queve in'jamba gi cca'i ñama chi'gapa afasesi ansangepa can'jen.

⁸ Ña antian, ña mama dushundeccu'qque ñama atesumbi qquen canjaen'fa.

⁹ Que ettima ñoa'me in'jamba gi paya'ngae dyombi'tsse coiraya. Cca'indeccuja quema chi'gapa ñama tsu afase'fa.

¹⁰ Ña i'namba ambe'yi can'jensi cca'ija ñama feña'fa.

¹¹ Ña ñombi'ye'choma canjaeñe tsincco'cco'je'cco'a sarupama ondiccusi cca'indeccu co'fepa afase'fa.

¹² Ayafanasindeccu faesu faesunga condase'fasi ccusisundeccu'qque ñane settapoen'jen'fa.

¹³ Tsa'ma ñajan quema gi iñajan, Na'su. Ña Chiga, ¡Ñama fuiteja! Que ñama ñotsse in'jamba, ¡ñama pañamba afaja! Que ñama tsangae coirapa, ¡ñama ccushaenjan!

¹⁴ ¡Anttejama, ña tssipaccunga ca'ni ejeye! ¡Tsa'ccu tso'sia'ye ñama ccushaenjan! ¡Ñama chi'ga'chondeccu'ye ñama ccushaenjan!

¹⁵ ¡Anttejama, na'en quingofa jisi ña aijaye! ¡Anttejama, fentsindaccu rande ñama indipa andeccoeñe!

¹⁶ Na'su, ñama pañamba afaja. ¡Queja ñotssiapa qui ñoa'me ñotsse in'jan! ¡Ñama'qque ñotsse in'janjan!

¹⁷ ¡Quema shondo'suma catijama! ¡Junde ñama afaja! Ñoa'me dyo'tssia'ni gi can'jen.

¹⁸ Ñanga catsepa ccushaenjan. ¡Ñama iyiccayesundeccu'ye ñama ccushaemba somboenjan!

¹⁹ Ña vana'jen'cho, ña ansange'cho, ñanga egae tson'choma'qque qui atesu. Ñama iyiccayesundeccuma'qque qui atesu.

²⁰ Nane ñajan tsa'caen vana'jemba gi injama'cho tsosipie doqquia'caen oshambi. ¡Injama'cho shacasi gi oshambi! Ñama fuite'suve tta'tta'ma attembipa ñama vuiquian'suve tta'tta'a'qque gi cachuimbi.

²¹ Ña anqque'sunga seje'pama eyeppu'fa ñama fi'ttiye. Ña tsaqquie'suni'qque inzatssia tsa'ccuma ñanga cui'ña'fa.

²² ¡Antteja cuintsu ñama iyiccayesundeccu an'jen'ni tise'pa anqque'suyi tise'pama quendeccoeñe!

²³ ¡Antteja cuintsu tsendeccu binime dapa dyopa oshambipa ttun'dundu'je'faye!

²⁴ Tise'pama iyicca'yepa vanaejan. Ñoa'me iyicca'yepa si'ngia'caen tise'pama nepianjan.

²⁵ Antteja cuintsu tise'pa can'jen'choja a'i meniame dasi majañi'qque tise'pa carpa tsaoni can'jembecañe.

²⁶ Nane que majama ñoquimbiansi tsendeccuja tsama mandian'fa. Que majama iñetsse iñaccaensi tsendeccuja feña'fa.

²⁷ Tise'pa osha'cho egae tsincon'chone tise'pa injama'choma somboenjan cuintsu que ccushaen'choma isumbipa tsanga shacapa'faye.

²⁸ ¡Tise'pa inise canseya'cho tevaen'jeni jinchoma ccuchaja! ¡Nane ño'andeccui'ccu fae'ngae tise'pa inisema tevaenjama!

²⁹ Tsa'ma ña pajipa vana'jen'choma chigáne, Ña Chiga, ñama pañamba jangiamba ccushaenjan.

³⁰ Settapoemba gi Na'su Chigama ñotsse afa'jeya. Ñama ñotsse tsonsi gi avujatsse tisema afaya.

³¹ Ña tsa'caen tsonsi tsu Na'suja vaurama afe'choma isuye ti'tsse avujatssiya. Nane vaura quitsaye, tise can'cho, tise tsu'ttema'qque afesi isuye ti'tsse avujatssiya.

³² Tsama attepa va'chandeccu'qque avujatssi'faya. Poiyi'cco Chigave ttattasundeccu'qque tise'pa injama'choni quiña'faya.

³³ Nane Na'suja va'chandeccuma pañamba tise'pa'su indiye'cho aindeccuma aqque'paya'bi.

³⁴ ¡Chiga Quitsama ñotsse afa'faja! ¡Nane sefacco, ande, mar, poiyi'cco tsani can'jensundeccu'qque tisema ñotsse afa'faja!

³⁵ Chigaja Ziónma ccushaemba Judá ande'su canqqueve ccase canqquiaña. Ccushaensi tsu ccase aindeccuja tseni can'jemba an'bian'faya.

³⁶ Tsendeccu, Na'suma shondosundeccu pa'ni'qque tise'pa dutssiyendeccu tsa canqquema isupa an'bian'faya. Nane Na'su Chigama ñotsse in'jan'chondeccuja tsangae tsu tseni canse'faya.