Salmos 51 - Cofán: Chiga Tevaen'jen

Mendeyeya'chove iñajan'cho

¹ Chiga Quitsa, que pa'cco in'jan'choi'ccu ñama anttembe'yi in'jamba mendeyeja. Que ñama mendeye'choi'ccu ña in'jangae tsincon'choma joqquitssianjan.

² Cashi catija ña in'jangae tsincon'choma. Ccucha catija ña egae in'jan'choma.

³ Atesu gi ña egae tsincon'choma. Pa'cco a'ta asittaen'bai'ccu gi canse ña in'jangae tsincon'chone.

⁴ Quema gi da'ño, tansien quene gi shacapa. Tansien que su'choyi tsu ñoa'me su'cho. Que ñama injama'choma somboeñe su'chota tsu ñoa'me ñotsse su'cho.

⁵ Chuitepie gi egae tsincon'su. Ña mama isuttie gi egae tsincomba canse.

⁶ Tsa'ma queta qui injama'cho tsosipie ñotsse in'jamba canse'chove ñombi'ye. Tsa'caen ñama'qque in'jaenjan cuintsu ña'qque atesuye.

⁷ Canttini'cco tosei'ccu ñama cashija tsayita gi giya'tssiya. Ñama cashija cuintsu ñajan chandisu'ccoma ti'tsse tototssiye.

⁸ Ña tsosinama fettaja cuintsu avujatssiama ña ccase pañañe. Ña ai'vo ñoquimbipa chapeqquia'caen da'choma ccase avujaenjan.

⁹ Ña egae tsincon'cho'ye joqquitssipa cambe canjan. Pa'cco ña egae tson'choma ccucha catija.

¹⁰ Chiga Quitsa, ña injama'choma cuname agattoenjan. Ccase ñama quiñaejan ña egae tsonsa'ne.

¹¹ Que'ye ñama joqquitssianjama. Que Qquendya'pa ñani jinchoma itsajama.

¹² Ña tayoe que ccushaen'choi'ccu avujatssiqquia'caen ccase ñama avujaenjan. Ñama in'jaenjan cuintsu ña ccase que in'janqquia'caeñi canseye.

¹³ Tsayita gi que manda'choma in'jangae tsinconsundeccunga atesiaña. Qque'chondeccu'qque tsu ccase quema in'jan'faya.

¹⁴ Chiga Quitsa, Chiga ñama ccushaen'su, chigáne ña a'ima fi'tti'choma aqque'paenjan. Tsa'caen tson'ninda gi que ñotsse tson'jen'choma in'jamba settapoeña.

¹⁵ Na'su, ña aya'fama fettaja. Ña menzanza'fama favoenjan, que ñotsse tson'chone afapa settapoeñe.

¹⁶ Osha'cho va andeni'suma afe'cho tsu quenejan barembi. Bare'choecan'da gi afeye'can.

¹⁷ Tsa'ma ñoa'me tisu egae tson'choma chi'gapa Chigama in'jamba iñajan'cho tsu Chigama avujaen. Tisu egae tsincon'chone ñombi'ye'ninda tsu Chigaja chi'gaya'bi.

¹⁸ Que tsa'caen in'jan'da Ziónga ñotsse tsonjan. Jerusalén canqque'su patu ttuccuma ccase ttuja.

¹⁹ Tsa'caen tson'da qui ingi oque oraen'chomajan isuya. Pa'cco osha'choma oque oraen'choma'qque qui isuya. Tsa'cansi gi vaura quitsa'ye du'shuma oque oraemba afeya.