Salmos 5 - Cofán: Chiga Tevaen'jen

Chigai'ccu a'tama ashaeña'cho

¹ Na'su, ña aya'fama pañamba ña attuse'je'choma in'janjan.

² Queja ña Na'su, ña Chiga. Quema iñajansi ña iñajan'choma pañajan.

³ Nane poi a'ta sinte jangipa quema iñajansi qui ña su'choma paña. Iñajamba gi que pañamba tsoña'chove ronda'je.

⁴ Queja faesu chiga'cambipa egae tsinconsundeccui'ccu avujatssimbi. Nane egae tsinconsundeccu quei'ccu can'jeñe osha'fambi.

⁵ Tisuja ñotssi qquen in'jan'choja quenga catseye oshambi. Nane queja egae tsinconsundeccuma ñoa'me chi'ga.

⁶ Fi'ttisundeccuma, tansintssia qquen attiamba afopoensundeccuma'qque qui chi'ga. Nane poi afopoensundeccuma qui fi'tti sefaeña.

⁷ Tsa'ma queja ñama ñotsse in'jansi gi que can'jen'chonga ca'niñe osha. Nane que ñotssia can'jen'ttima camba gi puntssamba pa'cco injama'choi'ccu quema iñajan'jen.

⁸ Na'su, ñama iyiccayesundeccu ñama noñangian'fa'ni'qque Que ñotsse in'jan'choi'ccu ñama angacanjan. Ñotssia tsaiquingae ñama fendepa angacanjan.

⁹ Ñama iyiccayesundeccuja tise'pa injama'cho tsosipie egae jinchopa tansintsse afaye atesu'fambi. Pa'chombe atu'tti changoma ovimbisi tssu'jianqquia'caen tise'pa aya'fa changoi'ccu injanga egae supa menzanza'fai'ccu afopoen'fa.

¹⁰ ¡Na'su, ña Chiga, tise'pa injama'choma somboenjan! Tise'pa quendecco'chonga tise'pama indianjan. Nane tsendeccu quema pañambipa panshaen egae tsinconsi tise'pama catipa joqquitssianjan.

¹¹ Tsa'ma poiyi'cco majan queve in'jamba quenga ca'nimba can'jendeccuja avujatssi'faya'cho. Tsangae tsu avujatsse settapoen'jen'faya'cho. Tise'pama piccoqquia'caen coiraja cuintsu que inisema in'jan'chondeccuja quei'ccu avujatssi'faye.

¹² Nane, Na'su, sundaro tisuma panshaenqque'suma tiveni an'biamba tisuma piccoqquia'caen quema in'jan'chondeccuma in'jamba coiraja.