Salmos 49 - Cofán: Chiga Tevaen'jen

Cansepa bare'cho

¹ ¡Poi ande'su aindeccu, vama paña'faja!

² Nane ricondeccu, va'chandeccu'qque, joccapindeqquia, bove'ccondeqquia'qque, vama paña'faja.

³ Ñajan in'jamba afaye tson'jen. Nane injama'cho tsosipie in'jan'choma gi condaya cuintsu que'i'qque in'jan'faye.

⁴ Settapoen'choi'ccu condasesi paña'faja. Gitara'ca'ma jeñamba a'tutsse conda'choma gi a'tatsse afaya.

⁵ Ñama iyiccayesundeccu jipa ñama egae tsoñe ttu'fa'ni'qque dyojombi gi. Nane tsa egae vanaqque'su a'ta nepi'ni'qque gi dyojombi.

⁶ Tsendeccuja osha'choma an'biamba tsai'ccu quinsepoemba afapa patsuye qquen in'jan'fa.

⁷ Tsa'ma majañi'qque tisuma ccushaeñe oshambi. Ni Chiganga afepoeñe oshambi faesuma ccushaeñe.

⁸ ¡Nane jimbitssi tsu corifin'dima boña'chove tsai'ccu a'i canse'pama chavapa ccushaensi

⁹ cuintsu tsangae canseya'choma isupa pambitsse canseye!

¹⁰ In'jan'cho tsu poiyi'cco a'i fae'ngatsse pa'fa. Nane injama'pa, sumbi'qque pa'fa. Rico'qque pasi cca'indeccu tise an'bian'choma isu'fa.

¹¹ A'i quinsepoemba tisu iniseve tise andema inisian'an'qque pasi ande chango atu'tti tsu tise tsangae can'jeña'cho. ¡Nane tseni tsu tsangae can'jeña!

¹² A'ija tsangae canseya'bi. Tise corifin'dija barembi tsu. Poiyi'cco ande'ye jacanqque'su paqquia'caen tise'qque injanga paya.

¹³ Tisuyi patsuye osha qquen in'jan'chondeccu tsu tsa'caen pa'faya. Tisuja ñotssia qquen afasundeccu tsu tsa'caen naninge'faya.

¹⁴ Ovejama coira'su ovejama angacanqquia'caen tsu paya'choja vandeccuma atu'ttinga angaya. Sinte a'tasi ño'andeccu ccase qquendyapa tise'pama patsusi tsu congomba tise'pa ai'voja tsangae ande chango atu'ttini jinchoya.

¹⁵ Tsa'ma Chigaja paya'cho'ye ñama ccushaemba ccase qquendyaemba tisei'ccu angaya.

¹⁶ Faesu ricove dapa tise tsa'oma ti'tsse ñotssive tson'ni'qque bo'yo'e dapa can'boenjama.

¹⁷ Nane tise pa'ta jongoesuma angaye oshambi'ni ñotssiama ande chango atu'ttini an'biañe oshaya'bi.

¹⁸ Ja'ño avujatsse can'jemba ricosi cca'indeccu tisema ñotsse afa'je'ni'qque

¹⁹ paya'cho a'ta tsu jai'ngae nepiya. Tsequi a'ta nepisi ccatsse a'tatssia'ma atteya'bi.

²⁰ A'ija tsangae canseya'bi. Nane ricombe corifin'dija barembi tsu. Poiyi'cco ande'ye jacanqque'su paqquia'caen tise'qque injanga paya.