Salmos 36 - Cofán: Chiga Tevaen'jen

Chiga ñotssia egama panshan'cho

¹ Egae tsincon'cho egae tsincon'sumbe injama'cho tsosipie afasi tsaja ni asi'ttaembi Chigama pañañe.

² Nane tisu injama'choni “Ñotssi gi” qquen in'jamba tisu egae tsincon'choma in'jambipa chi'gambe'yi can'jen.

³ Tise aya'fai'ccu egae afapa afopoemba ñoa'me injama'cho shacasi ñotsse tsoñe oshambi.

⁴ Nane ana'jen'chonga ccui'a'qque ti'tsse egae tsincoña'choveyi asi'ttaen. Anttembe'yi egae tsincoñe in'jamba ccaningae tsomba ñotsse tsoñe oshambi.

⁵ Tsa'ma queja Na'su, sefacconi nepiqquia'caen qui ñotsse in'jamba, tsangae que suqquia'caen tson'jen.

⁶ Que ñotsse tansintsse tson'choja ccotta'cco randea'cantsse cambiambitssi. Toya'caen rande mar tsosini nepiqquia'caen tsu que tansintsse in'jan'choja nepi. Queja, Na'su, a'ima in'jamba poi va andeni jacanqque'suma'qque in'jamba coira'je.