Salmos 34 - Cofán: Chiga Tevaen'jen

Na'su Chigama ñotsse afa'cho

¹ Pa'cco a'ta Na'su Chigama ñotsse afapa gi anttembe'yi ña aya'fai'ccu tise ñotssiama condaya.

² Injama'choni Na'suve in'jamba gi dyombi'tsse tisene afa'je. ¡Vanasundeccu, ña su'choma pañamba avujatssi'faja!

³ Fae'ngae ñai'ccu Na'suma ñotsse afa'faja. Ñoa'me ti'tsse'tssi tsu tise iniseja.

⁴ Na'suma tta'ttasi tiseja ñama paña. Pañamba pa'cco ña dyopa in'jan'choma joqquitssian.

⁵ Poiyi'cco majan Na'suve in'jamba tise'pa camba'ju chanjunqquia'caen dapa avujatsse can'jemba ccatsse ansange'faya'bi.

⁶ ¡Va'cha a'i gi! Tsa'ma Na'suma iñajansi tiseja ñama paña. Pañamba ña vana'jen'cho'ye ñama ccushaen.

⁷ Nane Na'suma sefacconi'su shondo'suja Na'suma pañasundeccuma ttupa ccushaen.

⁸ Tsa'cansi Na'suma atesucamba canjan tise ñotsse tson'choma atesuye. ¡Nane avujatssi tsu majan tisuma Na'sunga afe'su!

⁹ Na'suve in'jan'chondeccu Na'suma ñotsse paña'faja. Shacaya'bi tsu tisema paña'suja.

¹⁰ Nane ricondeccuja va'chae dapa qquipoe'su'faya. Tsa'ma Na'suma ttattasundeccuneja jongoesuyi'qque ñotssiaja shacaya'bi.

¹¹ Jija ña dushundeccu. Jipa ñama paña'faja. Paña'faja ma'caen Na'suve in'jamba canseya'chove ña atesian'choma.

¹² ¿Bo'tsse canseye'ta ti qui in'jan? ¿Avujatsse can'jeñe'da ti qui in'jan?

¹³ Tsa'caen in'jan'da que menzanza'fama se'pija egae afasa'ne. Toya'caen minga'ni'qque que aya'fai'ccu afopoenjama.

¹⁴ Tisuma ega'ye joqquitssiamba ñotsse tsonjan. Opatsse canse'ya'chove tta'ttapa tsa'caen canseja.

¹⁵ Na'su Chigaja tise've in'jamba paña'suma ñotsse coirapa paña'jen tise ttuse'je'choma pañañe.

¹⁶ Na'su Chigaja egae tsinconsundeccuma chi'gapa tisene injan'jen'choma ccuchaye in'jan majan injan'jensa'ne.

¹⁷ Nane Na'suve in'jamba paña'su ttu'sesi junde tsu Na'suja tisema pañamba pa'cco vana'jen'cho'ye tisema ccushaeña.

¹⁸ Na'suja pporotssi tsu. Nane majan injama'cho tsosipie ñombi'yepa oshambisi junde tsu Na'suja tsama ccushaeña.

¹⁹ Na'suve in'jamba paña'su'qque osha'chove vana'jeña. Tsa'ma Na'suja osha'cho'ye tisema ccushaeña.

²⁰ Nane pa'cco tise tsu'ttama coira'je tsa'su fae'cco uccasa'ne.

²¹ Tise'pa egae tsincon'choyi tsu egae tsinconsundeccuma fi'ttiya. Toya'caen tsu Na'suve in'jamba pañasundeccuma chi'gasundeccumajan injama'choma somboeña'cho.

²² ¡Tsa'ma Na'suja tise've in'jamba shondosundeccuma ccushaemba tise'pa injama'choma somboeña'bi! Nane tsendeccuja tise've in'jamba paña'fa.