Salmos 32 - Cofán: Chiga Tevaen'jen

Shacama joqquitssian'cho

¹ Avujatssi tsu tsa a'ija tise egae tsincon'cho tayo joqquitssisi. Nane tise in'jangae tsincon'choma ccuchasi avujatssi tsu.

² Avujatssi tsu tsa a'ija tise injama'choni afopoembe cansesi Na'su tise egae tsincon'choma agattombisi.

³ Tisu egae tsincon'choma condambipa pa'cco a'ta attuse'jesi ña ai'voja tombu.

⁴ A'ta, cose'qque qui que tivei'ccu ñama pisachoqquia'caen ñama quimbian. Nane te'ta coe'jenga pandiqquia'caen gi quimbi.

⁵ Tsa'caen dapa gi in'jamba ña egae tsincon'choma quenga conda. Jongoesuveyi'qque a'tumbitsse gi in'jamba su: “Na'sunga gi ña egae tsincon'choma condaya.” Condasesi qui tsa egae tsincon'cho shacama joqquitssian.

⁶ Tsa'cansi tsu poiyi'cco Chigave in'jan'chondeccu quema iñajaña'cho. Nane que can'jensi atteye osha'ta tsu iñajaña'cho maqui a'ta vana'jen'cho ji'ni'qque opatsse can'jeñe.

⁷ Quenga ca'niqquia'caen gi opatsse canse. Queja ñama coira jongoesu ñama dañosa'ne. Ñama qui ttupa an'bian patsuye settapoen'choi'ccu.

⁸ Qquen tsu Na'suja su: “Ñajan quema caña'jemba gi quema atesian'jeña. Nane quema in'jaemba gi candusiaña ma'caen canseya'chove.

⁹ Cavayo ni boro'caen tsincoña'bi qui. Nane tsendeccu atesuye osha'fambisi queja yoshavama tise'pa aya'fanga botaemba mani jaya'chove tansian'jen. Tsa'caen tsombi'ninda quema paña'fambi.”

¹⁰ Tsain'bitssi tsu egae tsincon'su vana'jeña'cho. Tsa'ma Na'su ñotsse in'jan'cho tsu tisema pañasundeccuma ttupa coira'je.

¹¹ Que'i ñotsse da'chondeccu avujatssi'faja. Avujatssipa Na'suma ñotsse afa'faja. ¡Nane ñotsse afapa avujatsse fundo'je'faja!