Salmos 23 - Cofán: Chiga Tevaen'jen

Na'su ñama coira'su

¹ Ñajan oveja'cansi Na'su tsu ñama coira'su. Tsa'cansi shacaya'bi gi.

² Ovejama ñotssia shoshovinga ccuiñaqquia'caen tsu ñama manda cuintsu ña ño'faye. Ppimppintssia na'en otafa'ye tsu tiseja ñama angacan.

³ Ña injama'choma tsu quiñaen. Ñama tsu ñotssia tsaiquingae angacan cuintsu ño'ame dapa tisema ñotsse in'jañe.

⁴ Mapán sinjunccuni andepa sinttianga japa paye tson'jen qquen in'jan'ni'qque qui, que Na'su, ñai'ccu can'jensi jongoesunga egave dambi. Nane que accuicco'cho, que an'ccoi'ccu qui ovejama fuiteqquia'caen ñama fuite'je.

⁵ Ñama noñangiansundeccu ñama shoquendi'fasi queja anqque'suma ñoñamba ñanga o'fian. Oveja tsovema yayapai'ccu onjoenqquia'caen qui ñama ccushaen. Ña tasa on'bapa fe'ti'tsse qui ñama cui'ña.

⁶ Nane ñoa'me pa'cco ña cansuite qui ñama in'jamba osha'cho ñotssiai'ccu ñama fuiteya. Na'su, tsangae gi que tsaoni can'jeña.