Salmos 22 - Cofán: Chiga Tevaen'jen

Ñombi'ye'a'qque ñotsse afa'cho

¹ Ña Chiga, ña Chiga, ¿Jongoesie qui ñama cati'je? ¿Mingapa qui ñama ccushaeñe jimbi? ¿Mingapa qui ña ina'jen'choma pañambi?

² Ña Chiga, a'ta, cose ña quema iñajan'ni'qque qui ñama afapa ño'faembi.

³ Tsa'ma que qui ñotssia. Que qui Na'su. Poi israendeccu quema ñotsse afa'fa.

⁴ Ingi coenzandeccu quema in'jamba paña'fa. Paña'fasi qui tise'pama ccushaen.

⁵ Tise'pama fuiteye iñajansi qui fuitepa vuiquian. Nane quema paña'fasi qui tise'pama afopoembi.

⁶ Tsa'ma ñanda gi a'imbipa yosia'can. A'ija ñama chi'gapa barembi qquen tsu su'fa.

⁷ Poiyi'cco ñama attepa afase'fa. Ziñomba fi'ttiqquia'caen tsovema fenonomba su'fa:

⁸ “Tise Na'su Chigave in'jan'ninda cuintsu Na'su tisema ccushaemba vuiquianjan. Ñoa'me tisema in'jan'da cuintsu tisema ccushaenjan.”

⁹ Que qui tson cuintsu ña mama ñama isuye. Ña mamama chocho'jesi que qui coira.

¹⁰ Nane toya isumbi'te qui ñama in'jamba tayo coira'je. Isu'ni'qque qui ña Chiga.

¹¹ ¡Ña'ñe joqquitssijama! Vanae'su ñanga catse'ma'caen gi vanaña. Me'cho gi ñama fuite'suve.

¹² Vaura quitsaye ñama shoquendi'e ttuqquia'caen tsu ñama chigasundeccuja ñama iyicca'ye'fa. Nane putsa'su Basán ande'su vaura'caen tsu ñama iyicca'ye'fa.

¹³ Ttesi putsa'su iyicca'yepa sharupa fundoqquia'caen tsu ñama afase'fa.

¹⁴ Ñanda gi tsa'ccuma fiña'jenqquia'can. Ña tsu'tta'su bacco'choja battiqquia'can tsu. Ña injama'cho tsu tuñoa'caen tssutssu'je ña injama'ttinga.

¹⁵ Tsa'o'su ccaque coe'jesi sambaqquia'caen tsu ña aya'faja samba. Ña menzanza'fa'qque santsse dapa aya'fanga setsa. Ñajan tayo papa andenga ccuiqquia'caen ccuisi qui ñama cati.

¹⁶ Ain shoquendi'e catseqquia'caen tsu ega aindeccuja ñama ttu'fa. Nane ttupa tsu ña tive, tsu'ttema'qque canshaen'fa.

¹⁷ Pa'cco ña tsu'ttama gi agattoye osha. Anttembe'yi ñama chigasundeccuja can ccutsu'fa.

¹⁸ Gana qquen co'fepa tsu ña ondiccu'je'cho sarupama attufaemba isu'fa.

¹⁹ Tsa'ma Na'su, queta qui ña quin'an. ¡Ña'ñe joqquitssijama! ¡Junde jija ñama fuiteye!

²⁰ Ñama ccushaenjan matichi'ccu pasa'ne. Ñama ccushaenjan va ainfavo ñama fi'ttisa'ne.

²¹ Ñama ccushaenjan va a'i ttesia'caen ñama ansa'ne. Ñama ccushaenjan vaura quitsaye tise can'choi'ccu noñangianqquia'caen ñama fi'ttisa'ne.

²² Quene gi afaya ña antiandeccunga. Aindeccu bo'fa'chonga gi quene ñotsse avujatsse afaya.

²³ Poiyi'cco que'i majan Na'suve in'jan'da, ¡Tisema ñotsse afa'faja! Poiyi'cco Jacob omba'su dutssiyendeccu, “¡Tiseja ñotssi!” qquen su'faja. Nane Israel omba'su dutssiyendeccu, ¡tisema dyoe'sui'ccu in'jan'faja!