Salmos 2 - Cofán: Chiga Tevaen'jen

Que qui ña dutssi'ye

¹ ¿Jongoesie tsu israembindeqquiaja qquejian'fa? ¿Jongoesie tsu aindeccuja iyiccoye in'jan'fa?

² Poi ande'su nasundeccu tsu ñoña'fa geraeñe. Canqque nasundeccu'qque tsu tayo bo'fa Na'su Chigai'ccu iyiccoye. Tise in'jan'cho na'suma'qque tsu iyicca'ye'fa.

³ Nane iyicca'yepa fundo'fa: “¡Jinge que ingima candenai'ccu indicho'choma ccupaye; que ingima tandan'choma'qque ccupaye!”

⁴ Na'su Chigaja sefacconi can'jemba tsendeccuma feña.

⁵ Omboe tiseja iyicca'yepa tsendeccuma dyoña. Nane ñoa'me iyicca'yepa tise'pama su:

⁶ “Tayo gi ña na'suma ttu'sepa Zióni ccutsian, tsa ña ñotssia ccotta'cco'ye, cuintsu mandaye.”

⁷ Tsa ñama ttuse'su Na'su su'choma gi condaya: Nane tiseja ñama su: “Que qui ña dutssi'ye; ja'ño gi quema atte.

⁸ Yaya tise dutssi'yenga afeqquia'caen ñama iñajanjan cuintsu poi ande'su aindeccuma ña quenga afeye. Nane poi biani'su andema'qque iñajanjan queyi an'biañe.

⁹ Yoshava'ccoi'ccu quian'me mandapa qui ande nasundeccuma patsuya. Nane apima ochhai doñaqquia'caen qui tise'pama naniaña.”

¹⁰ ¡Ande nasundeccu, govierno aindeccu'qque va su'choma ñotsse paña'faja! Pañamba Na'su tsoña'choma ñotsse avujatsse afa'faja.

¹¹ Na'suma ñotsse in'jamba tisema avujatsse afa'faja. Nane dyoe'sui'ccu Na'sunga ccaru dyaipa iñajan'faja tise iyicca'yesa'ne.

¹² Nane tsa'caen tsombi'ta qui tse'faei'ccuyi pa'faya Na'su junde iyicca'yesi. Poiyi'cco tise've in'jamba coirayeye ji'chondeccuja ñoa'me avujatssi'faja.