Salmos 16 - Cofán: Chiga Tevaen'jen

Na'sune ñotsse isu'cho

¹ Chiga Quitsa, ña quema iñajansi, ¡ñama ñotsse coiraja!

² Na'sunga gi su: “Que qui ñotssia, ña Na'su. Faesu quia'can'me an'biambi gi.”

³ Queve in'jamba ño'andeccu va andeni can'jensi gi attepa tise'pa ñotssiave tsonsi tise'pai'ccu avujatssi.

⁴ Tsa'ma faesu ñoña'cho chigandeccuve iñajansundeccu tsu ti'tsse ñombi'ye'faya. Tise'pai'ccu fae'ngae anjampama afe'choma ccatsse afeya'mbi gi. Ni tise'pa chiga inisema'qque ccatsse afaya'bi gi ña aya'fai'ccu.

⁵ Na'su, que in'jamba ñama ñotsse coirapa osha'choma afesi gi que tiveni opatsse can'jen.

⁶ Que injanga attufaen'ni'qque ñanga afe'choja ñoa'me ñotssi tsu. ¡Nane ña isu'choja faesuma bove ñotssia tsu!

⁷ Na'su ñama ñotsse coirasi gi tisema avujatsse afaya. Ña ana'jensi tsu ña injama'cho tsosipie ñama tansian.

⁸ Tsangae tsu Na'suja ñai'ccu can'jen. Nane tiseja ña tansinfani ccutsuqquia'caen fuite'jesi majañi'qque ñama se'piye oshambi.

⁹ Tsa'cansi gi injama'cho tsosipie avujatssipa pa'cco ai'voi'ccu, pa'cco in'jan'choi'ccu'qque opatsse can'jen.

¹⁰ Ña qquendya'pama catiya'bi qui pa'chondeccu can'jeni. Ni antteya'bi qui que in'jan'cho a'imbe ai'vo papa congoñe.

¹¹ Que qui ñama atesian ma'caen can'jemba tsangae canseye. Nane quei'ccu can'jemba gi ñoa'me avujatssi. Tsangae gi anttembe'yi quei'ccu avujatssiya.