Salmos 140 - Cofán: Chiga Tevaen'jen

Chiga coira'je'chove iñajan'cho

¹ Na'su, egae tsinconsundeccu'ye ñama ccushaenjan. Ñama dañoñe in'jan'chondeccu'ye ñama coiraja.

² Tsendeccuja tisupa injama'choni egae asi'ttaemba ñoña'fa. Nane poi a'ta iyicco'jeya'chove ñoña'fa.

³ Iyo menzanza'fa'caen tsuintssi tsu tise su'choja. Tise'pa afa'je'cho'qque iyo sejepa'caen daño.

⁸ Na'su, egae tsincon'su in'jan'choma tisenga afejama. Ni tise'pa injama'choni asi'ttaemba ñoñaña'choma anttejama tise'pa ti'tsse patsuye afasa'ne.

⁹ ¡Tsa'ma antteja cuintsu ñama ttupa noñangiansundeccunga tise'pa ñama egae in'jan'choja amppiqquia'caen tise'pama dañoñe!

¹⁰ Antteja cuintsu singete'cho amppi oqueqquia'caen tise'pama dañoñe. Antteja cuintsu changonga amppipa somboye oshambiqquia'caen tise'pa'qque ti'tsse noñangiañe osha'fambiye.

¹¹ Antteja cuintsu afopoensundeccu va andeni can'jen'fambi'ye. Toya'caen antteja cuintsu ega'ja dañoñe in'jan'chondeccuma mandianqquia'caen metsse sefaeñe.

¹² In'jan gi Na'suja ñotsse tsomba va'chandeccuma in'jamba noñangiañe'suma'qque fuite.

¹³ Ñotsse in'jamba tsonsundeccuja queve in'jamba quema ñotsse afa'faya. Nane ñotsse tsonsundeccuja quei'ccu tsangae can'jen'faya.