Salmos 14 - Cofán: Chiga Tevaen'jen

Na'su Chigave in'jambe canse'cho

¹ A'i sumbija tise injama'choni “Chigaja jimbi” qquen su. Ju, poiyi'cco tsu egae dapa ñoa'me in'jangae tsincon'fa. Me'i'on tsu ñotsse tson'suve.

² Na'su Chigaja sefacconi can'jemba va ande'su aindeccuma caña'jen. Camba ñotssiave in'jan'cho a'ive ttatta'je, majan tisema ttatta'suve.

³ Tsa'ma poiyi'cco ega tsaiqui'ye qquepa jacanqquia'caen fae'ngae egae tsincon'fa. Me'i'on tsu ñotsse tson'suve. Nane ni fae'ccoyi'qque ñotssiaja jimbi.

⁴ ¿Minga'ni tsu egae tsonsundeccuja pañamba in'jan'faya? Nane Na'su Chigave in'jambipa tsu ña aindeccuma, panma anqquia'caen, an sefaen'fa.

⁵ Tsa'ma Chigaja tise ño'an pañasundeccui'ccu can'jensi egae tsonsundeccuja ñoa'me oshambipa dyopa ttun'dundu'je'faya.

⁶ Nane que'i egae tsinconsundeccu qui va'chandeccu in'jan'choma se'pi'fa. Tsa'ma tsendeccu Na'sunga jisi tiseja tise'pama coiraya.

⁷ ¡Ronda'je'fa gi cuintsu Zión ccotta'cco'ye Na'su jipa israendeccuma ccushaeñe! Nane tsequi a'ta Na'su tise aindeccunga ñotssiave ccase anttesi, Jacob dushundeccu, nane poiyi'cco israendeccuja avujatssi'faya.