Salmos 110 - Cofán: Chiga Tevaen'jen

Na'su Chiga ande na'suma fuite'cho

¹ Na'su Chigaja ña na'sunga su: “Ñai'ccu fae'ngae na'suve dapa va'ttinga dyaija ña tansinfanga ña quema iyiccayesundeccuma patsusi que tsu'tte tsosiccunga ccuiqquia'caen oshambipa quema paña'faya'ngae.”

² Na'su Chiga quema ti'tsse quiñaesi qui Zión'ñe bianima mandaya cuintsu quema iyiccayesundeccu quema paña'faye.

³ Que aindeccuja dyombe'yi tsu Zión ccotta'cconga bo'faya que patsuya'cho a'ta nepisi. Nane suruno sinte pa'ccoma piccopa chanjunqquia'caen qui queja poi a'ta cuname daya.

⁴ Na'suja qquen tansintsse supa ccaningae afaya'bi: “Que qui tsangae a'ine ñama afa'suve daya. Nane Aarón'cambipa qui Melquisedec'caen daya.”

⁵ Na'suja que tansinfani dyaipa tise iyiccoya'cho a'ta nepisi nasundeccuma patsupa sefaeña.

⁶ Nane injama'choma somboenqquia'caen poi andema iyu'usi tsain'bio a'i pa'faya. Toya'caen tsovema iñaccaenqquia'caen poi ande'su mandasundeccuma joqquitssiaña.

⁷ Nane tsaiqui'ye mandian'jen'an'qque tsa'ccuma cu'ipa tsai'ccu quiñamba mandiaña.