Salmos 106 - Cofán: Chiga Tevaen'jen

Israel pañambipa tson'jen'cho

¹ ¡Ñotssi tsu Na'su Chigaja! Na'su Chigaja ñotssia tsu. Tisema avujatsse afa'faja. Tsangae ingima in'jan'cho tsu. Tisema avujatsse afa'faja.

² ¿Majan tsu Na'su ti'tsse'tssia tson'chone condaye osha? ¿Majan tsu pa'cco tisenga ñotsse afaya'chove afaye osha?

³ Nane avujatssi tsu majan a'i ñotsse tson'suja. Anttembe'yi ñotsse tsomba tsu anttembe'yi avujatssi.

⁴ Na'su, que aindeccuma ñotsse tson'jemba ñama aqque'pajama. Ccushaeñe ji'ta ñama'qque fuiteja

⁵ cuintsu ña'qque que in'jan'chondeccui'ccu ñotsse can'jemba que aindeccui'ccu avujatssiye. Nane quene isusundeccui'ccu gi fae'ngae quema ñotsse afaya.

⁶ Ingi tayopi'su coenzandeqquia'caen gi egae tsincon'fa. In'jangae tsincomba gi egae tson'fa.

⁷ Ingi tayopisundeccuja Egiptoni can'jemba que ti'tsse'tssia canjaen'choma chi'gapa que tise'pama ñotsse in'jan'choma aqque'pa'fa. Tsa'caen aqque'papa Cu'a mar jin'ttinga quema'qque chi'gapa cati'fa.

⁸ Tsa'ma Chigaja tise inisema ñotsse canjaeñe tise'pama ccushaensi tsu tise quin'suma attepa in'jan'fa.

⁹ Na'suja Cu'a marma iyu'upa samboen tise'pa a'i menia santsse jaqquia'caen santsseyi isiañe.

¹⁰ Tsa'caen tise'pama iyiccayesundeccu'ye tise'pama ccushaemba tise'pama chi'gasundeccu'ye tise'pama somboen.

¹¹ Nane mar tsa'ccu tise'pa enemigondeccuma piccosi ni fae'ccoyi'qque ccusha'fambi.

¹² Na'su Chiga tsa'caen tsonsi aindeccuja tise tansintsse su'chove in'jamba tisema avujatsse settapoen'fa.

¹³ Tsa'ma junde tsu Chiga ñotsse tson'choma aqque'papa ron'daye in'jan'fambi tise in'jan'choma atesuya'chove.

¹⁴ Tseni, a'i menia tisupayi can'jemba tise'pa in'jangae in'jan'chove iñajamba Chigama qqueñacañe iñajan'fa.

¹⁵ Iñajan'fasi Chigaja tise'pa in'jan'choma afepa ega paqque'suma'qque afe cuintsu poiyi'cco pa'faye.

¹⁶ Tise'pa can'jeni can'jemba Moisés, toya'caen Chiga in'jamba ttu'se'cho Aarónma'qque injama'choni se'pi'fa.

¹⁷ Injama'choni tsa'caen se'pi'fasi Chigaja andema fettasi andeja cundeqquia'caen tsa Datánma toya'caen poi Abiram aindeccuma'qque tsangae nepian.

¹⁸ ¡Si'nge'qque anchandapa tise'pa aindeccuma metsse sefaen! ¡Nane anchandapa tsu egae tsinconsundeccuma metsse oque cati!

¹⁹ Horeb ccotta'cconi aindeccuja ñoña'cho vaura du'shuve ñoña'fa. Corima tssutssiamba ñoña'cho chigave ñoñamba tsanga iñajan'fa.

²⁰ ¡Nane sefacconi'su Joccapitssia Chigama catipa shoshovima anqque'su vaura quitsayea'can ñoña'chove in'jamba iñajan'fa!

²¹ Chiga, tise'pama ccushaen'suma aqque'papa Tise Egiptoni ti'tsse'tssia've tson'choma'qque aqque'pa'fa.

²² Cam andeni tsa'caen ti'tsse'tssia've canjaemba Cu'a marni'qque ti'tsse camboenqque'suve tsonsi atte'ma tsama aqque'pa'fa.

²³ Tsa'can'fasi Chigaja tise'pama fi'tti sefaeñe in'jamba susi Moisésja enttingenga ccutsupa Chiga iyicca'ye'choma vuiquian. Vuiquipa Chigaja ingima fi'tti sefaembi.

²⁴ Omboe ñotssia andema chi'gapa Chiga ñoa'metsse su'choma'qque in'jan'fambi.

²⁵ Tise'pa carpani Na'suma egae afapa tise manda'choma pañambipa ccaningae tson'fa.

²⁶ Tsa'caen tsonsi Chigaja tansintsse su'choma canjaeñe tivema yasapa qquen su: “Vandeccuja a'i menia pa'fasi

²⁷ tise'pa dushundeccu'qque poi andenga jajapa poi Na'suve in'jambi'choa andenga pa'faya.”

²⁸ Cansembi'choa chigandeccunga afe'cho aña'choma amba Baal-peorve in'jamba tsambe aindeccuve da'fa.

²⁹ Tsa'caen egae tsomba Chigama iyicca'yean'fasi paqque'suja atapasi paye ashaen'fa.

³⁰ Tsa'ma Finees jangipa egae tsincomba shacaen'suma fi'ttisi paqque'su pasasi a'ija ti'tsse pa'fambi.

³¹ Finees tsa'caen tsonsi Chigaja tisene ñotssiave in'jansi poi omba'su aindeccu'qque tsama tsangae injan'jen'faya.

³² Toya'caen Meriba tsa'ccu jini Chigama iyicca'yean'fa. Tsa'caen tson'jemba Moisésma'qque vanae'fa.

³³ Nane tise injama'choma noñangian'fasi iyicca'yepa ñotsse in'jambe'yi injanga egae afa.

³⁴ Na'su majan canqquema sefaeñe manda'ni'qque israendeccuja tsa'su aindeccuma sefaen'fambi.

³⁵ Tsa'ma faesu chigandeccuve in'jan'chondeccui'ccu fae'ngae can'jemba tsendeccu in'jan'chove atesupa tsa'caen canse'fa.

³⁶ Tsenisundeccu ñoña'cho chigandeccuma iñajan'fasi tsesu chigambindeqquiaja tise'pama qqueña'fa.

³⁷ Qqueña'fasi israendeccuja tise'pa dutssiyendeccu, onquengendeccuma'qque tsesu cocoyandeccunga fi'ttipa afe'fa.

³⁸ Egave me'chondeqquia'be anjampama tssaña'fa. Tise'pa dutssiyendeccu, onquengendeccumbe anjampama tssañamba Canaán ande'su chigandeccunga afesi tsendeccumbe anjampaja pa'cco tsa andema dañomba egave tson.

³⁹ Nane israendeccuja tsa'caen egae tsincomba tisupama'qque egave tsomba tisupama afe'fa osha'cho egae tsincon'chove tsoñe.

⁴⁰ Tsa'caen tson'jen'fasi Na'suja tise aindeccuma ñoa'me iyicca'yepa tise in'jan'cho aindeccuma chi'ga.

⁴¹ Chi'gapa faesu chigave in'jan'chondeccunga catipa tise'pama iyiccayesundeccunga antte cuintsu patsupa manda'faye.

⁴² Tsendeccuja israendeccuma ñoa'me vanaemba tise'pa quin'suma canjaemba quinsepoemba manda'fa.

⁴³ Chigaja tsain'bitsse tise'pama ccushaen'ñacca. Tsa'ma tise'pa injama'choni ccaningae in'jamba Na'su tson'choma chi'gapa ti'tsse egae tsincon'fa.

⁴⁴ Tsa'caen tson'jen'fa'ni'qque Chigaja tise'pa vana'jen'choma attepa tise'pa vana'jemba ina'jen'choma paña.

⁴⁵ Pañamba tise a'i'ccu fae'ngae injancco'fa'choma injan'jemba tise ñoa'me ti'tsse in'jan'choma canjaemba vuiquipa tise'pama ccaningae tson.

⁴⁶ Nane Na'su ccaningae tsomba in'jaensi Israelma patsusundeccu'qque tise'pama mende'yepa ñotsse tson'fa.

⁴⁷ ¡Na'su, ingi Chiga, ingima ccushaenjan! ¡Ingi cca'tti, cca'tti can'jen'cho ande'ye ingima ttu'sepa boña'jan cuintsu ingi'qque que ñotssia inisema ñotsse afa'faye!

⁴⁸ ¡Na'su Chigama ñotsse afa'faja! ¡Tiseja Israel Na'su tsu! ¡Tsangae tsu tisema ñotsse afa'faya'cho! ¡Ñotssi tsu Na'su Chigaja!