Salmos 105 - Cofán: Chiga Tevaen'jen

Chiga Israelne ñotsse tson'jen'cho

¹ ¡Na'su ñotsse tson'chone tisema avujatsse afa'faja! ¡Tise inisema'qque poiyi'cconga conda'faja! Poi canqque'su aindeccunga Tise tson'jen'choma conda'faja.

² Tise've in'jamba pañamba settapoen'choi'ccu canjaen'faja. ¡Tise ñotsse tson'jen'chone afa'faja!

³ Tise ñotssia inisema atesupa avujatsse afapa canse'faja. ¡Nane poiyi'cco majan Na'suve ttattasundeccu injama'choni avujatssi'faja!

⁴ Anttembe'yi Na'suma can'faja. Camba tise quin'sui'ccu canse'faja.

⁵ Tise ñotsse tson'jen'choma aqque'pa'fajama. Tise joccapitsse tson'jen'choma injan'jen'faja. Tise supa manda'choma'qque injan'jen'faja.

⁶ Que'ija tisema shondo'su Abraham omba'su dushundeccu. Nane tise in'jan'cho Jacob dushundeccu qui.

⁷ Tiseja Na'su, ingi Chiga tsu. ¡Pa'cco biani'su andema tiseja manda'je!

⁸ Nane tise su'choja ñoa'me su'chosi tsu mapán mil a'i canse'cho'ye pasa'ni'qque toya tise a'i'ccu injancco'fa'choma aqque'paya'bi.

⁹ Tsa injancco'fa'chomajan Abrahami'ccu afapa Isaacnga tansintsse su'choi'ccu ccase afa.

¹⁰ Toya'caen Jacobnga ccase manda'chove tsama afapa israendeccui'ccu tsa tsangae injancco'fa'chove afapa su:

¹¹ “Que'inga gi Canaán andema afeya. Nane que'inga afesi isu'cho ande tsu.”

¹² Tsequi a'ta israendeccuja re'riccopa, faesu ande'su aindeqquia'caen can'jen'an'qque

¹³ fae ande faesu andenga jacamba fae manda'su faesu manda'sunga japa can'jen'fa.

¹⁴ Tsa'ma Na'su Chigaja anttembi cuintsu faesu ande'su aindeccu tise'pama noñangiañe. Nane nasundeccu noñangiañe tson'jen'ninda tsu qquen iyu'u:

¹⁵ “Ña in'jan'chondeccuma pporaenjama. Ña aya'fama afasundeccuma noñangianjama.”

¹⁶ Na'su afasi tsa andeni qquipoesuiteve dasi jongoesuve añe me'i'on.

¹⁷ Tsa'ma israendeccuma o'tie fae a'ima Egiptoni moe. Tsaja José, índipa tsangae sema'suve chavaemba moe'fa'cho.

¹⁸ Tise tsu'ttema candenai'ccu iñaccaemba tise tsifoma'qque yoshavai'ccu andiamba an'bian'fa.

¹⁹ Nane Na'su Chigaja José in'jan'choma atesuye in'jamba tisema tsa'caen vanae José tisu jai'ngae tsoña'chove su'choma tsoña'ngae.

²⁰ Tsonsi ande na'su, tsain'bio a'ima manda'suja tisema somboemba ccushaen.

²¹ Somboemba tise tsa'o na'suve Joséma ccutsian. Pa'cco tise an'bian'choma mandapa coiraye antte

²² cuintsu nasundeccu, coenzandeccuma'qque atesiansi injama'pave da'faye.

²³ Omboe Israelja Egiptoni ji. Tsaja Jacob tsu, faesu ande'su a'i. Tsa'caen jipa Cam andeni can'jen.

²⁴ Can'jensi Chigaja tise aindeccuma atapoemba injan'tssia've tsomba Egiptondeccuma ti'tsse quin'anme tson.

²⁵ Tsa'ma Egiptondeccu injama'choma'qque in'jaensi tsendeccuja tise aindeccuma chi'ga'fa. Nane tisema shondosundeccuma afopoemba noñangian'fa.

²⁶ Tsomba tse'i Chigaja tisema shondo'su Moisés, Aarónma'qque ttu'sepa tseni moe.

²⁷ Moesi jipa Chiga agattoen'choma Cam andeni tson'fa. Nane tseni'su aindeccunga ti'tsse'tssia canjaen'choma canjaen'fa.

²⁸ Chiga mandasi pa'cco andeja sintsse da. Tsa'ma egiptondeccuja Chiga su'choma in'jan'fambi.

²⁹ Chiga mandasi na'en'su tsa'ccuja anjampaveyi dapa pa'cco avuma fitti'tti.

³⁰ Sapoma'qque injan'tsse isi ande'qque on'ba'o. Nane ande na'su anambaccu'qque sapoyi on'ba'o.

³¹ Chiga afasi unjimba'ccoa'caen ocu, toya'caen tenqquen'cho jipa Egipto andema picco.

³² Unjinjan tsandapandaquive dapa amppisi tsanda'qque veyaemba pa'cco andema oque.

³³ Tsa'caen tsomba o'fa tsaja, higoma'qque daño sefaemba pa'cco Egipto ande'su quini'ccoma'qque ucca'sho sefaen.

³⁴ Toya'caen Chiga afasi ttombu'qque ji'fa. Nane agattoye oshambi'tsse jipa tsain'bio tsu.

³⁵ Jipa osha'cho sho'yoqque'suma an sefaemba pa'cco ande'su teta'choma'qque an'fa.

³⁶ Tsomba teta'choma sefaenqquia'caen a'i aisheve isu'chondeccuma'qque pporaemba poiyi'cco Egipto'su dutssi'ye coenzama fitti'tti.

³⁷ Tse'i Chigaja tise aindeccuma Egipto'ye somboen. Nane injan'tsse cori, totoacorima'qque andupa dyombi'tsse quin'sui'ccu sombo'fa.

³⁸ Egiptondeccuja israendeccuma dyopa avujatsse tise'pama can moe'fa.

³⁹ Ja'fasi Chigaja tise'pama piccoye unjimba'ccoma attajaemba cose'qque si'ngei'ccu tise'pama attian.

⁴⁰ Israendeccu anqque'suve iñajansi yayapa chivi'rima moe. Toya'caen sefacconi'su panma tise'pa ttepputsse shequian moe.

⁴¹ Patuvo'choma'qque doñasi tsa'ye tsa'ccuja sombopa na'en'caen a'i menia'su andengae ai'je.

⁴² Nane Chigaja tisema shondo'su Abrahamga tayopi tansintsse su'choma aqque'pambi.

⁴³ Chigaja tise in'jan'cho aindeccuma somboensi tsu avujatsse fundopa Egipto'ye sombo'fa.

⁴⁴ Toya'caen faesu aindeccumbe andema itsapa afepa tsa'su aindeccu tisu sema'cho'suma taiya'choma'qque itsapa tise'panga afe

⁴⁵ cuintsu anttembe'yi Na'su atesian'choma in'jamba tise manda'choma'qque pañamba tson'faye. ¡Ñotssi tsu Na'su Chigaja!