Salmos 104 - Cofán: Chiga Tevaen'jen

Agattoen'su Na'suma ñotsse afaya

¹ ¡Pa'cco in'jan'choi'ccu gi Na'suma ñotsse afaya! ¡Ña Na'su, ña Chiga, ñoa'me joccapitssia qui! Que ondiccu'je ñotssiaja a'tatssia've chanjun.

² Nane chanjunqque'su quema onccan'ma'caen ondiccupa qui sefaccoma'qque attajaen que can'jeña'chove.

³ Sefacco'su unjimba'cconga que tsa'o dyaiña'choma ccutsiansi tsa unjimba'cco'qque que jacan'cho caro tsu. ¡Nane fingian sanccopanga qui ancamba ja'je!

⁴ Fingianjan quian'me fingiamba que conda'choma anga'je. Si'nge'qque quema shondosundeccu tsu.

⁵ Pa'cco andema sefacco já ccutsuni ta'etsse dyaiñasi joqquitssi'masia tsu.

⁶ Mar na'enjan tso'si'e pa'cco andema piccopa ondiccu'jema ondiqquianqquia'caen pa'cco ccotta'ccoma'qque picco.

⁷ Tsa'ma queja na'ema tsanda afaqquia'caen iyu'usi pañamba tse'faei'ccuyi ccuyin ja.

⁸ Ccotta'cco'ye ai'je'cho sinjunccuni andepa tise mani can'jeña'ttive que mandasi japa tse'ttini jincho.

⁹ Nane queja otafama pasa'masia've mandasi pañamba tse'ttiyi jincho toequi jipa andema piccosa'ne.

³³ Ña toya cansepa can'jen'da gi Na'su, ña Chigama ñotsse settapoeña.

³⁴ Na'suveyi in'jamba avujatsse can'jemba gi in'jan ña tisene asi'ttaemba in'jansi cuintsu tise'qque avujatssiye.

³⁵ ¡Tsa'ma egae tsinconsundeccu tsu va ande'ye sefaya'cho! ¡In'jangae tsinconsundeccu tsu jimbi'tsse daya'cho! ¡Pa'cco ña in'jan'choi'ccu gi Na'suma ñotsse afaya! ¡Ñotssi tsu Na'su Chigaja!