Salmos 103 - Cofán: Chiga Tevaen'jen

Na'suma gi ñotsse afaya'cho

¹ Pa'cco ña canse'pai'ccu gi Na'suma ñotsse afaya. Pa'cco ña in'jan'choi'ccu gi tise ñotssia inisema ñotsse afaya.

² Pa'cco ña canse'pai'ccu gi Na'suma ñotsse afaya. Ni fae'ccoeyi'qque tise ñanga ñotsse tson'jen'choma aqque'paya'bi gi.

³ Na'su tsu pa'cco ña egae tsincon'choma joqquitssian'su. Tise tsu pa'cco ña paji'cho'ye ñama ccushaen'su.

⁴ Tise tsu ñama pa'cho'ye qquendyaen'su. Nane tise ñotsse in'jan'choi'ccu, tise mende'yepa afe'choi'ccu tsu ñama ttupa an'bian.

⁵ Osha'cho bove ñotssiai'ccu ña injama'cho in'jan'choma vuiquian. Nane cuna tose sho'yosi pindo quin'anme daqquia'caen ingi'qque chu'a quin'sui'ccu canse'faya.

⁶ Na'suja noñangiañesundeccuma fuiteye jongoesuma tansian'da tsu ñoa'me ñotsse fuitepa tansian.

⁷ Na'suja Moisésnga tise tsoña'choma condapa israendeccunga tise tson'jen'choma canjaen.

⁸ Na'suja ingima mende'yepa vasuitsse tson'jen. Nane iyu'umbe'yi pa'cco tise in'jan'choi'ccu ingima ñotsse in'jan.

⁹ Poi a'ta ingi injama'choma somboembi. Ni tsangae ingima iyicca'yembi.

¹⁰ Ingi egae tsincon'cho shaca injan'tssi'ma'qque toya tiseja ingi shacama iñajambi.

¹¹ Nane sefacco pa'cco andema piccoqquia'caen tiseja tise've in'jamba pañasundeccuma tsa'caen ñoa'me in'jan.

¹² Tayo tsu ingi egae tsincon'choma joqquitssian. Nane chiga sombo'je'cho chiga amppi'je'cho'ye biani jinqquia'caen ingi egae tsincon'choma biani joqquitssian.

¹³ Yaya tise dushundeccuma mende'yeqquia'caen tsu Na'suja tise've in'jamba pañasundeccuma in'jamba mende'ye.

¹⁴ Ande'su ccuttopa'sima agattoen'chove in'jamba ingija aqquia ñoña'cho qquen atesupa in'jan.

¹⁵ Poiyi'cco a'i tsu shoshovia'caen canse'fa. Nane te'ta afojoqquia'caen canseye ashaen.

¹⁶ Tsa'ma Na'su Chiga tise fingiain'ccu fingiansi te'ta pandiqquia'caen pasi majañi'qque tisema injan'jembi.

¹⁷ Tsa'ma tsangae tsu Na'su Chigaja tise've in'jamba pañasundeccuma in'jan'cho. Tsangae tsu tsambe omba'su dushundeccuma'qque tansintsse ñotsse tsoña.

¹⁸ Tsendeccu tisei'ccu injancco'fa'choma aqque'pambipa tise manda'choma pañamba tson'ninda tsu anttembe'yi ñotsse in'jaña.

¹⁹ Na'suja sefacconi can'jemba manda'jesi tise manda'cho'qque osha'cho jincho tsu.

²⁰ ¡Chigama sefacconi'su shondosundeccu, Na'su Chigama ñotsse afa'faja! Que'i quin'sui'ccu Na'su manda'choma pañamba tsonsundeccu qui.

²¹ ¡Chigambe sefacconi'su sundarondeccu, Na'su Chigama ñotsse afa'faja! Que'ija tisema shondopa tise in'jan'chove tsonsundeccu qui.

²² ¡Pa'cco Na'su agattoen'cho, Na'su Chigama ñotsse afa'faja! ¡Nane pa'cco Na'su agattoen'cho já ccutsuni'su'qque tise manda'choma ñotsse afa'faja! ¡Ña'qque gi pa'cco ña injama'choi'ccu Na'su Chigama ñotsse afaya!