Salmos 10 - Cofán: Chiga Tevaen'jen

Chiga fuiteya'chove iñajan'cho

¹ Na'su, ¿jongoesie qui biani can'jen? Ingi vana'jensi ¿jongoesie qui a'tu?

² Egae tsincon'suja, tisuja ñotssia qquen in'jamba oshambi'choama tta'ttapa indi. Tsa'ma injama'choni ma'caen qqueñañe in'jamba qquendeccopa tisuyi tsanga indiye.

³ Egae tsincon'suja tise injama'choni in'jangae in'jamba avujatsse tsane condase. Panshaen osha'chove in'jamba egae afapa Na'su Chigama afase.

⁴ Nane tsofa'tuma janchiamba quinsepoemba su: “Chigaja jimbi. Me'i'on tsu ña injama'choma somboen'suve.” Tsa'caeñi tsu tiseja in'jan.

⁵ Jongoesuve tsonsi ñotsse tsu naningeya. Majan tise injama'choma somboen'su can'jembisi attembipa tisei'ccu iyiccosundeccuma afasepa feña'jen.

⁶ Nane majañi'qque tisema joqquitssiañe oshambisi tsangae vanambe'yi can'jeña qquen tsu in'jan.

⁷ Tise aya'fa'qque anttembe'yi afasepa afopoemba cca'ima daño'jen. Nane tise aya'fai'ccu tsu tise noñangiamba vanae'choma a'tien'jen.

¹² ¡Na'su, jangipa que quin'suma canjaenjan! ¡Vanasundeccuma aqque'pajama!

¹⁵ ¡Egae tsonsundeccumbe tivema u'ccaqquia'caen tise'pa tson'jen'choma se'pija! ¡Tise'pa egae tsincon'cho shacama iñajanjan pa'ccoma fi'ttiya'ngae!

¹⁶ Nane tsangae tsu Na'su Chigaja manda'jeya. ¡In'jambindeqquia tsu tise ande'ye joqquitssiange'faya!