Rut 4 - Cofán: Chiga Tevaen'jen

Booz Rutma pushe'cho

¹ Tsonsi Boozja canqqueni japa canqquenga ca'niña'tti'su bo'je'cho jin'ttinga japa dyai. Tse'tti dyaipa Elimelec antian, tsa tise “ñama ti'tsse porotssi'su antian” qquen su'cho panshanjin'choma atte. Attepa Boozja tisema ttu'sepa su: —¡Quindya, vani jipa dyaija! Pañamba tise antianjan jipa dyai.

² Dyaisi Boozja faesu chonga tsa canqque'su coenzandeccuma'qque ttu'se cuintsu fae'ngae tisei'ccu dyai'faye. Poiyi'cco dyaisi

³ Boozja tise antianga qquen su: —Noemí Moab andene toequi jipa te ingi antian Elimelec'ye an'bian'cho andema chavaeñe in'jan.

⁴ In'jan gi que tsama atesuye. Que chavaye in'jan'da ja'ño tsa'caen tsoñe qquen suja poiyi'cco va coenzandeccu dyaipa paña'jen'ni. Tsa'ma que chavaye in'jambi'ta ñanga condaja. Nane queja Elimelec'ye ti'tsse porotssi'su antiansi quenga tsu o'tie antteye tise andema chavaya'chove. Tsa'ma que chavaye in'jambian'da ña chavaya'chove tsu antteya. Booz tsa'caen susi tise antianjan su: —Ju, chavaya gi.

⁵ Chavaya qquen susi Boozja su: —Ñotsse in'janjan. Queja Elimelec andema chava'ta qui tise dutssi'ye pa'chombe pushe, Rut, tsa Moab ande'su pushesuma pusheya'cho. Nane tsa'caen tsu pusheya'cho cuintsu isu'cho du'shu pa'chombe andema isuye.

⁶ Tsama pañamba tise antianjan su: —Tsa'caen daya'chomanda gi ñoa'me chavaye oshambi ña dutssi'ye coenzanga afeya'choma qqueñasa'ne. Tsa'ma que chavaye in'jan'da chavaja. Ña gi que chavaya'chove antte.

⁷ Nane tayopi'su israendeccu andema chavapa, toya'caen chavaya'chove anttepa tsu qquen atesu'fa: Chavaen'su tsu tise sapatoma shichhapa chava'sunga afe tsangae tsoña'cho qquen canjeñe.

⁸ Tsa'caen atesuchopa Booz antianjan tisu sapatoma shichhapa Booznga afepa su: —Que chavaja.

⁹ Tsa'caen afesi Boozja coenzandeccunga toya'caen tseni bo'fa'chondeccunga'qque su: —Poiyi'cco que'i qui ja'ño caña'jen'fa ma'caen ña Noemíma Elimelec'ye toya'caen Quelión'ñe, Mahlón'ñe andema chavaye su'choma.

¹⁰ Toya'caen qui caña'jen'fa ma'caen pa'cho Mahlón'ñe pushe, tsa Moab ande'su pushesuma, ña pusheye su'choma cuintsu tsa ande pa'cho Mahlón'ñe andea'caen jinchoye. Tsa'caen tsu tsoña'cho cuintsu tsa'ye inise toya'caen tsa'ye an'bian'choma'qque aqque'pambe can'faye.

¹¹ Tsa'caen susi coenzandeccu toya'caen tseni bo'fa'chondeccuja su'fa: —Ju, tsa'can'fa gi. In'jan'fa gi cuintsu Na'su Chiga va pushesu que tsaoni jiya'choma ñoa'me Raquel toya'caen Leama'caen tsoñe. Nane tsendeccu'ye tsu poiyi'cco israendeccuja isuyepa sombo'fa. Toya'caen gi in'jan'fa cuintsu queja Efrata'su joccapitssia a'ive dapa Belén'su ti'tsse'tssia've daye.

¹² In'jan'fa gi cuintsu Na'su Chiga tsain'bitssi dushundeccuve va pushesunga afe ánttesi queja injan'tssi antiandeccumbe yayave daye. Nane tsa'caen qui ingi tayopi'su antian Fares'caen daya, tsa Judá Tamarnga dusian'choa'caen.

¹³ Tsa'caen tsu Boozja Rutma pushe. Fae'ngae can'jensi Na'suja antte cuintsu Rut surie dapa tsandie du'shuve isuye.

¹⁴ Du'shuve isusi tseni'su pushesundeccuja Noemínga su'fa: —¡Ñotssi tsu Na'su Chigaja! ¡Ja'ño tsu du'shuma quenga afe quema coiraya'chove! ¡In'jan'fa gi cuintsu tsa du'shuja israe'su joccapitssia a'ive daye!

¹⁵ Nane que chinajan quema ñotsse in'jamba tsu siete dutssiyendeccuma ti'tsse quene bare. Tiseja va du'shuma quenga afesi du'shu tsu quema quiñaemba ñotsse coiraya que coenza ccasheve dasi.

¹⁶ Tsa'caen su'fasi Noemíjan du'shuma isupa tisema ñotsse in'jamba munsimba tisema coira'suve da.

¹⁷ Tsama attepa pporotsse canjensundeccuja su'fa: —¡Noemíjan tisutsse isuqquia'caen du'shuve isu! Tsomba du'shuma inisian'fa Obedve. Nane omboe Obedja coenzave dapa Isaí yayave da. Jai'ngae Isaíja Israel na'su David yayave da.

David tayopi'su antiandeccu

¹⁸ Va tsu tayopi'su Fares omba'su dutssiyendeccu: Faresja Hezrón yaya tsu.

¹⁹ Hezrón tsu Ram yaya. Ram tsu Aminadab yaya.

²⁰ Aminadab tsu Naasón yaya. Naasón tsu Salmón yaya.

²¹ Salmón tsu Booz yaya. Booz tsu Obed yaya.

²² Obed tsu Isaí yaya. Isaí tsu David yaya.