Rut 3 - Cofán: Chiga Tevaen'jen

Booz Rutma ñotsse afa'cho

¹ Fae a'ta Rut chan ccasheja tisema su: —China, ña gi tta'ttaya'cho que majama tsa'ndupa ñotsse canseya'chove.

² Nane queja tayo Boozmbe sema'su pushesundeccui'ccu sema'cho qui. Tsa Booz tsu ingi antian. Ja'ño cose tsu cebada nama qquesho'su jaya tise qquesho'jeccuni.

³ Tsa'cansi qquen tsonjan: Onjomba ño'memba que ti'tsse ñotssia vatama ondiccuja. Tsomba a'tutsse tise attesa'ne qquesho'jeccuni japa ronda'jeja tise amba cu'i naniña'ngae.

⁴ Cu'i nanimba anañe ccuisi ñotsse canjan tise ma'tti ana'jen'choma. Tsomba japa tise covijama fettaja tise tsu'ttenima. Fettapa tise tsu'ttei'ccu pporotsse ccuija. Tsa'caen tsonsi tise tsu condaya que ma'caen tsoña'chove.

⁵ Tsonsi Rutja su: —Pa'ccoma gi que suqquia'caen tsoña.

⁶ Tsa'caen supa qquesho'jeccuni japa tise chan ccashe mandaqquia'caen tson.

⁷ Omboe Booz amba, cu'i nanimba avujatsse japa anañe ccui qquesho'chombe boña utufanga. Rutja a'tutsse catsepa covijama fetta tise tsu'ttenima. Fettapa tise tsu'ttei'ccu pporotsse ccui.

⁸ Enttinge cose injanjangi bittapa Boozja atte pushesu tise tsu'ttei'ccu pporotsse ccui'choma.

⁹ Attepa iñajampaña: —¿Majan qui queja? Tsonsi Rutja su: —Ña gi Rut, quema shondo'su. Queta qui ña antian. Tsa'camba qui que ñama coiraya'cho. In'jan gi que ñama pusheye.

¹⁰ Tsonsi Boozja su: —¡Na'su Chiga tsu quema ñotsse tsoña! Tayoe ñotsse tsomba ja'ño'qque qui ti'tsse que tsa'ndu'yema ñotsse tsoñe in'jan ñama tsa'ndupa tise inisema du'shunga afepa. Nane majan ñama ti'tsse chu'ama, tise rico tsambi'ta va'chama, qui tsa'nduye osha. Tsa'ma queja tsa'caen injan'choma catipa ñama tsa'nduye afa.

¹¹ Tsa'camba dyojama, ña in'jan'cho. Ña gi que in'janqquia'caen tsoña. Nane poiyi'cco va canqquesundeccu tsu queja ñotssia pushesu qquen in'jan'fa.

¹² Ñoa'me gi que tsa'ndu'yembe pporotssi'su antian, quema pushepa coiraye. Tsa'ma faesu tsu ti'tsse pporotssi.

¹³ Va coseja va'ttinga a'taja. A'tasi tise quema pushepa pa'chombe inisema somboeñe in'jan'da cuintsu pusheja. Tsa'ma tise in'jambian'da ña gi quema pusheya. Nane Na'su Chiga paña'jen'ni gi tansintsse afa'je. ¡Ccuipa anajan a'taya'ngae!

¹⁴ Tsa'caen susi Rutja Booz tsu'ttei'ccu pporotsse ccuipa ana a'ta. Tsa'ma Boozja cuintsu faesundeccu pushesu tse'tti ana'chove atesumbe pasa'faye in'jamba ñoa'me sinte'yi toya a'ta ccutsumbi'te Rutma qquendyaemba

¹⁵ tisema su: —Que oppoen'jen'cho sarupama oshichhapa va'ttinga ppaiñajan. Rut tsa'caen tsonsi Boozja cebadama ochenta librave tsanga tuiña. Tuiña on'boemba tisema fuitepa opiansi toequi canqqueni ja.

¹⁶ Rut japa tise chanccashe can'jeni nepisi Noemíjan iñajampaña: —¿Mingae tsu da, china? Tsonsi Rutja pa'cco Booz supa tson'choma tisenga conda.

¹⁷ Toya'caen tsu su: —Va cebadama ñanga afepa tsu su ‘In'jambi gi cuintsu que me'cco que chanccasheni jaye.’

¹⁸ Tsonsi Noemíjan su: —Ja'ño, china, jinge ronda'jeye mingae tsu tson'me'se. Nane va tsandieja ja'ño a'tayi tsu osha'choma nanitsse tsoña.