Rut 2 - Cofán: Chiga Tevaen'jen

Rut Booz nasipani sema'cho

¹ Noemí tsa'ndu Elimelec'ye antian tsu can'jen, Booz, qquen inisecho'cho. Boozja ñoa'me joccapitssia a'i.

² Fae a'ta Rutja Noemíma su: —Ñama antteja cca'i nasipani japa majandeccu ñama antte'nijan tise'pa tai'jesi sheque'je'choma tai jacamba jiye. Tsonsi Noemíjan su: —Jujú, ja'se china.

³ Tsa'caen susi nasipani japa Rutja taisundeccumbe sepaccoe shequepama tai'chó jacan. Ñotsse somboqquia'caen tsu ñoa'me Elimelec antian Booz nasipani tsa'caen sema'jen.

⁴ Toya'caen tsequi a'ta Boozja canqquene nepipa tise'be taisundeccuma chigambian: —¡Cuintsu Na'su Chiga que'i'ccu can'jenjan! Ccane'qque chigambiamba su'fa: —¡Cuintsu Na'su Chiga quema ñotsse tsonjan!

⁵ Chigambian nanimba Boozja tise mandasi taiña'suma iñajampaña: —¿Majan'su tsu jova chu'a pushesuja can'jen?

⁶ Tise mandasi taiña'suja su: —Tsata tsu Moabita'su pushesu, voeyi Noemí'ccu Moab andene ji'cho.

⁷ Tiseja ‘Chigáne ñama antteja taisundeccumbe sepaccoe tise'pa shequian'jen'choma tai jacañe,’ qquen susi gi tisema antte. Anttesi tsu sinte'yi ji'cho ja'ño'qque anttembe'yi quian'me sema'jen. Nane voeyi tsu re'riccone ño'fa.

⁸ Tsa'caen pañamba Boozja Rutma su: —Shi'mppi, ñama pañajan. Faesu nasipani jajama sheque'je'choma taiye. Tsa'ma vani sombombe'yi ñambe sema'su pushesundeccui'ccu can'jenjan.

⁹ Ñotsse canjan manima ñambe taisundeccu tai'je'nija tseni jaja. Tayo gi ñambe tai'su tsandiendeccuma su cuintsu quema noñangiambe can'faye. Toya'caen qquipoe'su'ta dyombe'yi tsa'ccu apinga japa cu'ija. Tayo tsu ñambe sema'su tsandiendeccuja tsesunga on'boen'fa.

¹⁰ Booz tsa'caen susi Rutja andenga puntssamba su: —¿Jongoesie qui ñajan faesu ande'su a'imajan panshaen ñotsse ñama afa?

¹¹ Boozja su: —Tayo gi paña'jen que ma'caen que tsa'ndu'ye pasi tisu chan ccashema anttembe'yi ñotsse fuite'je'choma. Toya'caen que yaya, que mama, que andema'qque catipa qui ji va que atesumbi'choa andeni'su aindeccui'ccu can'jeñe.

¹² Que tsa'caen tsomba Na'su israe'su Chiganga jipa tise coira'je'choni ño'faqquia'caen can'jen'ninda cuintsu tise antteja quenga ñotsse afepa tsoña'chove.

¹³ Pañamba Rutja su: —Ña na'su, queja ña quema shondo'suma ñotsse afasi gi opatsse canseya. Ñoa'me nepimbi gi quema shondoye. Tsa'ma avujatsse gi que ñotsse afa'choma in'jan.

¹⁴ Poiyi'cco semasundeccu aña'cho nepisi Boozja Rutma su: —Jipa panma isupa vino tsa'ccunga tssipoemba anjan. Jipa taisundeccui'ccu dyaisi Boozja cebada sheje'cho'pama tisenga afe. Tise an tteppu'ni'qque toya tsu antteye'choja jin.

¹⁵ Rut ccase tai'jesi sheque'je'choma taiye jangisi Boozja tise'be sema'su tsandiendeccunga su: —Tayo taipa tandan'cho jin'tti pporotsse sheque'choma tai'je'ni'qque iyu'u'fajama dyopa ansangesa'ne.

¹⁶ Toya'caen tayo taipa tandan'cho'suma'qque majan namajan injanga shichha cati'faja cuintsu tise tsama isupa boñañe. Tisema iyu'u'fajama.

¹⁷ Tsa'caen tsu Rutja Booz nasipani japa cose'tsse shequepama taipa boña. Tsomba tise tai'choma tti'ttipa agattosi cuarenta librave tsu nepi.

¹⁸ Tsama tsu canqqueni ipa tise chan ccashenga afesi atte ñotsse boña'choma. Toya'caen tsu Rutja an antteye'choma somboemba afe.

¹⁹ Attepa tise chan ccasheja iñajampaña: —¿Mani japa qui shequian'jen'fa'choma injan'tsse tai boña? ¿Manima qui sema? Ñotssi tsu majan a'i quema in'jamba tsa'caen fuitesi. Tsonsi Rutja tise chan ccashenga conda majambe nasipa'su sema'bama tisu sema'chove. —Ña ja'ño japa sema'jen'cho'su na'su iniseja Booz tsu.

²⁰ Pañamba Noemíjan tise chinama su: —¡Tise ñotsse tsonsi cuintsu Na'suja tisema ñotsse tsonjan! Nane Na'suja anttembi tsu ingi cansendeccui'ccu toya'caen tayo pa'chondeccui'ccu tisu ñotsse tson'jen'choma. Tsa tsandieja ingi antian tsu. Tsa'camba tise tsu ingima coiraya'cho.

²¹ Tsa'caen susi Rutja su: —Toya'caen tsu tiseja ñama su: ‘Ñambe semasundeccui'ccu fae'ngae can'jemba semajan va tai'je'choma naniña'ngae.’

²² Tsonsi Noemíjan tise chinama su: —Ju, ñotssi tsu, china, queja tise'be sema'su pushesui'ccu fae'ngae can'jemba semajan faesumbe nasipani jasi quema noñangian'fasa'ne.

²³ Tsa'caen susi Rutja Boozmbe sema'su pushesundeccui'ccu pporotsse semamba sheque'je'cho nama taipa boña cebada toya'caen trigoma tai'je'choma nani'faya'ngae. Tsa'caen tsu tsain'bitsse tisu chan ccashema fuitepa canse.