Rut 1 - Cofán: Chiga Tevaen'jen

Elimelec Moab andeni ja'cho

¹ Ñoquiansundeccu mandaite pa'cco israe'su andeni tsu qquipoesuiteve da. Tsa'caen dasi fae Judá'su tsandie tise Belén canqquema catipa tise pushe, tise dos dutssiyendeccui'ccu Moab andeni ja'fa tseni can'jenccaye.

² Tsa tsandie iniseja Elimelec. Tise pushe inise Noemí. Dutssiyendeccu tsu Mahlón toya'caen Quelión. Judá ande'su Belén canqque'su efrateondeccu tsu. Moabni japa can'jen'fa.

³ Can'jemba Elimilecja pa. Pasi tise pushe Noemíjan can'jen dos tsandie du'shui'ccu.

⁴ Dushundeccuja coemba Moab ande'su pushesundeccuma pushe'fa, fa'emajan Orfa, faesumajan Rut. Tsomba diez canqque'fa tseni can'jemba

⁵ Mahlón toya'caen Queliónjan pa'fa. Tsa'caen tise tsa'ndu toya'caen tise dos dutssiyendeccu pa'fasi Noemíjan tsandupanjen'cho canse.

Noemí toya'caen Rut Beléni ji'cho

⁶ Toya Moabni can'jemba Noemíjan paña Na'su Chiga tise israe'su aindeccuma fuitesi anqque'su ccase atapa'choma. Tsa'caen pañamba Noemí tise dos chinai'ccu ñoña'fa toequi Beléni jiye.

⁷ Dos chinai'ccu tise'pa can'jene sombopa tsaiqui'ye ja'fa toequi Judá andeni jiye.

⁸ Tsomba Noemíjan tise chinandeccuma su: —Toequi jaja'faja que'i mama tsaoni. Cuintsu Na'su Chiga que'i ña dutssiyendeccu'yema ñotsse tsomba ñama'qque ñotsse tsonqquia'caen que'inga'qque ñotsse tsoña'chove antteye.

⁹ Toya'caen cuintsu que'i faesu tsandiendeccuma tsa'ndupa opatsse canse'faya'chove antteye. Tsa'caen supa poiyi'ccoma mochasi quian'me i'namba

¹⁰ tisema su'fa: —Me'in, ingija quei'ccu jaye que andeni.

¹¹ Tsa'ma Noemíjan su: —Que'i tsaoni ja'faja, ña chinandeccu. ¿Jongoesie qui ñai'ccu fae'ngae jiye in'jan'fa? Ti'tsse tsandie dushundeccuve isuya'bi gi cuintsu que'i tsandundeccuve da'faye.

¹² Tsa'cansi que'i tsaoni ja'faja, ña chinandeccu. Ñajan panshaen coenza gi ccase tsa'nduye. Mapan ña coenzambipa ja'ño a'ta tsandu'pa ja'ño cose du'supa tsandie du'shuma isu'ni'qque

¹³ ¿ti qui que'ija coeñanga ron'dá can'jen'faya? Me'in, chinandeccu, Na'su ñama vanaemba que'ima'qque vanaesi gi ti'tsse ñombi'ye'faya.

¹⁴ Tsa'caen susi ti'tsse i'na'fa. I'namba Orfaja tise chan ccashema mochapa ja. Tsa'ma Rutja anttembe'yi Noemíma in'jan.

¹⁵ Tsonsi Noemíjan su: —Que canjan, jovaja tise aindeccuni tise chiganga'qque toequi ja. Que'qque tisei'ccu fae'ngae jaja.

¹⁶ Tsa'ma Rutja su: —Ñama mandajama quema catiye ni toequi jaye. Que mani ja'ninda gi tseni ña'qque jaya. Que mani can'jen'ninda gi tseni ña'qque can'jeña. Que aindeccu tsu ña aindeccuve da'faya. Que Chiga tsu ña Chigave daya.

¹⁷ Que mani pa'ninda gi ña'qque tseni papa a'tuyeya. Nane toya pambe'yi ña que'ye attu'fa'ninda cuintsu Na'su Chiga ñama ñoa'me vanaejan.

¹⁸ Rut tsa'caen susi Noemíjan in'jan tise fae'ngae jiye in'jan'chove. Tsa'caen in'jamba ti'tsse noñangiambe'yi antte.

¹⁹ Anttepa tsa dos pushesundeccu jí nepi'fa Belén canqqueni. Tseni nepisi poiyi'cco tsa canqquesundeccu in'jamba iñajampaña'fa: —¿Vata ti vane sombopa ja'cho Noemí?

²⁰ Pañamba Noemíjan su: —Ja'ño ñama su'fajama ‘Noemí’ (ansintssi qquen suye). Tsa'ma ñama su'faja ‘Mara’ (inza'o qquen suye). Ñoa'me tsu Osha'choma Oshacho'cho Chigaja ña canse'choma inza'e tson.

²¹ Osha'chove an'biamba vane sombopa gi tsene'jan va'chave dapa toequi ji. ¿Jongoesie qui ñama su'fa ‘Noemí’? Nane Na'su Osha'choma Oshacho'cho Chiga tsu ñama chi'gapa vanae.

²² Tsa'caen tsu Noemíjan Moab andene toequi ji tise china Rut, tsa Moab'su pushesui'ccu. Tise'pa jisi tsu ñoa'me cebadama taiya'choja nepi.