Proverbios 3 - Cofán: Chiga Tevaen'jen

In'jan'chove atteye'cho

¹ Ña du'shu, ña quema atesian'choma aqque'pajama. Ña manda'choma'qque ñotsse injan'jenjan.

² Tsa'caen tsomba qui bo'tsse cansepa poi a'ta avujatsse can'jeña.

³ Tsangae tisupapora ñotsse in'jamba tansintsse afapa canseja. Nane andupama aqque'paye oshambiqquia'caen tsama'qque aqque'pambitsse que injama'chonga tevaenqquia'caen an'bianjan.

⁴ Tsa'caen cansesi tsu Chiga, toya'caen faesu aindeccu'qque quema in'jamba que ñotssia inisema injan'jen'faya.

⁵ Pa'cco que injama'choi'ccu Na'suma ñotsse in'jamba tise've ronda'jeja. Tsa'ma tisu injama'cho asi'ttaemba in'jan'choma antteja.

⁶ Jongoesuma tsoñe in'jan'da o'tie Na'suma in'janjan. Tiseja que tsaiquima tansianqquia'caen quema fuiteya ñotsse tansintsse in'jamba canseye.

⁷ Tisuja ñoa'me injama'pa qquen in'janjama. Tsa'ma Na'suve in'jamba pañamba osha'cho ega'ye joqquitssija.

⁸ Tsa'caen canseye tsu bove ñotsse ccushaenqque'su seje'pa'caen que ai'voma quiñaeña.

⁹ Que corifin'di'ccu Na'suma ñotsse tson'jemba que tai'cho'su o'tie isu'choma'qque tisenga afeya'cho.

¹⁰ Tsa'caen tsonsi tsu que trigoma coira'je'cho tsa'o on'bapa shequejisi que vinoma fiña'jen'cho tanque'qque vino on'basi osha'jeya.

¹¹ Ña dutssi'ye, Na'su quema iyu'u'choma chi'gajama. Tise quema nafattian'ni'qque iyicca'yejama.

¹² Nane Na'suja yaya tise in'jan'cho dutssi'yema nafattianqquia'caen majan tise in'jan'choma ñotsse in'jamba tsa'caen iyu'u.

¹³ Avujatssi tsu majan a'i atesuqque'suve tta'ttapa atte'cho. Ñoa'me atesupa in'jamba tsu avujatssi.

¹⁴ Atesupa in'jan'choja totoacorima ti'tsse barepa cori'ccu chava'choma ti'tsse somboqque'su tsu.

¹⁵ Atesupa in'jan'choja bare'cho patuma ti'tsse bare. ¡Nane osha'cho bare'chove in'jan'choma ti'tsse tsu bare!

¹⁶ Atesupa in'jan'choja tansinfa'su tivei'ccu bo'tsse can'jeña'choma afepa pavefa'su tivei'ccuja osha'choma an'biamba joccapitsse daqque'suma afeqquia'caen tsu afe.

¹⁷ Tisema omboencanqquia'caen avujatsse can'jemba tise tsaiquinga ja'ta opatsse canseya'cho.

¹⁸ Atesupa in'jan'choma tta'ttapa atte'ta ñoa'me canseya'cho. ¡Attepa an'bian'da ñoa'me avujatssiya'cho!

¹⁹ Na'su Chigaja atesupa in'jan'choi'ccu andeve agattoemba osha'choma in'jamba sefaccove'qque agattoen.

²⁰ Nane atesupa in'jan'choi'ccu fae mar tsa'ccu'ye faesu marve attufaemba antte cuintsu unjimba'qque surunoi'ccu andenga tssipoen'jeñe.

³³ Na'suja egae tsincon'sumbe tsa'oma sefaeñe qquen supa ño'ambe tsaoni can'jensi poiyi'cco tse'tti'su avujatssi'fa.

³⁴ Na'suja tisu ñotssi qquen in'jamba afasesundeccuma ccane'qque afasepa cca'ima quinsepoembipa opatsse canse'chondeccuma ñotsse tsoña.