Oseas 6 - Cofán: Chiga Tevaen'jen

Israel shandaye qquen in'jan'cho

¹ Jinge poiyi'cco shandapa ccase Na'sunga ja'faye. Tiseja ingima daño'an'qque ccushaeña. Ingima iñaccaen'an'qque se'jeya.

² Nane uta'tsseyi tsu ingima ccushaemba ccutsiaña tise in'janqquia'caen canse'faye.

³ ¡Jinge quin'tsse tta'tta'faye Na'suma atesuye! Nane coejechiga pasambi'tsse sinte sombo'jeqquia'caen tsu Na'suja ñoa'metsse jiya. Unjin sanfani toya'caen coejefani tuiye ashaenqquia'caen tsu tiseja ñoa'metsse jiya.

Na'su pañamba su'cho.

⁴ Na'suja qquen su: “Efraín (israendeccu): ¿Jongoesian gi quei'ccu tsoña? Judá (judándeccu): ¿Jongoesian gi quei'ccu tsoña? Que'i ñama in'jan'choja ñoa'me sinte'su ccuttopa'sia'can tsu. Nane sinte'su suruno'caen junde tsu metsse daya.

⁵ Tsa'cansi ña aya'fama afasundeccu afa'choi'ccu gi que'ima chattuqquia'caen dañomba ña aya'fai'ccu que'ima fi'tti. Nane tsanda veyaenqquia'caen gi cushoan'me a'ima injama'choma somboeñe atesu.

⁶ Ñanda gi osha'cho afe'choma ñanga afembe'yi ñama ñotsse in'jan'faye que'ima in'jan. In'jan gi cuintsu jongoesuma oque oraembe'yi ñama in'jan'faye que'i Chigave.”