Oseas 1 - Cofán: Chiga Tevaen'jen

Oseas pushe, du'shu'qque

¹ Uzías, Jotam, Acaz toya'caen Ezequías Judá andema manda'je'ni tsu qquen Na'suja Oseasnga conda. Oseasja Beeri dutssi'ye tsu. Na'su qquen condasejeite tsu Joás dutssi'ye, Jeroboamjan Israel ande na'su.

² Pushe tisu tsa'nduma catiqquia'caen israendeccuja Na'suma catipa ñoa'me egae tsincon'fa. Na'suja tsama Israelnga canjaeñe in'jamba Oseasnga qquen su: “Japa tisu ai'voi'ccu gana'su pushesuma pushepa dushundeccuve an'bianjan. Tsendeccuya tsu ega pushesumbe dushundeccu.”

³ Na'su tsa'caen mandasi Oseasja Diblaim onque'nge, Gomerma pushe. Pushesi surie dapa tsandie du'shuve isu.

⁴ Isusi Na'suja Oseasnga su: “Va du'shumajan Jezreelve inisianjan. Nane junde gi ande na'su Jehú dutssiyendeccuma vanaeña Jehú Jezreel canqqueni tayopi can'jemba egae tsincon'chone. Tsangae gi Israel manda'je'choma nepiaña.

⁵ Nane tsequi a'ta gi Jezreel sinjunccuni pa'cco Israel sundarondeccuma me'tsse sefaeña.”

⁶ Can'jemba Gomerja ccase surie dapa pushesu du'shuve isu. Isusi Na'suja Oseasnga su: “Va pushesu du'shuma Lo-ruhamame inisianjan, Ña israendeccuma mendeyeya'bi qquen canjaeñe. Toya'caen tise'pa egae tsincon'choma joqquitssiaña'bi gi.

⁷ Tsa'ma judándeccuma gi mendeyepa ña, Na'su, que'i Chiga tise'pama ccushaeña. Gerai'ccu tise'pama ccushaeña'bi gi ni battittianccu ni matichi, ni cavayo ni cavayo'su sundarondeccui'ccu ccushaeña'bi gi. Tsa'ma tisutsse gi ccushaeña.”

⁸ Omboe Lo-ruhama chochoma anttesi Gomerja ccase surie dapa faesu tsandie du'shuve isu.

⁹ Isusi Na'suja Oseasma afapa su: “Va du'shuma Lo-amime inisiaña'cho, que'ija ja'ño ña a'imbi qquen suye. Toya'caen ñajan que'i Chigambi gi.”

Israendeccu ccase Chiga aindeccu

¹⁰ Jai'ngae israendeccuja mar'su sisipa'caen tsain'bitsse atapasi majañi'qque tise'pama agattoye osha'faya'bi. Tsequi a'ta Na'suja “Que'ija ña a'imbi” qquen afambipa “Que'ija tsangae canse'cho Chigambe dushundeccu qui” qquen tsu suya.

¹¹ Tsequi a'ta tsu judándeccuma israendeccui'ccu fa'enga setsama'caen fae a'ive da'faya. Toya'caen fae na'su tsu tise'pama manda'jeya. Nane tsequi a'ta Jezreel joccapitssia've dasi tsu poiyi'cco ccase Jerusaléni bo'faya.