Números 31 - Cofán: Chiga Tevaen'jen

Madiánma sefaen'cho

¹ Na'su Chigaja Moisésma ttu'sepa su:

² “Madiandeccu israendeccuma qqueña'chone tsu ccane'qque tise'pama sefaeña'cho. Tsa'caen tson nanimba qui paya.”

³ Chiga tsa'caen susi Moisésja aindeccunga su: —Majan que'i'sundeccu geraeña'chove ñoñamba madiandeccui'ccu iyicco'faja que'ima qqueña'chone toya'caen Na'su Chiga inisema qqueña'chone.

⁴ Nane poi doce aindeccu'suma tsu mil tsandieveyi geranga moeña'cho.

⁵ Tsa'caen susi pañamba poi aindeccu'su mil sundarove dapa doce mil sundarove pa'ccoja sombo geraeñe.

⁶ Moisésja Fineesma, tsa Chigama afa'su na'su Eleazar dutssi'yema, sundarondeccu na'suve tson. Geranga jayipa Fineesja osha'cho Chigambe jincho'cho, toya'caen tsonjen'cho randema anga tsai'ccu iyiccoya'chove fendoye.

⁷ Tsa'caen japa madiandeccui'ccu iyiccopa pa'ccoma sefaen'fa Na'su Chiga Moisésnga mandaqquia'caen.

⁸ Nane cinco madián'su nasundeccuma fi'tti'fa, tsa Evi, Requem, Zur, Hur toya'caen Reba. Toya'caen tsu Balaam, tsa Beor dutssi'yema'qque fi'tti'fa.

¹⁵ Tsa'ma Moisésja israendeccuma iyicca'yepa su: —¿Jongoesie qui pushesundeccuma canseye antte'fa?

¹⁶ Tsendeccu Balaam su'choma pañamba tson'fa israendeccuma qqueñañe. Nane qqueñasi israe'su tsandiendeccu Na'suma catipa Baal-peorma iñajamba tsa pushesundeccui'ccu egae tsincon'fa. Tsa'caen tson'fasi Na'suja paqque'sui'ccu israendeccuma vanae.

¹⁷ Tsa'cansi va pushesundeccuma'qque poiyi'cco majan tsandiendeccui'ccu can'jen'fa'choma fitti'ttiya'cho, poi tsandie du'shuma'qque.