Números 24 - Cofán: Chiga Tevaen'jen

¹ Tsa'ma Balaamjan Na'su Chiga Israelma ñotsse tsoñe in'jan'choma in'jamba tise tayoe a'tutsse japa afa'jeqquia'caen tsombe tansintsse a'i menia'ma can.

² Tsa'caen camba Balaamjan doce israe'su aindeccuve attufaen'choma attesi Chiga Qquendya'pa tisenga ca'nisi

³ qquen jai'ngae tsoña'chove afa: “Vata tsu Beor dutssi'ye Balaam jai'ngae tsoña'chone afa'cho. Nane tso'fei'ccu tansintsse camba afa'cho tsu.

⁴ Ñoa'me Chiga su'choma pañamba afa'cho tsu. Nane tiseja andenga ccuiye amppisi Osha'choma Oshacho'cho Chiga tisenga canjaemba tise tso'fema fettasi tsu atte.

⁵ Jacob aindeccu, ñoa'me ñotssi tsu que'i carpa tsa'o sheque'cho. Israendeccu, ñoa'me ñotssi tsu que'i can'jen'tti.

⁶ Nane naifani sheque'cho ñotssia nasipa'caen que'ija teta'je'fa, Na'su Chiga jon'cho seje'pa'can'fa qui. Toya'caen naifani shaga'tto ccutsuqquia'can'fa qui.

⁷ Israendeccuja tsa'ccuma shacambitsse an'bian'faya tisupa cu'iye, toya'caen jomba'chonga fiñaña'chove'qque. Tise'pa na'su'qque Agagma patsusi Tise'pa manda'choja ti'tsse'tssiya.

⁸ Chiga tise'pama Egiptone somboen'su tsu tise'pambe. Tsa'cansi tsu tsampi'su vaura tise can'choi'ccu dyoñaqquia'caen dyojo'fambi. Nane Israelja tsu'ttama an shequianqquia'caen patsuya. Tise'pai'ccu iyicco'suma battittianccui'ccu battian fi'ttiya.

⁹ Ño'faye ccui'ta tsu ttesia'caen attiaña. Tsa'cansi majañi'qque tisema jangiañe oshambi. ¡Majan quema ñotsse afa'ta cuintsu ñotsse daye! ¡Majan quema dañoñe egae afa'ta cuintsu egae daye!”

Jai'ngae tsoña'chone afa'cho

¹⁰ Balaam tsa'caen afasi ande na'su Balacja ñoa'me tisema iyicca'ye. Iyicca'yepa tise tivema faesu tivei'ccu tssaijeñamba su: —¡Ñajan quema ttu'se ñama iyiccayesundeccuma egae afaye! Tsa'ma queja tres se tise'pane ñotsse afa.

¹¹ ¡Bove ñotssi tsu que tsaoni junde jaye! ¡Ñajan ñotssiama quenga afeye qquen susi tsu que ‘Na'suja’ se'pi ña tsa'caen afeye!

¹² Tsa'caen susi Balaamjan Balacnga su: —Tayo gi quenga condasesundeccunga, qquen conda:

¹³ ‘Mapán cori, totoacori que tsaoni jincho'choma afe'ni'qque ñajan Na'su Chiga su'choma pasapa ni ñotsse ni egae tsoñe oshambi gi. Toya'caen tisu in'jan'choma afaye oshambipa Na'su su'choveyi gi afaye osha.’

¹⁴ Ju, ja'ño gi jaya ña andeni. Tsa'ma toyi'te gi va aindeccu que'ima jai'ngae tsoña'choma qquen condaseya:

¹⁵ Tsa'caen supa Balaamjan qquen su: “Vata tsu Beor dutssi'ye Balaam jai'ngae tsoña'chone afa'cho. Nane tso'fei'ccu tansintsse camba afa'cho tsu. Ñoa'me Chiga su'choma pañamba afa'cho tsu.

¹⁶ Na'su Chiga Balaamma in'jaensi tsu in'jamba afa'je. Nane andenga ccuiye amppisi Osha'choma Oshacho'cho Chiga tisenga canjaemba tise tso'fema fettasi tsu atte.

¹⁷ Jai'ngae'su osha'choma gi atte. Ñoa'me jai'ngae'suma gi bianima atte. Fae o'fe tsu Jacob aindeccu'ye somboya. Fae Na'su tsu israendeccu'ye somboya. Tsaja camba'juma doñaqquia'caen Moab aindeccuma patsuya. Nane pa'cco Set dutssiyendeccumbe tsove tsu'ttama tsu doñaña.

¹⁸ Edom ande, tsa Seir'su, tisema iyiccayesundeccuma'qque tsu patsuya. Tsa'ma Israelmajan quinsetssive tsu tsoña.

¹⁹ Nane Jacob aindeccu'ye tsu Na'su Patsu'suja sombopa canqqueni toya canjensundeccuma sefaeña.”

²⁰ Tsomba Balaamjan Amalec aindeccuma attepa qquen su: “Amalecja poi aindeccuma ti'tsse'tssia tsu. Tsa'ma osefa'poe tsu me'tsse daya.”

²¹ Tsomba Balaamjan Quenitas aindeccuma attepa qquen su: “Caín omba'su dutssiyendeccu qui. Dyombe'yi qui can'jen'fa, chhiriria patunga tsao'paenqquiacaen.

²² Tsa'ma Asiriandeccu que'ima indi ji sefaeña.”

²³ Tsomba Balaamjan ccase jai'ngae tsoña'chove qquen afa: “¡Ay! Chiga tsa'caen tsonsi ¿majan tsu ccushaya?

²⁴ Nane Chipre andeni sheque'cho barco tsu cattufapa Asiria toya'caen Heberma patsuya. ¡Tsa'ma tsa'caen patsupa tsu jai'ngae patsuyeya!”

²⁵ Tsa'caen supa Balaamjan jangipa ja tisu andeni. Toya'caen Balac'qque tisu tsaoni ja.