Números 23 - Cofán: Chiga Tevaen'jen

¹ Tsa'caen ansundepa Balaamjan su: —Va'ttinga siete oque oraen'jen'chove ñoña'faja ñambe. Toya'caen siete vaura du'shu quitsaye, siete oveja quitsayema'qque fi'ttipa ñoña'faja.

² Tsa'caen susi Balacja Balaam suqquia'caen tson. Tsa'caen tsomba tsa dos fae'ngae oque'fa. Nane poi tsu fae vaura du'shu, fae oveja poi oque'je'chonga ottaemba oque'fa.

³ Tsa'caen tson nanimba Balaamjan Balacnga su: —Queja va'tti va oque'je'choi'ccu can'jenjan, ña japa atesuye Na'su Chiga te ñama cachuiye ji've'se. Tsene jipa gi quenga condaya tise ñanga attiamba su'choma. Tsomba tse'i Balaamjan a'i menia'su ccotta'cconga jasi

Israendeccuma ñotsse afa'cho

⁴ Chigaja tisenga attian. Attepa Balaamjan Chiganga su: —Siete oque'je'chove gi ñoña. Poiyi'cconga gi vaura du'shu, toya'caen ovejama'qque oque.

⁵ Tsa'caen susi Na'su Chigaja Balaam ma'caen afaya'chove afafaemba su: —Toequi Balac can'jeni japa ña quenga suqquia'caeñi suja.

⁶ Tsa'caen susi toequi jipa Balaamjan Balac oque'je'tti jin'tti ccutsu'choma atte, toya'caen poiyi'cco moabita'su coenzandeccuma'qque.

⁷ Tsa'caen attepa Balaamjan va su'choma conda: “Chiga sombo'jeni'su ccotta'cco Aramne gi ji moabita'su na'su Balac ttu'sesi. ‘Jipa israendeccuma qqueñañe afaja. Jacob aindeccuma egae in'janjan’ qquen tsu su.

⁸ Tsa'ma ¿ma'caen gi qqueñaña Na'su Chiga qqueñambian'da? Toya'caen ¿ma'caen gi egae in'jaña Na'su Chiga tsa'caen tsombian'da?

⁹ Va se'fatssia ccotta'cco'su patuvo'cho'ye gi atteye osha. Vambe tansin'chone gi can. Tsa aindeccuta tsu cca'tti can'jen'fa. Faesu a'iacan'fambi tsu. Sisipa'caen tsu tsendeccuja tsain'bitssi'fa.

¹⁰ ¿Majan tsu tsama agattoyeja oshaya? ¿Majan tsu tise'pa mi'nge'tssia've atesuya? ¡Ma'caen'qque te gi tsa ño'an aindeccui'ccu fae'ngae paye'can! Nane tise'pa papa ma'caen da'je'nijan ña'qque tsa'caen daye'can.”

¹¹ Tsa'caen su'jesi Balacja Balaamma su: —¿Mincón qquen qui tson'jen? Ñanda gi quema i va ñai'ccu iyiccosundeccuma qqueñañe. Tsa'ma queja tise'pane ñotsse afa'je.

¹² Tsonsi Balaamjan su: —Tayo gi conda, ñajan jo'su Na'su Chiga su'choveyi gi suya qquen.

¹³ Tsa'ma Balacja ccase afapa su: —Ñai'ccu jija cca'ttinga. Tse'ttieta qui pa'ccoma attembipa jo'su canqque utufaveyi atteya. Tseni japa tise'pane egae afaja.

¹⁴ Tsa'caen supa Balacja Balaamma anga Zofim nasipa tsa Pisga ccotta'cco tansin'choni. Tseni siete oque oraen'jen'chove ñoñamba poinga fae vaura du'shu toya'caen fae ovejama ottaemba oque'fa.

¹⁵ Tse'ttinga tsu Balaammajan Balacma su: —Queja va'tti va oque'je'choi'ccu can'jenjan ña japa Chigama cachui'ngaye.

¹⁶ Tsa'caen jasi Na'su Chiga Balaamma cachuipa ma'caen afaya'chove afafaemba toya'caen qquen su: —Balac can'jen'ni japa ña quenga suqquia'caeñi afaja.

¹⁷ Tsa'caen susi toequi jipa Balaamjan Balac oque'je'tti jin'tti ccutsu'choma atte, toya'caen poiyi'cco moabita'su coenzandeccuma'qque. Jisi Balacja iñajampaña: —¿Mingae tsu Na'suja su?

¹⁸ Tsa'caen susi Balaamjan qquen su: “Zipor dutssi'ye Balac, ñotsse in'jamba ña su'choma pañajan.

¹⁹ Chigaja ingi a'ia'cambipa afopoembi ni cambiaña'bi. Nane tise ma'caen su'ta tsu tsa'caen tsoña. Tise ñoa'me tsoña qquen su'ta tsu tsa'caen tson.

²⁰ Tise ñotsse afaja qquen mandasi gi ñotsse afa'je. Chiga ñotsse afa'choma ñajan egae afaye oshambi.

²¹ Nane atte'fambi tsu Israendeccu, tsa Jacob aindeccu, afopoen'cho ni egae tson'choma. Tise'pa Na'su Chiga tise'pai'ccu can'jensi tsu tise'paja tisema Na'suve an'bian'fa.

²² Chiga tise'pama Egipto'ye somboen'su tsu tise'pambe. Tsa'cansi tsu tsampi'su vaura tise can'choi'ccu dyoñaqquia'caen dyojo'fambi.

²³ Jacobma dañoñe moe'cho'qque barembi. Toya'caen israendeccuneja coraga'qque barembi. Ja'ñonda tsu ñoccatsse israendeccune qquen afaya'cho: ‘¡Mi'nge'e'qque tsu Chigaja que'i'ccu ñocca'tsse tson!’

²⁴ Nane ttesi jangipa aña'choma omboemba japa indipa tte'pputsse amba tsa'su anjampama cu'ipa ccuiqquia'can tsu.”

²⁵ Tsa'caen Balaam susi Balacja su: —¡Ya'caen tsendeccune egae afaye oshambi'ta tise'pane ñotsse afajama!

²⁶ Tsa'caen susi Balaamjan su: —¿Minga'in ñajan jo'su ‘Na'su Chiga mandaqquia'caeñi afaya’ qquenjan su?

²⁷ Tsonsi Balacja su: —Jija cca'ttinga gi quema angaya. ¿Tseni ja'ninda ti Chigaja antteya'bi que israendeccune egae afaya'chove?

²⁸ Tsa'caen supa Balacja Balaamma angapa ansundian Peor ccotta'cco tansin'choni. Tse'ttieja jo'su a'i menia'meñi atteye osha.

²⁹ Tseni nepipa Balaamjan Balacma su: —Va'ttinga siete oque oraen'jen'chove ñoña'faja ñambe. Toya'caen siete vaura du'shu quitsaye siete oveja quitsayema'qque fi'ttipa ñoña'faja.

³⁰ Tsa'caen susi Balacja Balaam suqquia'caen tsomba fae vaura du'shu fae oveja poi oque'je'chonga ottaemba oque'fa.