Números 22 - Cofán: Chiga Tevaen'jen

Balacja Balaamma ttu'se

¹ Israendeccuja tsa'caen jacamba Moab ande'su sinjunccuni can'jen'fa. Tse'tti tsu Jordán na'ema chiga sombo'jefani, Jericó isevetsse.

² Tsa'caen can'jen'fasi Balac, Zipor dutssi'yeja israendeccu amorreondeccuma tson'choma in'jan.

³ Toya'caen Moab aindeccuja ñoa'me dyo'fa israendeccu tsain'bitssi'fasi attepa.

⁴ Tsa'caen dyopa Moab'su aindeccuja Madián'su coenzandeccunga japa qquen su'fa: “Va aindeccuja pa'cco ingi andema tsu sefaen'faya vaura shoshovima an sefaenqquia'caen.” Tsaite tsu Balacja Moab ande na'su.

⁵ Tsa'camba tsu manda cuintsu Beor dutssi'ye Balaamma ttusenga'faye. Nane Balaamjan Amav andeni, Petor canqqueni can'jen Eufrates na'en pporotsse. Balacja condasundeccunga qquen Balaamnga su'faya'chove afapa moe: “Egiptone tsu tsain'bitssia aindeccu jipa pa'cco andenga on'bapa ja'ñojan ñai'ccu pporotsse can'jen'fa.

⁶ Jundeyi jipa ñane tsendeccuma dañomba qqueñajan. Nane tsendeccu tsu ingima ti'tsse oshacho'fa. ¿Isha gi que tsa'caen tson'ninda ñajan tise'pama patsupa ña ande'ye tteya moeña'bi? Ñanda gi atesu que tsa'caen daya'cho qquen su'ninda ñoa'me tsa'caen da'choma. Nane ñotsse afa'ninda ñotsse tsu somboya; egae afa'ninda egae tsu somboya.”

⁷ Tsa'caen susi moabita'su coenzandeccu toya'caen madianita'su coenzandeccu'qque tise dañomba qqueñasi afepoeña'cho corifin'dima isupa ja'fa. Tsa'caen japa Balaam can'jeni nepipa Balac su'choma condase'fa.

⁸ Pañamba Balaamjan su: —Ja'ño cose va'ttinga ana'faja. Ña gi Na'suma iñajampañamba tise su'choma que'inga condaya. Tsa'caen susi moabita'su coenzandeccuja tisei'ccu can'jen'fa.

⁹ Tsa'ma Chigaja tsequi cose Balaamnga attiamba qquen iñajampaña: —¿Majandeccu tsu va quei'ccu can'jen'chondeccuja?

¹⁰ Pañamba Balaamjan su: —Moab ande'su na'su Balac, tsa Zipor dutssi'ye, tsu vandeccuma moe cuintsu ñani jipa qquen su'faye:

¹¹ “Egiptone tsu tsain'bitssia aindeccu jipa pa'cco andenga on'bapa ja'ñojan ñai'ccu pporotsse can'jen'fa. Jundeyi jipa ñane tsendeccuma qqueñajan. ¿Que tsa'caen tson'ninda ti gi ñajan tise'pama patsupa ña ande'ye tteya moeña'bi?”

¹² Tsa'caen pañamba Chigaja Balaamnga su: —Tise'pai'ccu jajama ni tsa aindeccuma qqueñajama. Tsendeccuta tsu ña in'jan'cho aindeccu.

¹³ Ccaqui a'ta sinte Balaamjan jangipa Balac moesi ji'cho coenzandeccunga qquen su: —Ja'faja tisupa andeni. Na'su tsu se'pi ña que'i'ccu jaye.

¹⁴ Tsa'caen susi moabita'su coenzandeccuja toequi Balac can'jeni jipa qquen conda'fa: —Balaamnda tsu ingi'ccu jiye in'jambi.

¹⁵ Tsa'ma Balacja ccase faesu coenzandeccuma moe. Tsequita tsu o'tie ja'chondeccuma ti'tsse'tssi a'ive moe ti'tsse joccapindeqquiama.

¹⁶ Moesi japa Balaamma cachuipa su'fa: —Balac, Zipor dutssi'ye tsu qquen suye ingima manda: “Chigáne, chi'gambe'yi jija.

¹⁷ Jisi gi quema joccapitssia've tsoña. Toya'caen pa'cco que iñajan'choma gi tsoña. Tsa'ma jipa ñoa'metsse va aindeccuma qqueñajan.”

¹⁸ Tsa'ma Balaamjan su: —Mapán Balac tise tsaoni cori, totoacorima'qque on'ba'e an'biamba afe'ni'qque ñajan Na'su ña Chiga mandambi'choa'ma mingae tsoñe'qque oshambi. Nane ni injan'tsse ni re'riccoeyi'qque tsoñe oshambi Na'su tsa'caen mandambiya'da.

¹⁹ Tsa'ma ja'ño cose'qque vani ana'faja. Tsonsi gi ñajan Na'su Chigama iñajampañamba atesuya tise mingae su'choma.

²⁰ Tsequi cose Chigaja Balaamnga attiamba su: —Ñoa'me va aindeccu queve ji'fa'ninda jangipa tise'pai'ccu jaja. Tsa'ma jo'su ña su'choveyi tsu afaya'cho.

Balaam boroja afa

²¹ Balaam ccaqui a'ta sinte jangipa tise boronga dyaipa'chove ñoñamba moabita'su coenzandeccui'ccu ja.

²² Tsa'caen Balaam tise boronga dyaipa jayisi dos tisema shondosundeccu'qque ja'fa. Tsa'ma Chigaja tise tsa'caen jasi iyicca'yepa manda Na'suma sefacconi'su shondo'su cuintsu Balaam panshansa'ne tsaiquima ttuye.

²³ Tsa'caen mandasi sefacconi'su shondo'su matichi'ccu tsaiqui enttingeni ccutsu'choma attepa boroja tse'ttima tsaiqui ccafae panshan. Tsa'ma tsa'caen anga jisi Balaamjan boroma ma'ppi cuintsu ccase tsaiquini angaye.

²⁴ Tse'ttie joqquitssipa Na'su Chigama sefacconi'su shondo'suja tsajaccumbe enttinge'ye ja'je'cho tsaiquini ccutsu. Tse'tti tsu poifama patui'ccu ttu'chopa re'riqui'cco.

²⁵ Tsa'caen ccutsu'choma attepa boroja utufa'ye panshañe in'jamba Balaam ttena'goma asapian patu ttu'chonga. Tsonsi Balaamjan ccase boroma ma'ppi.

²⁶ Tse'ttie joqquitssipa Na'su Chigama sefacconi'su shondo'suja tisema o'tie japa ñoa'me ta'yoquiccoanga ccutsu. Nane tse'tti tsu mafae panshaña'chove me'i'on.

²⁷ Tsa'caen ccutsu'choma attepa boroja andenga ccui. Ccuisi Balaamjan iyicca'yepa quini'ccoi'ccu ochha'chha.

²⁸ Tse'faei'ccuyi Na'su Chigaja boroma afaensi a'ia'caen afapa Balaamma qquen su: —¿Jongoesuma gi tson? Vai'ccuta qui tres se tayo ñama ochhai.

²⁹ Tsa'caen susi pañamba Balaamjan su: —¿Jongoesie qui ñai'ccu co'fe? Chhichhi'ccoma an'bian'choecan'da gi va'ttingayi quema fi'ttiye'can.

³⁰ Tsa'ma boroja su: —Ñanda gi boro que chuitepie quema dyaiñamba angacan'su. Toya'caen qui atesu minguite'qque gi quema qquen tsincombi. —Ñoa'me qui su —qquen Balaamjan su.

³¹ Tsa'caen tson'jensi Na'su Chigaja tson cuintsu Balaam tsa sefacconi'su shondo'suma atteye, enttinge tsaiquini matichi'ccu ccutsu'choma. Tsama attepa Balaamjan camba'jui'ccu andenga puntssan ccui.

³² Tsa'ma Na'su Chigama sefacconi'su shondo'suja su: —¿Jongoesie qui que boroma tres se ochha'chha? Ña gi ji tsaiquima ttuye que in'jamba jayi'cho ñane ñotssimbi'si.

³³ Nane borota tsu ñama attepa tres se ccafanga ja. Ccafanga jambiecan'da gi tayo quema fi'ttipa boromajan canseveyi moeñe'can.

³⁴ Tsa'caen susi pañamba Balaamjan Na'suma sefacconi'su shondo'suma su: —Que tse'tti ccutsupa tsaiquima ttu'je'chove atesumbipa gi egae tson. Tsa'caen ña jayi'cho egamajan shandaya gi.

³⁵ Tsa'ma Na'su Chigama sefacconi'su shondo'suja su: —Jaye qui osha. Tsa'ma japa ña suqquia'caeñi suja. Tsa'caen susi Balaamjan Balac moe'cho coenzandeccui'ccu ja.

Balaam Balacma cachui'cho

³⁶ Balacja Balaam jiña'choma pañamba Ar na'en jin'tti'su Moab canqqueni cachuiye ja. (Tse'tti tsu Moab ande sefa'tti.)

³⁷ Tseni cachuipa su: —Junde jiye mandasi ¿micomba qui jiye chi'ga? ¿Ñajan ñoa'metsse tsa'caen quema joccapitssia've tsoñe oshambi qquen ti qui in'jan?

³⁸ Tsonsi Balaamjan su: —Nane tayo gi quema can'su jipa can'jen. Tsa'ma oshambi gi tisutsse in'jan'choma afaye. Ñanda gi jo'su Chiga su'choveyi afaye osha.

³⁹ Omboe Balaamjan Balacui'ccu Quiriot-huzotni ja'fa.

⁴⁰ Tseni tsu Balacja manda cuintsu vaura, ovejama'qque fi'ttipa Balaamni anga'faye; toya'caen coenzandeccuja cuintsu tisema fuite'faye.

⁴¹ Ccaqui a'ta sinte Balacja Balaamme tta'ttapa attepa Bamot-baal ccotta'cconga ansundian. Nane tsene tsu israendeccu can'jen'fa'choma cañe a'tatssi.