Números 20 - Cofán: Chiga Tevaen'jen

Tsa'ccu patuvo'cho'ye sombo'cho

¹ Cuna canqque'fa ca'nimba nepi'cho ccovuni tsu israendeccuja Zin a'i menia nepi'fa. Tsomba Cadesni re'ricco can'jen'fa. Tseni can'jemba María pasi tse'ttinga a'tu'fa.

² Aindeccuja tsa'ccuve metsse dasi poiyi'cco Moisés, Aarónga bopa

³ qquen Moisésnga afaye ashaen'fa: —Faesu israendeccuma Na'su Chiga fi'ttijeite ingima'qque fi'tti'choecan'da tsu ñotssiye'can.

⁴ ¿Jongoesie qui Na'su Chigambe aindeccuma va a'i menia i'fa? ¿In'jan'fa ti qui ingi tisupa vaurandeccui'ccu fae'ngae paye?

⁵ ¿Jongoesie qui ingima Egiptone somboemba va ega andeni i'fa? Vanija mani joña'chove jinchombi. Nane higueraccu, tsajaccu, tsotsoquiccuve'qque metssi. Toya'caen ni tsa'ccuyi'qque jinchombi ingi cui'ya'chove.

⁶ Tsa'caen su'fasi pañamba Moisés toya'caen Aarón tse'ttie joqquitssipa Cachuicco'je'tti'su Carpani japa tse'ttinga camba'jui'ccu andenga puntssamba ccui'fa. Puntssan ccui'fasi Na'su Chigambe ñotssia tise'panga attiamba

⁷ Na'suja Moisésnga su:

⁸ —Accuicco'choma somboemba isupa, que quindya fuite'choi'ccu a'ima boñajan. Poiyi'cco bo'fasi patuvo'choma mandaja cuintsu tsa'ccu tsa'ye somboye. Tsa'caen mandapa qui atteya aindeccu toya'caen tise'pa vaurandeccu cui'ye sombo'cho tsa'ccuma.

⁹ Moisésja Na'su Chiga suqquia'caen tise can'jeni ccui'cho accuicco'choma isupa sombo.

¹⁰ Sombopa Moisés toya'caen Aarón aindeccuma boña'fa patuvo'cho jin'ttinga. Tsomba Moisésja su: —Ega pañambi'choa aindeccu paña'faja: ¿Ingi ti gi va patuvo'cho'su tsa'ccuma somboemba afe'faya'cho cuintsu que'i cu'i'faye?

¹¹ Tsa'caen supa Moisésja dos se tsa patuvo'choma tise isu'cho accuicco'choi'ccu ochhai. Tsa'caen ochhaisi tsain'bitssi tsa'ccu tsa'ye sombo. Sombosi aindeccu toya'caen vaurandeccu'qque cu'iye ashaen'fa.

¹² Tsa'ma Na'su Chigaja Moisés toya'caen Aarónga su: —Nane que'ija ñama in'jambiqquia'caen tisuyi tsa'ccuma afe qquen supa israendeccunga ñajan tise'pama fuite'suve canjaembi. Tsa'camba qui va aindeccui'ccu ña tise'panga afe'cho andeni ca'ni'faya'bi.

¹³ Tsa tsu Meribani tsa'ccu sombo'je'tti. Tse'ttiyi tsu israendeccu Na'su Chigama afacco'fasi tiseja egave metssi qquen canjaemba'tti.

Edom andema panshañe se'pi'cho

¹⁴ Cadesni can'jemba Moisésja majan aindeccuma Edom ande'su na'sunga moe cuintsu japa qquen suye: “Que antian israendeccu tsu qquen quema su'fa: ‘Queta qui ñotsse atesu ingi ma'caen vanamba canse'choma.

¹⁵ Nane ingi tayopi'su coenzandeccuja Egiptoni japa bo'tsse tseni canse'fa. Tsa'ma egiptondeccuja ingima in'jangae tsincon'fa ingi tayopi'su coenzandeccuma tsinconqquia'caeñi.

¹⁶ Tsa'caen vana'jemba gi Na'su Chigama iñajan'fa cuintsu ingima fuiteye. Tsa'caen ingi iñajan'fasi tsu tisema sefacconi'su shondo'suma moemba Egiptone ingima somboen. Ja'ñonda gi Cades canqqueni can'jen'fa que andei'ccu pporotsse.

¹⁷ Tsa'camba gi iñajan'fa: Antteja ingi que ande'ye panshañe. Ingija que'i nasipa jon'cho'ye ni tsajaccu'ye panshañambi ni que'i poso'su tsa'ccuma cu'i'faya'bi. Nane na'sumbe rande tsaiqui'ye gi attufambe'yi ja'faya que andema panshaña'ngae.’ ”

¹⁸ Tsa'ma Edom ande'su na'suja su: —¡Ña ande'ye panshañe osha'fambi qui! ¡Nane ji'fa'ninda gi ña sundarondeccui'ccu jipa se'piya!

¹⁹ Tsa'caen susi israendeccuja ccase qquen su'fa: —Nane na'sumbe rande tsaiqui'ye gi ja'faya. Toya'caen ingi tsombi'ta ingi vaura que'i poso'su tsa'ccuma cu'i'ninda gi afepoen'faya. Tsa'ma jo'su tsui panshaña'ccoeyi gi que andema in'jan'fa.

²⁰ Tsa'caen su'fasi Edom ande na'suja su: —¡Nane panshan'faya'bi qui! Tsa'caen supa tise sundaro tsain'bitssi fi'ttiqque'suve an'bian'chondeccui'ccu israendeccuma cachuiye ji.

²¹ Jipa ñoa'me se'pi'fa israendeccu tise ande'ye panshañe. Tsa'caen se'pi'fasi israendeccuja faesu tsaiquive tta'tta'fa.

Aarón pa'cho

²² Poiyi'cco israendeccu Cadesne sombopa Hor ccotta'cconga ja'jengae ja'fa.

²³ Tse'tti, Edom ande pporotsse, Na'su Chigaja Moisés toya'caen Aarónga qquen su:

²⁴ “Aarónda tsu ña israendeccunga afe'cho andeni ca'nimbe'yi paya. Nane Meriba tsa'ccu sombo'je'ttinga qui ña mandaqquia'caen tsombipa tisu in'janqquia'caen tson'fa.

²⁵ Moisés, que qui Aarónma toya'caen tise dutssi'ye Eleazarma'qque Hor ccotta'cco tansin'choni angaya'cho.

²⁶ Angapa tse'ttinga Aarón Chigama afa'su ondiccu'je'choma oshichhaemba tise dutssi'ye Eleazarnga ondiqquianjan. Nane tse'ttinga tsu Aarónjan paya.”

²⁷ Moisésja Na'su mandaqquia'caen tson. Nane poiyi'cco israendeccu caña'jen'ni Hor ccotta'cconga ansunde'fa.

²⁸ Ansundepa Moisésja Aarón Chigama afa'su ondiccu'jema oshichhaemba Eleazarnga ondiqquian. Tse'ttinga Aarónjan ccotta'cco tansin'choni pa. Tsa'caen pasi tisema a'tupa Moisés toya'caen Eleazar ccotta'cco'ye ande'fa.

²⁹ Israendeccuja tsa Aarón pa'choma pañamba treinta a'ta tisene i'na'fa.