Números 17 - Cofán: Chiga Tevaen'jen

Aarón accuicco'cho shoyocho'cho

¹ Na'su Chigaja Moisésnga su:

² “Israendeccunga condaja cuintsu poi israenaccumbe nasundeccu tise'pa accuicco'choma i'faye. Poiyi'ccota tsu doce accuicco'choya. Que qui tevaeña'cho poi accuicco'chonga nasundeccumbe inisema.

³ Toya'caen Leví aindeccu'su accuicco'chongata tsu Aarón inisema tevaeña'cho. Nane poi aindeccu'su nasundeccu tsu fae accuicco'choma iya'cho.

⁴ I'fasi tsu Cachuicco'je'tti'su carpanga angapa injancco'fa'chove canjaen'cho cafon ccui'ttinga ccuiñaña'cho, tsa ña que'i'ccu cachuicco'je'ttinga.

⁵ Ña gi tsoña cuintsu majame ña in'jan'chombe accuicco'choja shoyochoye. Tsa'caen shoyochosi attepa tsu israendeccuja que'ima egae afa'je'choma anttepa ñama noñangiambe can'faya.”

⁶ Moisés Na'su Chiga su'choma israendeccunga condasi poiyi'cco israenaccu'su nasundeccu tise'pa accuicco'choma i'fasi doce accuicco'chove boña. Tsa'suni tsu Aarón accuicco'cho'qque ccui.

⁷ Moisésja tsa accuicco'cho boña'choma isupa Na'su Chiga can'jeni Cachuicco'je'cho carpani ccuiña.

⁸ Ccaqui a'ta tsa Cachuicco'jeni japa atte Aarón accuicco'cho tsa Leví aindeccu'sumbe accuicco'cho tayo shoyocho'choma; nane tayo shoyochopa, te'tapa, almendra cu'chove na'choma.

⁹ Tsa'caen dasi Moisésja poiyi'ccombe accuicco'choma Na'su Chiga can'jene somboemba poiyi'cco israendeccunga canjaen. Poiyi'cco atte'fasi accuicco'chombe nasundeccuja tisumbema isu'fa.

¹⁰ Tsonsi Na'su Chigaja Moisésnga su: “Aarón accuicco'chomajan ccase injancco'fa'cho cafon ccui'ttinga ccuiñajan. Tseni coira'jeja cuintsu va ñama pañambindeqquia injan'jen'faye. Tsama injan'jemba tsu ñama egae afambe'yi cansepa pambe canse'faya.”

¹¹ Moisésja pa'cco Na'su Chiga su'choma tson.

¹² Tsa'ma israendeccuja Moisésnga su'fa: “¡Ingita gi qque'chondeccu! ¡Poiyi'cco gi pa'faya!

¹³ Nane poiyi'cco majan Na'su Chiga can'jen'chonga catse'ta tsu pa'faya. ¿Pa'cco metsse ti gi pa'faya?”