Números 16 - Cofán: Chiga Tevaen'jen

Chiga Corésma fi'tti'cho

^1-2 Levíta a'i Coat omba'su du'shu Coré qquen inisecho'cho, tsa Izhar dutssi'ye tsu Moisésma chi'gapa iyicca'ye. Tisei'ccu fae'ngae tsu tres tsandie Moisésma chi'gapa iyicca'ye'fa. Tise'pa inise tsu Datán toya'caen Abiram, Eliab dutssiyendeccu, toya'caen On, Pelet dutssi'ye. Tise'pai'ccu fae'ngae tsu faesu dosciento cincuenta israendeccuma mandasundeccu'qque bo'fa. Tsendeccu'su tsu majanjan israe'su coenzandeccusi poiyi'cco a'i tise'pama ñotsse injan'jen'fa.

³ Poiyi'cco tsendeccu tsu bopa Moisés toya'caen Aarónma afasepa qquen su'fa: —¡Tayo tsu naniña'cho que'i ingima ti'tsse'tssia've da'choma! Nane poiyi'cco gi Chiga aindeccusi tsu Na'su Chigaja poiyi'cco ingi'ccu can'jen. Tsa'ma, ¿jongoesie qui que'ija Na'su Chiga aindeccumbe Na'su qquen in'jan'fa?

⁴ Tsama pañamba Moisésja camba'jui'ccu andenga puntssan ccuipa

⁵ Coré toya'caen tisei'ccu jacansundeccunga qquen su: —Tu'i sinte tsu Na'su Chigaja que'inga canjaeña majan tise'beve toya'caen majan tise in'jamba ttu'se'cho cuintsu Chiganga afe'je'choma afeye. Nane tise in'jamba ttu'se'choyi tsu tisenga afeye osha.

⁶ Qquen tsu tsoña'cho: Coré toya'caen tisei'ccu fae'ngae in'jan'chombe ñome'bama oque oraen'jen'cho tasama tsu iya'cho.

⁷ Tu'ija tsanga si'ngema ppiñamba ñome'bama'qque tuiñaña'cho cuintsu o'roye. Tsomba Na'su Chiganga i ccutsiaña'cho. Majama Na'su Chiga in'jamba canjaensi tsaja Chigambe tisia've somboen'cho tsu. ¡Tsa'caen canjaensi naniña'cho tsu, levítandeccu!

⁸ Omboe Moisésja Coréma su: —Ñama paña'faja levítandeccu:

⁹ ¿Israendeccumbe Chiga poi israendeccu'ye que'ima ttu'sepa manda'choja ñotssimbi qquen ti qui in'jan'fa? Nane que'ija ñoa'me Chigai'ccu pporotsse can'jemba tise can'jen'tti'su jincho'choma vase'je'fa. Toya'caen qui poi israendeccuma fuitesundeccu'fa.

¹⁰ Na'su Chiga que'ima in'jamba poiyi'cco que'i aindeccuma'qque in'jan cuintsu tisei'ccu pporotsse can'jen'faye. Tsa'can'ma– ¿jongoesie qui ti'tsse joccapitssia Chigama afa'suve daye in'jan'fa?

¹¹ Jo'su Aarónmeñi afase'fambi qui. Tiseja ti'tsse'tssimbi tsu cuintsu que'i tisema afaseye. Ñoa'me Na'su Chigama qui chi'gapa afase'fa.

¹² Omboe Moisésja manda cuintsu Dotán toya'caen Abiram tsa Eliab dutssiyendeccuma ttusenga'faye. Tsa'ma tsendeccuja su'fa: —Jaye in'jan'fambi gi.

¹³ ¿‘Ñotssi tsu’ qquen ti qui in'jan que ingima chocho, tuño cuñajun'cho shacambitssia ande'ye joqquitssiansi cuintsu va a'i menia qquipoe'supa pa'faye? Toya'caen: ¿‘Ñotssi tsu’ qquen ti qui in'jan ingima ti'tsse joccapitssia na'suve daye qquen in'jamba?

¹⁴ Toya qui ingima angambi chocho, tuño cuñajun'cho'qque shacambitssia andeni. Ni ingi nasipaemba tsajaccuve joña'cho andeve'qque qui afembi. ¿Ingija binindeqquia'caen injanga quei'ccu ja'faya qquen ti qui in'jan? Nane quema can'gi'faya'bi gi.

¹⁵ Tsa'caen su'fa'choma pañamba Moisésja ñoa'me iyicca'yepa Na'su Chiganga su: —¡Tise'pa quenga afe'je'choma in'janjama! Ñanda gi ni fae boroveyi'qque tsendeccuma itsambi. Toya'caen majameñi'qque gi egae tsombi.

¹⁶ Omboe Moisésja Corénga su: —Tu'i Na'su Chiganga ji'faja que, toya'caen quei'ccu fae'ngae in'jan'chondeccui'ccu. Aarón'qque tsu tse'tti can'jeña.

¹⁷ Poiyi'cco tsu tise'pa oque oraen'jen'cho tasama ipa tsanga oque oraenqque'su ñome'bama tuiñaña'cho. Toya'caen Aarón, que'qque tisu oque oraen'jen'cho tasama angapa oque oraenqque'su ñome'bama tuiñamba cca'i dosciento cincuentandeccumbe ccutsu'choi'ccu fae'ngae Na'su Chiganga ccutsu'faya'cho.

¹⁸ Tsa'caen susi poiyi'cco tisupa oque oraen'jen'cho tasama ipa si'ngema on'boemba oque oraenqque'su ñome'bama tuiñamba Moisés toya'caen Aarónmbe ccutsu'ttinga ccutsian'fa. Chigama cachuicco'je'tti'su carpa jin'ttinga tsu tsa'caen ccutsian'fa.

¹⁹ Coréja poiyi'cco aindeccui'ccu bopa tsa Chigama cachuicco'je'tti'su carpa jin'ttini Moiséspama isevetsse ccutsu. Tsa'caen ccutsu'fasi Na'su Chiga ñotssiaja poi aindeccunga attiansi

²⁰ Na'su Chigaja Moisés toya'caen Aarónga su:

²¹ —¡Joqquitssi'faja va aindeccu ccutsu'ttie! ¡Junde gi tise'pama nepiañe tson'jen!

²² Tsa'ma Moisés Aarón'qque andenga puntssan ccuipa qquen su'fa: —Chiga Quitsa, que qui poi aindeccuma cansian'su. ¿Tsa'caen ti qui fae a'i egae tsincon'chone poi aindeccuma iyicca'yeya?

²³ Tsa'caen susi Na'su Chigaja Moisésnga su:

²⁴ —¡Poiyi'cco israendeccunga condaja cuintsu Coré, Datán toya'caen Abiram ccutsu'ttie junde joqquitssi'faye!

²⁵ Tsama pañamba Moisésja jangipa israe'su coenzandeccui'ccu Datán, Abiram can'jeni ja'fa.

²⁶ Japa poiyi'cco aindeccunga qquen su'fa: —¡Junde joqquitssi'faja va ega aindeccu carpa'ye! Toya'caen tise'pa an'bian'choma pporaen'fajama tise'pa egae tsincon'chone que'i'qque pa'fasa'ne.

²⁷ Tsa'caen susi aindeccuja Coré, Datán toya'caen Abiram carpa jin'tti'ye joqquitssi'fa. Datán toya'caen Abiram tsu tise'pa carpa cani'je'tti can'jen'fa fae'ngae tise'pa pushendeccu, toya'caen tise'pa dushundeccui'ccu.

²⁸ Toya'caen tsu Moisésja su: —Tisutsse ña tsoñe oshambisi Na'su Chiga ñama moesi gi pa'cco ña tson'jen'choma tson'jen. Tsa'camba qquen tsonsi qui in'jan'faya Na'su Chiga ñama moe'chove:

²⁹ Nane va aindeccu cca'i paqquia'caen coenza ccashe'yeve dapa pa'fa'ninda qui in'jan'faya Na'su Chiga ñama moembi'choa've.

³⁰ Tsa'ma Na'su Chiga ccaningae tsomba andema shariensi va aindeccuma cunde'ninda qui Na'su ñama moe'chove in'jan'faya. Nane andema shariensi canseveyi aindeccu, pa'cco tise an'bian'choma cunde'ninda qui in'jan'faya tsendeccu tsu Na'su Chigama chi'ga'chondeccu.

³¹ Tsa'caen Moisés afa nanisi andeja tsendeccu ccutsu'ttie sharuqquia'caen tsu doin ja.

³² Tsa'caen doin jasi poiyi'cco tsandiendeccu Coréi'ccu bo'chondeccu tise'pa pushe, dushundeccu'qque, tisupa an'bian'choi'ccu fae'ngae ande tsosini amppi ja'fa.

³³ Canseyi pa'cco tise an'bian'choi'ccu ande tsosini amppi ja'fasi andeja toeningatsse da. Tsa'caen tsu israendeccu'ye nepi'fa.

³⁴ Tsa'caen tsonsi attepa poiyi'cco israendeccu pporotsse ccutsusundeccuja fundopa tse'ttie buttopa sombopa qquen su'fa: “¡Isha tsu ingima'qque andeja cundeya!”

³⁵ Toya'caen tsu Na'su Chigaja si'ngema moemba dosciento cincuenta tsandiendeccuma fi'tti tsa oque oraenqque'su ñome'bama afesundeccuma.

³⁶ Na'su Chigaja ccase Moisésnga afapa qquen su:

³⁷ “Chigama afa'su Aarón dutssi'ye Eleazarma suja cuintsu japa tsa juru'je'chonga catsepa ñome'bama oque'je'cho tasama isuye. Isupa tsani jincho si'ngema biani tuiña catiye.

³⁸ Nane tsa oqueye'chondeccuja egae tsomba tsa'caen pa'fa. Tsa'ma tise'pa ñome'bama oque'je'choja ñanga afe'je'chopa tsu toya ñane'jan ñotssi. Tsa'cansi tsama isupa Chiganga afeye oque'je'choma oppoen'jeña'chove ñoña'faja. Tsa'caen ñoñamba oppoen'faja cuintsu israendeccu tsa ju'ru'choma injan'jen'faye.”

³⁹ Tsa'caen susi Chigama afa'su Eleazarja tsa oque'jepa pa'chondeccumbe cu'a yoshava ñome'bama oque'je'cho tasama taipa manda cuintsu oque oraen'je'choma oppoen'jeña'chove ñoñamba tsanga oppoen'faye.

⁴⁰ Tsa'caen tsu tson'fa cuintsu israendeccu tsama attepa jo'su Aarón dushundeccuyi tsu ñome'bama afe'jeye osha'fa qquen injan'jen'faye. Nane majañi'qque cca'ija tsa'caen catsepa Na'sunga afeye oshambi, Coré toya'caen tisia'caen in'jan'chondeccu paqquia'caen pasa'ne. Na'su Chiga Moisési'ccu Eleazarnga mandaqquia'caen tsu pa'ccoma tson'fa.

⁴¹ Ccaqui a'ta poiyi'cco israe'su aindeccu Moisés toya'caen Aarónma afaseye ashaen'fa qquen supa: —Que'i qui Na'su Chigambe aindeccuma fi'tti'je'fa.

⁴² Poiyi'cco a'i shoquendi'e Moisés Aarón ccutsu'ttinga bo'fa. Tsa'ma tsa'caen bopa Cachuicco'je'tti'su carpama camba tse'faei'ccuyi atte'fa unjimba tsa carpama picco'choma, toya'caen Na'su Chigambe ñotssia attian'choma.

⁴³ Tsa'caen attepa Moisés toya'caen Aarón tsa Cachuicco'je'tti'su Carpa jin'ttinga jasi

⁴⁴ Na'su Chigaja Moisésnga su:

⁴⁵ —¡Joqquitssi'faja va aindeccu'ye! ¡Junde gi tise'pama fi'ttiye tson'jen! Tsama pañamba Moisés toya'caen Aarón andenga puntssan ccuipa

⁴⁶ Moisésja Aarónga su: —¡Que ñome'bama oque'je'choma i'ngapa Chiganga afeye oque'je'cho si'ngema on'boemba ñome'bama'qque tuiñajan! ¡Tsa'caen tsomba junde aindeccu can'jeni japa Chigama iñajanjan tsendeccu egae tsincon'chone joqquitssiya'chove! Ñoa'me tsu Na'su Chigaja iyicca'yepa fi'ttiye tson'jen. Nane tayo tsu paqque'sui'ccu paye ashaen'fa.

⁴⁷ Aarónjan Moisés suqquia'caen tsomba aindeccu bojin shequeni buttopa ja. Buttopa japa atte Chiga moe'cho paqque'su tayo aindeccuma fi'ttiye ashaen'choma. Attepa Aarónjan ñome'bama tise oque'je'cho tasanga tuiñamba aindeccune Chigama iñajan.

⁴⁸ Omboe Aarónjan pa'chondeccumbe toya cansendeccumbe enttingenga ccutsusi tsa paqque'suja pasa.

⁴⁹ Nane Coréi'ccu aindeccu pa'fasi toya'caen ccaqui tsu faesu catorce mil seteciento a'i tsa'cantsse pa'fa.

⁵⁰ Tsa'caen paqque'su pasasi Aarónjan toequi Cachuicco'je'tti'su carpani Moisés can'jen'chonga ji.