Números 14 - Cofán: Chiga Tevaen'jen

Israendeccu injanga tson'cho

¹ Osha'faya'bi qquen su'choma pañamba israendeccuja fundo'jeye ashaemba tsequi cose inambai'ccu a'ta'fa.

² Poiyi'cco tsendeccu tsu Moisés toya'caen Aarónma egae afapa qquen su'fa: “¡Egiptoni tsambi'ta va a'i menia pa'choecan'da bove ñotssiye'can!

³ ¿Jongoesie tsu Na'su Chigaja va andeni ingima i? ¿Geraemba vani ingi pasi cuintsu ingi'ccu iyiccosundeccu ingi pushendeccu, ingi dushundeccuma'qque itsa'faye ti ingima i? ¡Nane bove ñotssi tsu toequi Egiptoni jaye!”

⁴ Tsa'caen supa tisupanaccu qquen afacco'fa: “Jinge faesu na'suve somboemba toequi Egiptoni jaye.”

⁵ Tsonsi Moisés toya'caen Aarón poiyi'cco aindeccu caña'jen'ni camba'jui'ccu andenga puntssamba ccui'fa.

⁶ Toya'caen Josué, Caleb'qque fae'ngae andema cañe jacansundeccupa tisupa ñombi'ye'choma canjaeñe in'jamba ondiccu'jema chi'ttapa

⁷ poiyi'cco aindeccunga qquen su'fa: —¡Tsa ande ingi can'ga'choja ñoa'me ñotssia ande tsu!

⁸ Na'su Chiga ñoa'me ingima in'jan'da tsu fuitepa tsa andenga ingima ca'niamba tsangae afeya. Nane tsa ande tsu chocho toya'caen tuño cuñajun'cho'qque shacaya'bi.

⁹ ¡Tsa'ma Na'su Chigama pañambiqquia'caen tson'fajama ni tsa ande'su aindeccuma dyo'fajama! Nane tsendeccumanda gi panma anqquia'caen patsu'faya. Toya'caen majan tise'pama fuiteya'chove me'i'on tsu. Tsa'ma ingimajan Na'su Chiga tsu fuiteya. Tsa'cansi —¡Dyo'fajama!

¹⁰ Tsama pañamba aindeccuja patui'ccu tovaccoeñe in'jan'fa. Tsonsi Na'su Chigambe ñotssiaja cachuicco'je'cho carpanga attian poiyi'cco israendeccu caña'jen'ni.

¹¹ Tsa'caen attiamba Na'su Chigaja Moisésnga su: —¿Mi'nge'e tsu aindeccuja ñama chi'gapa ‘Barembi tsu’ qquen su'je'faya? ¿Toya'caen mi'nge'e tsu ñame in'jambiqquia'caen canse'faya? Nane tsain'bitsse tise'panga ña oshacho'choma canjaensi atte'ma tsu ñame in'jan'fambi.

¹² Nane ñoa'me paqque'suma gi tise'panga moeña cuintsu andema isumbe'yi pa'faye. Tsa'ma quei'ccu gi ñoa'me tsain'bitssi aindeccuve atapoemba va israendeccuma ti'tsse quin'andeccuve tsoña.

¹³ Tsama pañamba Moisésja Na'su Chiganga su: —Queyi qui tisu oshacho'choi'ccu va aindeccuma Egiptone somboen. Tsa'cansi egiptondeccu va que tsoñe su'choma paña'da

¹⁴ tsu Canaán andesundeccunga condase'faya. Nane tsendeccu'qque tsu que qquen su'choma paña'fa: ‘Queja, Na'su, israendeccui'ccu can'jemba cambajunaccu tise'pai'ccu afa'je; toya'caen que unjimba'cco'qque tise'pa canqque ombani dusepa a'taja unjimba'ccove attiamba tise'pama o'tie jayi; coseja si'ngeve attiamba tsa'caen jayi.’

¹⁵ Tsa'cansi va aindeccuma que metsse fi'tti'ninda tsu tsa'caen paña'chondeccuja qquen su'faya:

¹⁶ ‘Na'su Chigaja tise afeye su'cho andema tise'panga afeye oshambipa injanga a'i menia israendeccuma fitti'tti.’

¹⁷ Tsa'cansi, Na'su Chiga, canjaenjan que oshacho'choma que tayo inginga suqquia'caen. Queyi qui su:

¹⁸ ‘Ñajan junde iyicca'yeye atesumbi.’ Ñoa'me ñotsse qui injancho. Egae tsinconsundeccu, toya'caen pañambiqquia'caen tsinconsundeccu tsincon'choma qui aqque'papa ñoquiya. Tsa'ma quema chi'gapa egae tsincon'sumbe injama'choma somboemba tise dushundeccumbe, tsambe du'shumbe dushundeccumbe toya'caen tsambe dushundeccumbe injama'choma qui somboeña.

¹⁹ Chigáne que ñoa'me injancho'choma canjaemba va aindeccu egae tsincon'choma aqque'papa ñoquija. Nane ñoa'me tise'pa Egiptoni can'jeinte ashaemba vani nepiya'ngae tise'pama mende'yepa ñoquiqquia'caen ccase mendeyepa ñoquija.

Chiga israendeccuma vanae'cho

²⁰ Na'su Chigaja qquen su: —Ñotssi tsu, que iñajanqquia'caen gi aqque'papa ñoquiya.

²¹ Tsa'ma va tsu ñoa'me su'cho. ¡Nane ñoa'me ña cansepa ña ñotssi'ccu pa'cco andenga ñoa'me on'boenqquia'caen tsu va su'choja ñoa'me su'cho!

^22-23 Ñoa'me tsu va aindeccuja ña tayopi'su coenzandeccunga afeye su'cho andema atte'faya'bi. Nane ña ñotssiama, toya'caen ña oshacho'choma Egiptone vani a'i menia'qque atte'ma tsa andema atte'faya'bi. Nane a'i menia ña tise'pama fi'ttite ñama tsain'bitsse noñangiamba ña manda'choma pañañe chi'ga'chondeccu tsu tsa andema atte'faya'bi. Ñama chi'gapa ‘Barembi tsu’ qquen su'chondeccupa tsu tsa andema atte'faya'bi.

²⁴ Jo'su ñama shondo'su Calebyi tsu tise injama'cho ccaninga'pa ñoa'me ñama ñotsse in'jamba paña. Tsa'cansi gi tisema antteya cuintsu tise can'ga'cho andenga ca'niñe. Toya'caen tise omba'su dushundeccu tsu tseni tsangae canse'faya.

²⁵ Amalecitandeccu, cananeondeccu tsu tsa ande'su sinjunccuni can'jen'fa. Tsa'cansi que'ija tu'iyi toequi a'i menia tsa Cu'a marni ja'jengae ja'faja.

²⁶ Tsomba Na'su Chigaja Moisés toya'caen Aarónga qquen su:

²⁷ —¿Mi'nge'e gi va ega Israel aya'fanasindeccui'ccu vana'jeña? Tayo gi paña tise'pa ñama egae afa'je'choma.

²⁸ Japa tise'panga ñane condaja: ‘Ña Na'su Chiga gi ñoa'metsse su: Que'i vana'jen qquen in'jamba iyicca'yepa su'choma pañamba gi ja'ño tsa'caen que'inga tsoña.

²⁹ Nane poiyi'cco veinte canqque'fama ti'tsse an'bian'chondeccu, tayo agattoye'chondeccu, tsa ñama egae afasundeccu tsu pa'faya. Pa'chondeccumbe ai'vota tsu a'tusi a'i menia catiye'faya.

³⁰ Nane ñoa'me gi su ni majañi'qque que'i'suja ña ñoa'metsse su'choi'ccu afeye su'cho andenga ca'ni'faya'bi. Jo'su Caleb, toya'caen Josuéyi tsu tsanga ca'ni'faya.

³¹ Tsa'ma que'i'ccu iyiccosundeccu itsa'faya qquen su'cho dushundeccuma gi tsa andenga angapa ca'niaña. Nane que'i tsa andema chi'gasi gi que'i dushundeccunga afeya cuintsu tsa andema isupa avuja'faye.

³² Que'i pasi que'i ai'voja a'tupa va a'i menia catiye'faya.

³³ Tsa'cansi que'i dushundeccuja cuarenta canqque'fave ovejama coirasundeccuve dapa que'i poiyi'cco pa'faya'ngae a'i menia canse'faya. Nane tsa'caen tsomba tsu que'i egae tsincon'cho shacama nanitsse afepoen'faya.

³⁴ Cuarenta a'ta qui a'tutsse tsa andema cañe jacan'fa. Tsane qui cuarenta canqque'fa pa'cco tisupa shacama afepoen'jen'faya. Nane fae a'tane fae canqque'fave vanaña'cho. Tsa'caen vana'jemba qui in'jan'faya ñai'ccu iyicco'je'chove.’

³⁵ Ña Na'su Chiga gi vama ñoa'metsse su: Tsa'caen gi va ega aindeccu fae'ngae bopa ñama chi'gasundeccunga tsoña. Va a'i menia tsu tise'pa sefaya'cho. Va'ttinga tsu pa'faya.

Diez cañe jacansundeccu pa'cho

^36-37 Moisés mandasi a'tutsse cañe jacansundeccu tsene jipa majandeccuja ñotsse condambe afopoemba aindeccuma qquejeccoen'fa. Tsa'caen tson'fasi Na'su Chigaja poiyi'cco tsendeccuma paqque'sui'ccu fi'tti.

³⁸ Jo'su Josué toya'caen Calebyi tsu pambe pasa'fa.

Israendeccuma Hormani patsu'cho

³⁹ Na'su Chiga Moisésnga su'choma israendeccunga condasesi poiyi'cco ñoa'me ñombi'ye'fa.

⁴⁰ Tsa'caen pañamba ccaqui a'ta sinte'yi jangipa ccotta'cco'su ande se'fatssianga ansundepa qquen su'fa: —Tayo gi va'tti'fa. Jinge japa Na'su Chiga inginga afeye su'cho andema isuye. Nane ñoa'me gi Chiga suqquia'caen egae tson'fa.

⁴¹ Tsa'ma Moisésja su: —¿Micomba qui Na'su Chiga su'choma paña'fambi? ¡Va que'i tsoña'choja ñotsse daya'bi!

⁴² Jambe can'faja. Na'su Chigaja que'i'ccu can'jembi. Que'i'ccu iyiccosundeccu tsu ai'yembitsse que'ima patsu'faya.

⁴³ Nane tayo tsu ronda'je'fa amalecitandeccu, cananeondeccu'qque que'i'ccu iyiccopa que'ima fitti'ttiye. Ñoa'me gi su tayo qui Na'su Chigama catisi tise'qque que'ima catipa ja'ñojan que'i'ccu jacambi.

⁴⁴ Tsa'caen susi paña'ma tsendeccuja ti'tsse ccotta'cco'su ande se'fatssianga ansunde'fa. Tsa'ma Na'su Chiga a'i'ccu fae'ngae injancco'fa'cho cafon ni Moisés'qque canqque'ye tsendeccui'ccu fae'ngae sombombi.

⁴⁵ Tsa'caen ja'fasi amalecitandeccu, cananeondeccu'qque tsa andeni can'jensundeccupa israendeccui'ccu iyiccoye sombo'fa. Tsa'caen sombopa Hormani ne'pitsse israendeccuma fitti'ñacca anga moe'fa.