Números 13 - Cofán: Chiga Tevaen'jen

A'tutsse jacansundeccuma moe'cho

¹ Na'su Chigaja Moisésma afapa qquen su:

² “Canaán andeni majan tsandiendeccuma moejan cuintsu a'tutsse japa tsa ande ña que'inga afeya'choma atte'faye. Nane poi israe'su dose aindeccu'su fae tsandie majan na'siacan'ma moejan.”

³ Moisésja Na'su mandaqquia'caen Parán a'i menia'ñe aindeccuma moe. Tsendeccu poiyi'cco tsu poi israendeccu'su na'siacandeqquia.

⁴ Vandeccu tsu ja'chondeccu: Rubén aindeccu'su Samúa, Zacur dutssi'ye;

⁵ Simeón aindeccu'su Safat, Horí dutssi'ye;

⁶ Judá aindeccu'su Caleb, Jefone dutssi'ye;

⁷ Isacar aindeccu'su Igal, José dutssi'ye;

⁸ Efraín aindeccu'su Oseas, Nun dutssi'ye;

⁹ Benjamín aindeccu'su Palti, Rafú dutssi'ye;

¹⁰ Zabulón aindeccu'su Gadiel, Sodi dutssi'ye;

¹¹ José aindeccu'su (tsa Manasés aindeccu) Gadi, Susi dutssi'ye;

¹² Dan aindeccu'su Amiel, Gemali dutssi'ye;

¹³ Aser aindeccu'su Setur, Micael dutssi'ye;

¹⁴ Neftalí aindeccu'su Nahbi, Vapsi dutssi'ye;

¹⁵ Gad aindeccu'su Geuel, Maqui dutssi'ye.

¹⁶ Tsa tsu Moisés a'tutsse jacamba cansundeccuve moe'chondeccumbe inise. Moisésja Oseas, Nun dutssi'yema tsu Josuéve inisian.

¹⁷ Moisésja cuintsu Canaán andema a'tutsse camba atesu'faye moe'jemba qquen su: —Néguev andenga japa ccotta'cco'su andeni ja'faja.

¹⁸ Ñotsse in'jamba can'faja tsa andema. Toya'caen tsani can'jensundeccuma can'faja: ¿Osha'faya'cho ti?–tsambi'ta, ¿patsuye'faya'cho? Toya'caen, ¿re'ricco a'i ti?–tsambi'ta, ¿tsain'bitssi?

¹⁹ Tise'pa canqquema'qque ñotsse can'faja. ¿Aqquia carpani ti can'jen'fa?–tsambi'ta, ¿ttuccuni ti ta'etssia tsaoni can'jen'fa? Toya'caen, ¿tise'pa can'jen'cho ande ti ñotssia?–tsambi'ta, ¿ega?

²⁰ ¿Sho'yoqque'su ande ti?–tsambi'ta, ¿ega ande? ¿Quini'cco'qque ti jin?–tsambi'ta, ¿me'in? Dyombe'yi japa jongoesu tetacho tseni jinchoma ñani i'faja. Ofa tsaja naite tsu Moisésja tsa'caen a'ima manda.

²¹ Tsa'caen mandasi aindeccuja tsa andema cañe japa Zin a'i menia'ñe ashaemba Rehobni nepi'fa. Tsa tsu Hamatni cani'jen'tti.

²² Nane Néguevma panshamba Hebróni nepi'fa. Hebróni tsu can'jen'fa Ahimán, Sesai toya'caen Talmai. Tsendeccuta tsu Anac omba'su dushundeccu. Hebrón canqque tsu Egipto'su Zoan canqquema o'tie ñoña'cho siete canqque'fave panshan'cho.

²³ Tsomba Escol sinjunccuni nepipa ñoa'me ñotssia na'cho o'fa tsajama attepa fae ttembani ñoa'me tsain'bitssi na jinchoma chattupa quini'cconga tandamba dos a'i opipa i'fa. Toya'caen tseni'su tsotsoqui, higoma'qque taipa i'fa.

²⁴ Tsa'caen israendeccu ofa tsajama tseni chattu'chosi tsu tsa sinjunccuma Escolve inisian'fa.

²⁵ Cuarenta a'ta tsa'caen tsa andeni jacamba shandapa

²⁶ toequi Cadesni jipa Parán a'i menia nepi'fa. Tse'tti tsu Moisés Aarón toya'caen poiyi'cco israendeccu can'jen'fa. Tsa'caen nepipa tisupa japa atte'choma condasepa tseni'su teta'choma'qque canjaen'fa.

²⁷ Canjaemba Moisésnga su'fa: —Ja'fa gi que ingima manda'cho andeni. Ñoa'me tsu tsenijan chocho toya'caen tuño cuñajun'cho'qque shacaya'bi. Toya'caen va tsu tseni naqque'su teta'cho.

²⁸ Tsa'ma tseni'su aindeccuja ñoa'me osha'faya'cho tsu. Toya'caen tise'pa canqqueja ñoa'me randepa ñotsse ttu'choni tsa'oja sheque. Toya'caen tsenima gi atte'fa rande a'i, Anac omba'su dushundeccuma.

²⁹ Néguevnijan amalecitandeccu tsu can'jen'fa. Ccotta'cco'su andenijan hititandeccu, jebuseondeccu toya'caen amorreondeccu can'jen'fa. Toya'caen mar otafa'ye Jordán naeni tsu cananeondeccumbe ande.

³⁰ Tsama pañamba Calebja Moisési'ccu afa'je'cho aindeccuma ziyaemba qquen su: —¡Jinge japa tsa'su aindeccuma joqquitssiamba tsa andema isuye! ¡Ingija osha'faya gi tsa andema itsaye!

³¹ Tsa'ma tisei'ccu fae'ngae japa ji'chondeccuja qquen su'fa: —¡Me'in! ¡Osha'faya'bi gi tsa'su aindeccuma ganañe! ¡Tsendeccuta tsu ingima ti'tsse osha'faya!

³² Tsa'caen supa tsa ande tise'pa can'ga'choja ñoa'me ega ande qquen suye ashaemba qquen su'fa: —Tsa ingi can'ga'cho andenijan tisupanaccu fi'tticco'je'fa. Toya'caen poiyi'cco tseni'su tsandiendeccuja ñoa'me randepa quinsetssi'fa.

³³ Toya'caen gi atte'fa tsa rande a'i Anac omba'su dushundeccuma'qque. Ingita gi tisupama in'jan'fa ttombia'cancho'cco. Nane tsendeccu'qque tsu tsa'cancho'ccoe ingima caña'jen'fa.