Números 12 - Cofán: Chiga Tevaen'jen

Moisésma egae afase'fa'cho

¹ María toya'caen Aarón Moisésma egae afaseye ashaen'fa. Nane Moisés Cus ande'su pushesuma pushesi tsa'caen afase'fa.

² Toya'caen tsu su'fa: “Na'su Chigaja jo'su Moisési'ccuyi afa'jembipa ingi'ccu'qque afa'je.” Tsa'caen su'fa'choma Na'su Chigaja paña.

³ Ñoa'metsseta tsu Moisésja poi andesundeccuma bove'cco qquen injancho.

⁴ Tsa'cansi tsu Na'su Chigaja Moisés, Aarón toya'caen Maríama su: “Que'i dosyi ñama cachuicco'je'cho carpani ja'faja.” Tsa'caen susi tsu ja'fa.

⁵ Tise'pa jasi Na'su Chigaja sintssia unjimba'ccoi'ccu andepa carpanga cani'jen'ttinga ccutsu. Andepa Na'su Chigaja Aarón toya'caen Maríama ttu'sesi tise'pa jisi

⁶ qquen su: “Va ña que'inga su'choma paña'faja: Minga'ni Chiga Aya'fama afa'su que'i'ccu can'jeni ñajan attian'choi'ccu toya'caen ayo'oni tisema afa'je.

⁷ Tsa'ma ñama shondo'su Moisési'ccuja tsa'caen tsombi gi. Tise tsu cca'i ñama shondosundeccuma ti'tsse pañamba ñotsse tson'su.

⁸ Tsa'cansi gi tisei'ccu cambajunaccu a'tatsse aya'fai'ccu condasecco'je. Tise tsa'caen ñama cambajunaccu atte'je'ninda ¿ma'caen qui que'ija tisema egae afa'faya?”

⁹ Na'su Chigaja tsendeccuma ñoa'me iyicca'yepa ja.

¹⁰ Tsa'caen japa unjimba'cco carpa tsa'o'ye joqquitssisi tse'faei'ccuyi María pa'cco tise ttono congomba tototsse da. Aarónjan Maríama piyicamba tise ttono congo'choma attepa

¹¹ Moisésnga su: “Chigáne ña na'su, ingima vanaembe canjan. Ñoa'me sumbie dapa gi va egae tsincon'chove tson'fa.

¹² Anttejama cuintsu du'shu toya ttopanga papa congo'choma isuqquia'caen tise ai'vo daya'chove.”

¹³ Tsa'caen susi Moisésja Na'su Chigama qquen iñajan: “Na'su Chiga, quema gi iñajan chigáne ccushaenjan.”

¹⁴ Tsonsi Na'su Chigaja su: “Ñoa'me tise yaya chi'gapa camba'junga attui'choecan'da siete a'ta pa'cco tsu ansangepa can'jeñe'can. Tsa'caen tsomba tsu canqque'ye joqquitssiangeye'can siete a'ta pa'cco. Omboe tsu ccase jiye oshaya.”

¹⁵ Tsa'caen susi Maríaja canqque'ye joqquitssiangepa siete a'ta pa'cco ccani can'jen. María ccani can'jensi aindeccuja ccani jambe'yi tse'tti tise've ronda'je'fa.

¹⁶ Tsa'ma tsene María ccushapa tise'panga jisi Hazerot'ye sombopa Parán a'i menia can'jen'fa.