Números 11 - Cofán: Chiga Tevaen'jen

Na'su Chiga aña'choma afeye su'cho

¹ Fae a'ta israendeccuja Na'su Chigama afaseye ashaen'fa tisupa ma'caen can'jen'chone. Tsa'caen afase'fa'choma pañamba Na'su Chigaja iyicca'yepa si'ngema moesi pa'cco tise'pa can'jen'cho utufa'ye setsa.

² Tsa'caen setsasi aindeccuja Moisésma iñajan'fa cuintsu fuiteye. Tsonsi Moisésja Na'su Chigama iñajan tsendeccune. Iñajansi si'ngeja pa.

³ Tsa'cansi tse'ttima Tabera qquen inisian'fa. Nane tse'ttinga tsu Na'sumbe si'ngeja tise'pama iyicca'yepa setsa.

⁴ Toya'caen israendeccui'ccu fae'ngae jacan'cho injanga cansesundeccu jo'su aña'choveyi añe injan'jen'fa. Faesu israendeccuma in'jaensi poiyi'cco i'nañe ashaemba su'fa: “¡Aña'cho te jiñe'can cuintsu ingi an'jeñe!

⁵ Nane injan'jen gi ingi Egiptoni can'jemba aqquiatsse asipa avuma an'jen'choma. Toya'caen gi tseni an'jen'fa pepino, melón, sevoya, totoa sevoya, toya'caen ajoma.

⁶ Tsa'ma ja'ñonda gi qquipoe'supa pa'faya. Vanija jo'su manámeñi gi an'jen'fa.”

⁷ (Nane manánda tsu culantro choa'caen chipiri cho'ccopa tumbaqquia'caen quiopacho'cco.

⁸ Toya'caen ancan'ninda tsu harinama yayapai'ccu panme matssanqquian'caen in'jaen. Nane aindeccuja japa tsesuma taipa sun'dapa vuvutssia've tsomba panme matssan'fa.

⁹ Poi cose suruno sheque'nijan maná'qque canqquenga sheque'je.)

¹⁰ Israendeccu, tise tsa'osundeccu'qque tsa'caen tise'pa carpa'ye ina'jen'fa'choma Moisésja paña. Na'su Chiga'qque pañamba iyicca'yesi in'jamba Moisés tsendeccuma chi'gapa

¹¹ Na'su Chiganga qquen su: —¿Jongoesie qui ñajan que shondo'suma qquen egae tson? ¿Ma'caen in'jamba qui ña va aindeccuma angacaña'chove manda?

¹² Que ñama iñajan va aindeccuma angaye, que ingi tayopi'su coenzandeccunga afeye su'cho andeni. Tsa'ma ¿ñanda ti gi tise'pa yaya, tsambi'ta mama, tise'pama du'shu toya chocho'je'choma'caen tivenga opipa angaye?

¹³ ¿Manima gi aña'chove somboemba poiyi'cco tise'pama o'fiaña? Nane i'ná jipa tsu ‘Aña'chove ñanga afeja’ qquen ñama su'fa.

¹⁴ Ñajan tisuyi poiyi'cco va aindeccuma angacañe oshambi gi. Nane andu'cho panshaen tssaitssiqquiacan'fa tsu va aindeccuja ñane.

¹⁵ Nane ñoa'me ñame in'jan'cho'ta panshaen tsa'caen ñama tsinconsa'ne junde ñama fi'ttija. Tsa'caen da'ta gi ti'tsse ña vana'jen'choma vanaña'bi.

¹⁶ Tsama pañamba Na'su Chigaja su: —Setenta israe'su coenzandeccuma ñambe boñajan majama que poiyi'cco israendeccuma manda'jeya'chone in'jan'chondeccu'suma. Tsendeccuma ipa ñai'ccu cachuicco'je'tti'su carpani tise'pai'ccu ronda'jeja.

¹⁷ Tseni gi andepa que'i'ccu condasepa quenga afe'cho Qquendya'pama enttingeve isupa tsendeccunga afeya cuintsu quema fuitepa aindeccuma angacan'faye. Tsa'caen tson'nijan fae'ccoya'bi qui.

¹⁸ Toya'caen aindeccuma mandaja cuintsu tu'ine tisupama ñoña'faye ñanga ccutsu'faya'chove. Ñoñamba tsu añachoma an'faya. Tayo gi paña tise'pa i'namba qquen su'je'choma: ‘¡Aña'cho te jiñe'can cuintsu ingi an'jeñe! ¡Egiptoninda gi ti'tsse ñotsse canse'fa!’ Nane ñotssi tsu ña tise'panga afesi cuintsu aña'choma an'faye.

¹⁹ Ni fae a'ta, ni dos a'ta, ni cinco, ni diez, ni veinte a'tane'ñi afeya'bi gi.

²⁰ Tsa'ma fae ccovu pa'ccone gi afeya cuintsu tsofátuni so'mbotsse amba chi'gatsse an'faye. Nane ña tise'pai'ccu can'jen'ni'qque tsu ñama chi'gapa cati'fa. Ñama catipa tsu ña paña'jen'ni i'namba su'fa: ‘¿Jongoesie gi Egiptone sombo'fa?’

²¹ Tsa'caen susi Moisésja su: —Ñai'ccu jacansundeccuta tsu seisciento mil tsandie. ¿Tsa'cantssia'ma ma'caen qui fae ccovu pa'ccone aña'choma afeya?

²² ¿Mani tsu tsain'bitssi oveja toya'caen vaura'qque jiña tsama fi'ttipa tsa pa'tssi a'inga afeye'ta? Mapán mar'su avuma pa'ccoma afe'ni'qque nepiya'bi tsu poiyi'cconga.

²³ Tsa'caen susi Na'su Chigaja su: —¿In'jan ti qui tsata tsu re'ricco ñane'jan? Ja'ño qui atteya ña suqquia'caen ña ñoa'me tson'choma.

Setenta israe'su coenzandeccu Chiga Aya'fama afa'cho

²⁴ Moisés carpane sombopa japa aindeccunga conda Na'su Chiga tisenga su'choma. Toya'caen setenta israe'su coenzandeccuma boñamba tise cachuicco'je'cho carpanga shoquendi'e ccutsian.

²⁵ Tsa'caen tsonsi Na'su Chigaja unjimba'ccoi'ccu andepa Moisésnga afa. Afa nanimba Moisés an'bian'cho Qquendya'pama enttingeve isupa tsa setenta israe'su coenzandeccunga afe. Tsa'caen Chiga Qquendya'pa tise'panga ca'nisi Chiga Aya'fama afa'fa. Tsa'ma ti'tsse tsa'caen afa'je'fambi.

²⁶ Toya'caen dos tsandie, Eldad, Medad'qque tsa setentave ttu'secho'su tsa carpani jambi'ma toe canqqueni can'jen'fa. Tsa'caen can'jen'fa'ni'qque Chiga Qquendya'paja tise'panga'qque ca'nisi canqquene Chiga Aya'fama afaye ashaen'fa.

²⁷ Tsa'caen afa'je'fasi fae du'shu Moisésni conda'su buttopa jipa qquen su: —Eldad toya'caen Medad tsu canqqueni Chiga Aya'fama afa'je'fa.

²⁸ Tsonsi Josué, tsa Nun dutssi'ye, dusuite'yi Moisésma fuite'suja qquen su: —¡Ña na'su, Moisés, tsendeccumajan se'pija!

²⁹ Tsa'ma Moisésja qquen su: —¿Ñameñi injan'jemba ti qui se'pi? Isha tsu Na'su Chigaja tise Qquendya'pama poiyi'cconga afeya cuintsu Chiga aya'fama afa'je'faye.

³⁰ Tsa'caen tson nanimba Moisés toya'caen poiyi'cco israe'su coenzandeccu'qque canqqueni ji'fa.

Na'su Chiga chivi'rima moe'cho

³¹ Na'su Chiga cuintsu mar'ye fingiañe mandasi tsa fingianjan tsain'bitssi yayapa chivi'rive i. Tsa'caen isi tsesuja israendeccu canqquenga amppipa toya'caen canqque utufanga'qque amppi'fa. Nane fae a'ta cose'tsse ja'ni'qque toya tsu tsesuja tseni sheque. Toya'caen tisupanaccumbe ombanga amppi'jesi ñoa'me fae metro tombusu'qquiaca'on tsu.

³² Tsequi a'ta pa'cco cose'qque toya'caen ccaqui a'ta'qque aindeccuja toya tsesuma tai'je'fa. Poiyi'ccoma bove'ccoe indiqquia'can'qque tsu yayapa chivi'ri diez boñame tai. Tsa'caen taipa tsu canqque utufanga san'jan'fa.

³³ Tsa'caen taipa tise'pa tsesuma an'jen'ni Na'su Chigaja tise'pama ñoa'me iyicca'yepa tise'pa injama'choma somboensi tsain'bitssi a'i tsequi pa'fa.

³⁴ Tsa'caen aña'choveyi añe injan'jendeccu pasi a'tupa tsu tse'ttima Kibrot-hataava qquen inisian'fa.

³⁵ Tsa Kibrot-hataavane sombopa israendeccuja Hazerotni nepipa tse'tti can'jen'fa.