Nehemías 2 - Cofán: Chiga Tevaen'jen

Nehemías Jerusaléni jaye antte'cho

¹ Na'su manda'je'cho veinte canqque'fave nepisi tsa Nisán ccovuni gi fae a'ta tisenga cui'ñañe vinoma isi tsu na'suja ña ñombi'ye'je'choma atte.

² Attepa tsu qquen iñajampaña: —¿Mingae dapa qui ñombi'ye'je'chove attian? Pajimbi'ma aqquia tisu vana'jen'chone tsa'caen da'chove gi atte. Tsa'caen susi gi dyopa injama'choni ttun'dundu'jeve dapa

³ na'suma chigambiamba qquen su: —Ti'tsse canseja Ti'tsse'tssia. ¿Ma'caen gi ñombi'ye'je'chove attiambi'ya tsa ingi yayandeccu'ye ccui'fa'cho canqquema metsse tsomba toya'caen tise sombo'ttima metsse oque cati'fa'ninda? Ña tsa'caen susi tsu na'suja su:

⁴ —¿Ma'caen gi quenga tsoña? Tsa'caen susi gi injama'choi'ccu sefacconi'su Chigama iñajamba

⁵ qquen na'sunga su: —Que Ti'tsse'tssia ñame in'jan'da, toya'caen ña ja'ño iñajan'cho ñotssisi in'jan'da, chigáne ñama manda moejan Judá andeni, ña yayandeccu'ye ccui'fa'cho canqqueni, ña japa ccase tsesuve ñoñañe.

⁶ Na'suja tise pushei'ccu pporotsse dyaipa qquen ñama iñajampaña: —¿Mañi ccovu tsu que jaya'cho? ¿Minga'ni qui ccase jiya? Tsonsi mañi ccovuve ña japa jiya'choma tisenga condasi tiseja antte ña jaya'chove.

⁷ Toya'caen gi tisema iñajan tise in'jan'da tevaen'jema ñanga afeye ña Eufrates na'ema chiga amppi'jefa'su gobernadorondeccunga afeye cuintsu se'pimbe'yi ñama antte'faye pashamba Judáni jaye.

⁸ Toya'caen gi faesu tevaen'jeme iñajan na'sumbe tsampima coira'su Asafnga afeye cuintsu tsaja osha'cho quini'ccoma ñanga afeye. Afesi mesave somboemba Chiga etti pporotsse'su sundaro etti'su sombo'ttima toya'caen ttuccu'su sombo'ttima'qque ccase ñoñamba ña tsa'ove'qque tsao'ñañe. Ña tsa'caen iñajansi tsu Na'su, ña Chiga, ñama ñotsse fuitesi na'su Artajerjesja osha'cho ña iñajan'choma ñanga afe.

¹¹ Osefa'poe gi Jerusaléni nepi. Tseni tres a'ta can'jemba gi

¹² cose jangipa majan faesu tsandiendeccui'ccu canqquema can'su ja. Nane toya majangayi'qque condambi gi Na'su Chiga ñama in'jaensi Jerusalénma ma'caen tsoña'choma. Ñajan boronga otsepa jasi ñai'ccu fae'ngae jacansundeccuja tsu'ttengae tsuipa ja'fa.

¹³ Tsequi cose Sinjunccu'su sombo'tti'ye sombopa Vatova tsa'ccu sombo'jengae pashamba Cati'je'cho sombo'ttinga nepi. Nepipa gi Jerusalén canqque'su patu ttuccuma atte'fa tayo amppi sheque'choma, toya'caen canqque'su sombo'ttima tayo oque'fa'choma.

¹⁴ Tsomba Tsa'ccu sombo'je'cho sombo'ttinga japa na'su tsa'ccu ccutsian'chonga nepipa shanda. Nane ña boro panshañe oshambisi gi shanda.

¹⁵ Toya cose'yi gi sinjunccu shaca'chopi japa pa'tssima ñotsse camba shandapa Sinjunccu'su sombo'tti'ye Jerusalénga ca'ni'fa.

¹⁶ Nane governadorondeccuja atesu'fambi tsu ña cose jacan'cho ni ña ma'caen tson'choma. Toya'caen gi Judá'su aindeccu, jai'ngae semaña'chondeccu, tsa Chigama afasundeccu, nasundeccu, governadorondeccu cca'indeccunga'qque toya condambi ña tsoñe in'jan'choma.

¹⁷ Tsa'camba gi ja'ño tise'panga su: —Que'i in'janqquia'caen ingija ñotsse can'jen'fambi. Nane Jerusalén canqque'su patu ttuccu amppi shequepa sombo'tti'qque tayo oque'cho. ¡Chigáne ñama fuite'faja! ¡Jinge fae'ngae semamba Jerusalén canqque'su ttuccuma ccase ccutsiañe cuintsu cca'indeccu ingima afase'choma antte'faye!

¹⁸ Tse'i ñajan tise'panga conda ma'caen Chiga ñama ñotsse fuitesi na'su Artajerjes ñama ñotsse afa'choma. Condasesi tsu su'fa: —¡Tsa'caenjan jinge ccase ttuccuma ccutsian'faye! Tsa'caen in'jamba tisupapora ñotsse injanccopa ashaen'fa.

¹⁹ Tsa'ma Sanbalat, tsa horón a'i, Tobías, tsa amonita na'suma shondo'su, toya'caen Gesem, tsa árabe a'i, ingi tsoña'choma pañamba ingima feñamba afasepa su'fa: —¿Micon qquen qui tson'jen'fa? ¿Isha qui na'su Artajerjes'ye somboye in'jamba tson'jen'faya?

²⁰ Tsa'ma ñajan qquen su: —Na'su, Sefacconi'su Chiga tsu ingima fuiteya. Ingija, tisema shondosundeccuyi gi canqque'su ttuccuma ccase ccutsian'faya. Nane que'ija ca'ni'faya'bi qui ingi'ccu semañe.