Miqueas 4 - Cofán: Chiga Tevaen'jen

Na'su mandasi opatsse canse'cho

¹ Osefaeña'cho a'ta nepijisi ma'ttinga Na'suma iñajan'jeña'cho ccotta'ccoja poi ccotta'ccoma joccapitssiya. Tsangae tsu tsa'caña. Nane poi faesu ccotta'ccoma patsusi poi ande'su aindeccu tseni ja'faya.

² Nane tsain'bio aindeccu tsa'caen bopa su'faya: “Jinge, Na'su ccotta'cconga ansunde'faye. Jinge, Jacob Chigama iñajan'jeni ja'faye. Tseni jasi tise tsu tise ma'caen canse'cho tsaiquima atesiaña'cho cuintsu ingi tsa'caen jacamba canse'faye.” Nane Zión ccotta'cco'ye tsu Na'su in'jan'choma atesiaña. Toya'caen Jerusaléne tsu tise Aya'fama afaya.

³ Na'suja poi biani'su canqquema camba in'jaña majan ñotssia, majan ega've. Tsa'caen in'jamba tsu tise'panga ma'caen tsoña'chove in'jan. Nane tsendeccu tsu tise'pa sundaro matichima andema pa'fuqque'suve tson'faya. Tise'pa oma'ccoma'qque tetajin'su ttembama cha'ttuqque'suve tson'faya. Minguite tsu fae ande faesu ande'sui'ccu ccase geraen'faya. Nane aindeccuma'qque atesian'fayambi sundarondeccuve.

⁴ Tsa'ma poi a'i opatsse cansepa tisupa o'fa tsaja ccaqueje tumbianccuni, tsambi'ta tisupa higuera tsosiccuni dyai'faya. Na'su Osha'choma Oshacho'cho tsa'caen susi ¿majan tsu tise'pama dyoñaña?