Levítico 4 - Cofán: Chiga Tevaen'jen

Injansembe'yi egae tsincomba afe'cho

¹ Na'su Chiga Moisésnga qquen su:

² “Israendeccuma condaja cuintsu majan a'i injansembe'yi Na'su manda'cho'suma egae tsincon'da qquen tsoñe:

³ “Chigama afa'su na'su egae tsincon'da tsu poiyi'cco israendeccune'qque shacaen. Tsa'caen egae tsincon'da tsu vaura quitsaye chu'a, egave me'choama, Na'su Chiganga afeya'cho tise egae tsincon'choma ccuchaye.

⁴ Nane tsa vaura quitsaye chu'ama tsu Chigai'ccu cachuicco'je'tti'su sombo'ttinga iya'cho Chiganga afeye. Ipa tsu tisu tivema vaura tsovenga pporaemba tsama fi'ttipa Na'su Chiganga afeya'cho tise can'jen'ttinga.

⁵ Fi'ttipa re'riccoe vaura anjampama isupa Chigai'ccu cachuicco'je'tti'su carpanga angapa catseya'cho cuartonga ca'niña'cho.

⁶ Ca'nimba tisu tsimian'ccoma tssipoemba enttinge'su cuarto sarupa piccofin'dinga catsepa siete se tsanga bitssaeña'cho Na'su Chiga can'jen'chonga.

⁷ Toya'caen re'ricco anjampai'ccu tsu Na'su Chiga can'jen'cho pporotsse jincho ñome'bama oque oraen'jen'cho'su ontsian'ccoma onjoeña'cho. Onjoemba tsu toya anjampa antteye'choma Chigai'ccu cachuicco'je'tti'su carpa sombo'ttinga angapa andenga zaiña catiya'cho Chigama iñajañe oque oraen'jen'cho jin'ttinga.

⁸ “Omboe tsu pa'cco tsa egae tsincon'chone afe'cho vaura ttopani jincho yayapa, dos sevacho,

⁹ sevachoni jincho yayapama'qque isuya'cho. Toya'caen sepacconi jincho yayapa, sansani jincho yayapama'qque sevachoi'ccu isuya'cho.

¹⁰ Tsa'caen isupa tsu Chigama afa'suja pa'ccoma oque oraen'jen'chonga oqueya'cho.

¹¹ Tsa'ma vaura ttono, pa'cco na, toya'caen tsove, ttena'go, ttopa, cco'pama'qque

¹² a'i can'jen'cho joccani chunia angaya'cho. Nane pa'cco vaurama tsu tsa'caen joccani angaya'cho cusepama boña'jeni. Tsa cusepa boñanga tsu si'tsima boñamba tsanga vaurama oqueya'cho.” Poi israendeccu, tise'pa na'su, tsambi'ta majan israe'su a'i, egae tsincon'da tsu vaura quitsaye, chivo, tsambi'ta oveja du'shuma Chigama cachuicco'je'ttinga ipa afeya'cho.